ພົບທາດເກົ່າແກ່ຢູ່ພື້ນນໍ້າຂອງ

ໃນຣະຍະນີ້ ແມ່ນໍ້າຂອງ ກໍາລັງບົກແຫ້ງ ຢ່າງຜິດປົກກະຕິ ແລະເມື່ອວັນຈັນ ທີ່ຜ່ານມາ ພວກຕັກດິນຊາຍ ໄດ້ພົບເຫັນ ທາດຝັງຢູ່ພື້ນ ຫາດຊາຍ ໃນກາງຂອງ ຢູ່ຕໍ່ໜ້າ ເມືອງຕົ້ນເຜິ້ງ ແຂວງບໍ່ແກ້ວ.
ອະວາຣີ
2010-02-23
ອີແມວລ໌
ຄໍາເຫັນ
Share
ພິມ

ຊາວລາວພາກັນ ຫລັ່ງໃຫລໄປເບິ່ງ ຫລາຍຄົນ ຕື່ນຕົກໃຈ ແລະ ນົບໄຫວ້ ເພາະເຊື່ອວ່າ ເປັນສິ່ງສັກສິດ. ທາດດັ່ງກ່າວ ສ້າງດ້ວຍຫິນ ສູງປະມານ 4 ແມັດ ມີເສັ້ນຜ່າກາງ 3 ແມັດ ແລະ ທາງໃນແບ່ງອອກ ເປັນຫລາຍຊັ້ນ. ທາດນີ້ມີຮູບ ລັກສນະຄືກັບ ລະຄັງຂ້ວມ. ນອກ ຈາກທາດແລ້ວ ພຣະພຸທຮູບ ຫລາຍອົງ ກໍຖືກຄົ້ນພົບ ໃນເວລາດຽວກັນ.

ຫລັງຈາກພົບເຫັນ ພຣະອາຈານ ຄຳເງິນ ທະມູນປາໂລ ເຈົ້າຄນະສົງ ແຂວງບໍ່ແກ້ວ ໄດ້ຂໍຮ້ອງ ໃຫ້ຣົດຍົກ ຍົກທາດ ແລະ ພຣະພຸທຮູບ ທີ່ພົບເຫັນ ທັງໝົດໄປສະຖິດ ໄວ້ທີ່ວັດ ດອນສວັນ ພັທນານະຣາມ ໃນເມືອງຕົ້ນຜິ້ງ. ຫລັງຈາກນັ້ນ ພຣະສົງສັມມະເນນ ແລະ ເຈົ້າໜ້າທີ່ ແຂວງບໍ່ແກ້ວ ຈະປຶກສາຫາລື ກັນຕື່ມວ່າ ຈະຮັກສາ ວັດຖຸບູຮານ ອັນເກົ່າແກ່ ເຫລົ່ານີ້ໄວ້ ແນວໃດ ແລະຢູ່ໃສ.

ນັກວັດຖຸໂບຮານ ຫລາຍຄົນຄິດວ່າ ໃນສມັຍຣະຫວ່າງ 500 ແລະ 1,000 ປີກ່ອນ ຊາວລາວມັກ ສ້າງວັດ ແລະ ທາດຢູ່ໃກ້ ແມ່ນ້ຳຂອງ ແລະ ຫລາຍປີຕໍ່ມາ ຍ້ອນນ້ຳ ໄຫລແຮງ ເຊາະຕາຝັ່ງ ເປັນເຫດໃຫ້ ຕາຝັ່ງ ເຈື່ອນເພພັງ ຈົນວັດ ແລະ ທາດຫລາຍໆແຫ່ງ ກໍພັງທະລາຍ ລົງແມ່ນ້ຳຂອງ.

ແມ່ນ້ຳຂອງ ຢູ່ຕໍ່ໜ້າ ແຂວງບໍ່ແກ້ວ ກຳລັງ ບົກແຫ້ງລົງ ຢ່າງໜ້າເປັນຫ່ວງ ປັດຈຸບັນ ນ້ຳເລິກ ພຽງແຕ່ນຶ່ງແມັດ ເທົ່ານັ້ນ ເຮືອອ່າວໃຫຍ່ແດ່ ບໍ່ສາມາດ ແລ່ນຜ່ານໄດ້ເລີຍ.

ເຕັມຫນ້າ