ແຂວງຫົວພັນກັງວົນ ບັນຫາແຫ້ງແລ້ງ

ຜແນກ ຊົລປະທານ ແຂວງຫົວພັນ ຍັງກັງວົນ ກ່ຽວກັບບັນຫາ ພັຍແຫ້ງແລ້ງ ຈະກະທົບໃສ່ ການປູກເຂົ້າ ນາປີ ຫລັງຈາກກະທົບ ນາແຊງ ແລ້ວ.
ມະນີຈັນ
2010-05-13
ອີແມວລ໌
ຄໍາເຫັນ
Share
ພິມ

ຜແນກ ຊົລປະທານ ແຂວງຫົວພັນ ຍັງມີຄວາມກັງວົນ ກ່ຽວກັບບັນຫາ ພັຍແຫ້ງແລ້ງ ທີ່ຈະກະທົບ ຕໍ່ການຜລິດ ເຂົ້ານາປີຕໍ່ໄປ ເຖິງແມ່ນວ່າຈະມີ ຝົນຕົນແດ່ແລ້ວ ແຕ່ນໍ້າໃນເຂື່ອນ ຊົລປະທານ ກໍຍັງບໍ່ເພີ່ມ ຂຶ້ນເທື່ອ. ຕາມຄໍາເວົ້າ ຂອງເຈົ້າໜ້າທີ່ ກ່ຽວຂ້ອງທ່ານນຶ່ງ:

"ແຕ່ວ່າ ເລື່ອງຊົລປະທານ ກໍຍັງອັນນັ້ນຢູ່ ເພາະວ່ານໍ້າໃນ ເຂື່ອນມັນບໍ່ຂຶ້ນນະ ແຕ່ວ່າກໍຊ່ວຍ ແບ່ງເບົາໄດ້ ຫລາຍເຕີບ ເພາະວ່າ ຕົ້ນເດືອນນີ້ ຝົນຫາກໍຕົກເນາະ ກໍຖື ວ່າຊ່ວຍໄດ້ ຈໍານວນນຶ່ງ ແຕ່ວ່າເລື່ອງເກັບ ກັກນໍ້າເຂື່ອນຕ່າງໆ ຣະດູນາປີ ຄັນຖ້າວ່າຝົນ ບໍ່ຕົກລົງມາອີກ ກໍຈະມີບັນຫາ ເລື່ອງຊົລປະທານ ນີ້ແຫລະ ຈະໜັກກ່ວາໝູ່".

ນໍ້າໃນລໍານໍ້າ ສາຂາຕ່າງໆ ກໍເພີ່ມຂຶ້ນແລ້ວ ແຕ່ຖ້າປຽບທຽບໃສ່ ປີທີ່ຜ່ານໆມາ ປີນີ້ມີຄວາມ ແຫ້ງແລ້ງຫລາຍ ໂດຍທີ່ຜ່ານມາ ການຜລິດ ເຂົ້ານາແຊງຖືວ່າ ຫລຸດລົງໃນ ຫລາຍພື້ນທີ່. ຖ້າຫາກວ່າ ປະຣິມານນໍ້າຝົນ ຍັງໜ້ອຍ ຢູ່ຕໍ່ໄປນັ້ນ ກໍຈະກະທົບໃສ່ ເຂົ້ານາປີ ເຊັ່ນກັນ ຊຶ່ງອາຈຈະຕ້ອງເລື່ອນ ລະຍະເວລາ ການປັກດໍາ ອອກໄປ ຈະເຮັດໃຫ້ ຄຸນນະພາບເຂົ້າ ບໍ່ດີເທົ່າທີ່ຄວນ. ເມືອງທີ່ໄດ້ຮັບ ຜົລກະທົບຈາກ ບັນຫາພັຍແຫ້ງແລ້ງ ໄດ້ແກ່ ເມືອງແອດ ຊຽງຄໍ້ ສົບເບົ້າ ຊໍາໃຕ້ ເມືອງວຽງທອງ.  ກ່ຽວກັບການ ແກ້ໄຂບັນຫານັ້ນ ທ່ານຄິດວ່າ ຄວນມີການປັບປຸງ ຄອງຊົລປະທານ:

"ປັຈຈຸບັນ ທັນດ່ວນ ກໍແມ່ນສ້ອມແປງ ຄອງນີ້ແຫລະ ເພາະວ່າ ຄອງເໝືອງນີ້ ມັນຂ້ອນຂ້າງເປັນ ຄອງເໝືອງ ທີ່ປະຊາຊົນ ຂຸດເອງ ຈໍານວນນຶ່ງ ກໍເຮັດໄດ້ ຫລາຍປີ ແລ້ວ ຄອງເໝືອງ ມັນຖືວ່າເປ່ເພ ແລະກໍສໍາລັບຕົວ ເຂື່ອນ ອ່າງເກັບນໍ້າມັນກໍ ບັນຈຸໄດ້ໜ້ອຍ ຖ້າມີເງື່ອນໄຂ ກໍຢາກຣະບາຍ ຕະກອນເອົາຕະກອນ ອອກຫັ້ນແຫລະ ແລ້ວກໍເຮັດໃຫ້ອ່າງ ມັນສາມາດ ເກັບກັກນໍ້າໄດ້ຫລາຍ".

ທ່ານກ່າວ ເພີ່ມຕື່ມວ່າທີ່ ຜ່ານມາ ຣັຖບານລາວ ກໍມີແຜນການ ປັບປຸງ ຄອງຊົລປະທານ ແຕ່ໄປຄາຢູ່ນໍາ ເລື່ອງງົບປະມານ ໂດຍໃນປັຈຈຸບັນ ນີ້ຖືວ່າ ພື້ນທີ່ການຜລິດ ໃນແຂວງຫົວພັນ ທີ່ເຂົ້າເຖິງຣະບົບ ຊົລປະທານນັ້ນ ມີພຽງເຄິ່ງນຶ່ງ. ສ່ວນອີກເຄິ່ງນຶ່ງ ເປັນການ ຊົລປະທານ ແບບປະຖົມປະຖານ ຊຶ່ງຊາວບ້ານ ເປັນຜູ້ເຮັດຂຶ້ນເອງ.

ເຕັມຫນ້າ