ໃນຂະນະທີ່ ຣະດັບນໍ້າຂອງ ຍັງສູງຂຶ້ນ ຢູ່ຕໍ່ມາ, ເຈົ້າໜ້າທີ່ ພະຍາກອນ ອາກາດ ແລະ ອຸທຸຄະສາດ ເຕືອນປະຊາຊົນ ບ້ານແສນດິນ, ເມືອງນາຊາຍທອງ ວ່າ ຈະມີຝົນຕົກໜັກ ໃນຣະຫວ່າງ ວັນທີ 1 ຫາ ວັນທີ 20 ເດືອນກັນຍາ.
“ແຕ່ຕົ້ນ ຫາ ກາງເດືອນ ຍັງມີຝົນຕົກໜັກຫລາຍຢູ່. ຕົ້ນຫາ ກາງເດືອນ 9, ໃນຣະຫວ່າງ ວັນທີ 1 ຫາ ວັນທີ 20 ປະມານນີ້, ຈະຍັງມີຝົນຕົກໜັກ ຢູ່ແຖວນັ້ນ.”
ເຈົ້າໜ້າທີ່ ກ່າວຕໍ່ໄປ ວ່າ ໃນຊ່ວງເດືອນນີ້ ຝົນ ກໍຍັງຈະຕົກຢູ່, ແຕ່ວ່າ ຄົງຈະບໍ່ໜັກ ເທົ່າກັບ ລະຍະຕົ້ນ ຫາ ກາງເດືອນກັນຍາ, ໂດຍສະເພາະ ໃນບໍຣິເວນ ບ້ານແສນດິນ ເມືອງນາຊາຍທອງ.
ນອກຈາກນັ້ນ, ທາງຜແນກ ພະຍາກອນອາກາດ ຍັງໄດ້ກຽມພ້ອມ ກັບສະຖານນະການ ທີ່ຄາດວ່າ ຈະເກີດຂຶ້ນນັ້ນ ໃຫ້ກັບ ປະຊາຊົນ, ດັ່ງເຈົ້າໜ້າທີ່ ກ່າວໃນຕອນນຶ່ງ ວ່າ:
“ຝ່າຍ ຜແນກອຸຕຸນິຍົມ ຂອງພວກເຮົາ ກໍໄດ້ເຮັດແຈ້ງການເຕືອນ ການພະຍາກອນ ອາກາດ ວ່າ ເຂດໃດ ຝົນຕົກໜັກ, ພວກເຮົາ ກໍເຕືອນກັນ ໄປທາງວິທຍຸ ໂທຣະພາບ ແລະ ບັນຫາ ບ່ອນຊຸມຊົນ ທີ່ວ່າ ຢູ່ໄກເຂດ ກໍຕ້ອງກຽທມໂຕ ຣະວັງພັຍ ກຽມພ້ອມ ທຸກເວລາ.”
ຢ່າງໃດ ກໍຕາມ, ເຈົ້າໜ້າທີ່ ເຕືອນປະຊາຊົນ ໃຫ້ຣະວັງ ອັນຕະລາຍ ຈາກສະພາວະ ຝົນຕົກໜັກ ທີ່ອາດເກີດນໍ້າຖ້ວມໄດ້ ແລະ ນໍ້າໃນເຂື່ອນ ອາດລົ້ນລົງມາ, ພ້ອມກັບ ປະຊາຊົນ ທີ່ຢູ່ໃນບໍຣິເວນ ແຄມແມ່ນໍ້າຂອງ ກໍໃຫ້ລະວັງ ແລະ ກຽມພ້ອມ ເຊັ່ນດຽວກັນ.