ງານວັທນະທັມຊົນເຜົ່າ ຂ.ຫລວງພຣະບາງ

ສະຖານທູດ ສະຫະຣັຖ ອະເມຣິກາ ປະຈໍາລາວ ສນັບສນູນ ລິເລີ້ມ ການຈັດງານ ວັທນະທັມ ຊົນເຜົ່າ ໃນແຂວງ ຫລວງພຣະບາງ
ມະນີຈັນ
2010-11-02
ອີແມວລ໌
ຄໍາເຫັນ
Share
ພິມ

ກົດຟັງສຽງ

ອຸປທູດ Peter Haymond ເປັນຜູ້ຕາງໜ້າ ຣັຖບານ ສະຫະຣັຖ ອະເມຣິກາ ໃນພິທີເປີດ ງານວັທນະທັມ ຊົນເຜົ່າ ຄັ້ງທໍາອິດ ຢູ່ແຂວງ ຫລວງພຣະບາງ. ສະຖານທູດ ສະຫະຣັຖ ໄດ້ຊ່ວຍ ປະກອບສ່ວນ ເປັນເງິນຈໍານວນ 7500 ໂດລາ ເຂົ້າໃນການ ຈັດງານ ຣະຫວ່າງວັນ ທີ 29 ຫາ 31 ຕຸລາ 2010 ເພື່ອສະແດງ ສິລປະວັທນະທັມ ແລະ ຜົລຜລິດຕ່າງໆ ຂອງຊົນເຜົ່າ ແຂວງຫລວງພຣະບາງ.

ມີທັງໝົດ 7 ຊົນເຜົ່າ ເຂົ້າຮ່ວມ ໃນງານຄັ້ງນີ້ ຊຶ່ງໃນນັ້ນ ມີທັງການຮ້ອງເພັງ, ຟ້ອນ, ເກັມຫລິ້ນ, ກິຈກັມ, ອາຫານ ແລະ ການຫັຖກັມຕ່າງໆ ຂອງເຂົາເຈົ້າ. ງານວັທນະທັມ ຊົນເຜົ່າ ແຂວງ ຫລວງພຣະບາງ ຖືກຈັດຂຶ້ນ ໂດຍສູນ ສິລປະກັມ ແລະ ເຜົ່າຊົນ ແລະຜແນກຂ່າວ ຂ່າວສານ ແລະ ວັທນະທັມ ແຂວງ.

ໃນເວທີໃຫຍ່ ຈະມີການ ສະແດງດົນຕຣີ ແລະ ຟ້ອນພື້ນເມືອງ ຊຶ່ງມີທັງ ເປົ່າຄຸ່ຍໄມ້ໄຜ່ ໄທດໍາ, ການຟ້ອນດາບ ຂອງຊົນເຜົ່າ ໄທລື້, ການຫລິ້ນ ດົນຕຣີ ເປົ່າໃບໄມ້ ຂອງຊາວເຜົ່າມົ້ງ, ແລະ ການຂັບລໍາ ກ້ຽວກັນ ໄປກັບສຽງແຄນ ຂອງຊົນເຜົ່າຂະໝຸ. ຢູ່ຜາມຕ່າງໆ ກໍມີຊ່າງ ຫັຖກັມ ສະແດງຜົລງານ ສີລປະ ແລະ ສີໄມ້ລາຍມືຕ່າງໆ ເຊັ່ນການຕໍ່າຜ້າ, ການຕີເຫລັກ ຂອງຊາວລາວ, ການຕໍ່າແພຝ້າຍ ຂອງຊາວໄທດໍາ, ການຍ້ອມຜ້າ ສີທັມມະຊາດ ຂອງໄທລື້, ການຜລິດໃໝ ຂອງຊາວລາວ ເປັນຕົ້ນ. ພ້ອມດຽວກັນ ກໍມີການຫລິ້ນ ກິລາ ຫລີ້ນເກັມພື້ນເມືອງ ຕ່າງໆຕລອດ ທ້າຍສັປດາ ທີ່ຜ່ານມານີ້.

ເຕັມຫນ້າ