ຊາວລາວ ຍັງໄປເຮັດວຽກ ຢູ່ເມືອງໄທ ຫລາຍຂຶ້ນ

ໃນຣະຍະນີ້ ຊາວລາວ ຍິ່ງມັກຂ້າມໄປ ເຮັດວຽກຢູ່ໄທ ຫລາຍຂື້ນ ແລະ ຫລາຍຄົນຕົກເຫຍື່ອ ຂອງພວກຄ້າມະນຸດ. ນັ້ນ ແມ່ນຄຳຊີ້ແຈງ ຂອງນາງ ຍານີ ເລີດໄກຣ ຜູ້ອຳນວຍການ ສຳນັກງານ ປ້ອງກັນ ແລະແກ້ໄຂ ບັນຫາ ການຄ້າເດັກ ແລະ ສະຕຣີ ຂອງໄທ.
ອາວະຣີ ຣາຍງາຍ
2008-09-26
ອີແມວລ໌
ຄໍາເຫັນ
Share
ພິມ

ນາງ ຍານີ ກ່າວ ອີກວ່າ ຢູ່ພາກຕາວັນອອກສ່ຽງເໜືອ ຫລື ພາກອີສານ ຂອງໄທ ມີການລັກລອບ ເຂົ້າມາ ເຮັດຢູ່ໄທ ຂອງຊາວລາວ ຫລາຍຂື້ນ; ຕົວຢ່າງ ຢູ່ແຂວງອຸບົນ ຊຶ່ງມີຊາຍແດນ ຕິດກັບ ແຂວງຈຳປາສັກເຈົ້າໜ້າທີ່ ຕຳຣວດໄທ ຈັບຄົນລາວຜິດກົດໝາຍໄດ້ ເຖິງເດືອນລະ ປະມານນຶ່ງພັນຄົນ; ​ເຊັ່ນດຽວກັນຢູ່ແຂວງນະຄອນພະນົມ ກໍມີຊາວລາວ ຂ້າມມາເຮັດວຽກ ຕາມຮ້ານອາຫານ ຮ້ານຄາຣາໂອເກະແລະ ​​ໃນທົ່ງໄຮ່ທົ່ງນາ ຫລາຍຂື້ນເຊັ່ນກັນ.

ນາງ ຍານີເຈົ້າໜ້າທີ່ສຳນັກງານ ປ້ອງກັນ ​​ແລະ ແກ້ໄຂ ບັນຫາການຄ້າ ເດັກນ້ອຍ ແລະ ສະຕຣີ ຂອງໄທ ກ່າວອີກວ່າ ຊາວລາວທີ່ລັກລອບເຂົ້າມາເຮັດວຽກ ຢູ່ໄທ ໃນຂະນະນີ້ ປະກົດວ່າ ມີອາຍຸອ່ອນລົງອ່ອນລົງເດັກນ້ອຍ ອາຍຸ ໃນຣະຫວ່າງ 12 ​ແລະ 13 ປີ ກໍມີຫລາຍແລະ ເດັກນ້ອຍລາວ ເຫລົ່ານີ້ຫລາຍຄົນ ຕົກເປັນຍື່ອຂອງພວກຄ້າມະນຸດ. ພວກເຂົາຕ້ອງ​​ເສັຍເງິນ ຊື້ຈ້າງນາຍໜ້າ ຈຶ່ງໄດ້ມາເມືອງໄທແລະຍິງສາວລາວ ສ່ວນນຶ່ງ ກໍຖືກຫລອກລວງ ໃຫ້ເປັນໂສເພນີ.

ປັດຈຸບັນເຈົ້າໜ້າທີ່ ກະຊວງແຮງງານ ແລະ ສວັດດີການ ຂອງລາວ ກຳລັງພິສູດສັນຊາດຂອງຄົນງານລາວ ທີ່ເຂົ້າມາເຮັດວຽກ ຢ່າງຜິດກົດໝາຍຢູ່ໄທ. ​ໃນເມື່ອ ພິສູດຮູ້ ວ່າເປັນຄົນລາວແທ້ ທາງການລາວກໍຈະອອກໜັງສືຜ່ານແດນ ຊົ່ວຄາວ ໃຫ້ແລະທາງການໄທ ກໍຈະອອກ ໃບອະນຸຍາດ ເຮັດວຽກໃຫ້ຫລັງຈາກນນັ້ນ ຄົນງານລາວ ກໍຈະກາຍເປັນ ຄົນງານ ຢ່າງຖືກຕ້ອງ ຕາມກົດໝາຍຢູ່ໄທ.

ປັດຈຸບັນ ຄົນງານລາວຢູ່ໄທ ມີປະມານ ສາມແສນຄົນໃນນັ້ນ ພຽງແຕ່ປະມານ ສາມສີ່ໝື່ນຄົນ ເທົ່ານັ້ນ ຖືກຕ້ອງຕາມກົດໝາຍເຫລືອນັ້ນເປັນຄົນງານ ຜິດກົດໝາຍ ທັງນັ້ນ.


ຄໍາເຫັນ (0)
Share
ເຕັມຫນ້າ