ທ່ານທອງແດງສິງທິຣາດຮອງຫົວໜ້າ ກົມພັດທະນາ ສີມືແຮງງານແລະ ຈັດຫາງານກ່າວວ່າທາງກົມແຮງງານ ໄດ້ແນະນໍາ ເຈົ້າຂອງ ກິດຈະການ ຕ່າງໆ ໃຫ້ຈ້າງຄົນງານ ໃນລາວຕາມລະບຽບການຂອງກົດໝາຍ ແຮງງານລາວ ໄດ້ບົ່ງໄວ້, ແຕ່ເຂົາເຈົ້າ ກໍຕໍ່ລອງວ່າແມ່ນໃຜ ຈະຮັບຜິດຊອບ ຕໍ່ທຸຣະກິດຂອງເຂົາເຈົ້າ ຖ້າຫາກວ່າ ຂາດຄົນງານ ທີ່ມີຄວາມສາມາດ ໃນການເຮັດວຽກ ທີ່ມອບໝາຍໃຫ້.
ທ່ານວ່າເຣື້ອງນີ້ເຈົ້າໜ້າທີ່ລາວ ກໍຈໍາເປັນໄດ້ ປະປ່ອຍ ໃຫ້ບໍຣິສັດຫລື ທຸຣະກິດ ຕ່າງໆ ດໍາເນີນໄປຕາມຄວາມຕ້ອງການ ຂອງເຂົາເຈົ້າ ທັ້ງໆ ທີ່ມັນບໍ່ສອດຂ້ອງ ກັບລະບຽບ ກົດໝາຍ ແຮງງານ ຂອງລາວ. ກົດໝາຍ ແຮງງານລາວ ລະບຸວ່າຫົວນ່ວຍທຸຣະກິດ ຕ່າງໆ ມີສິດໃຊ້ ແຮງງານຕ່າງປະເທດໄດ້ ບໍ່ເກີນ 10% ຂອງຈໍານວນ ແຮງງານ ທັງໝົດ, ແຕ່ວ່າ ໃນພາກປະຕິບັດ ໂຕຈິງແລ້ວມີຫລາຍຫົວນ່ວຍທຸຣະກິດບໍ່ໄດ້ໃຊ້ ແຮງງານລາວ ແມ້ແຕ່ຄົນດຽວ.
ທ່ານທອງແດງສິງທິຣາດຍອມຮັບວ່າມີອົງການ ຕ່າງປະເທດ ຫລາຍແຫ່ງ ບໍ່ຕ້ອງການໃຊ້ແຮງງານລາວ ໂດຍອ້າງວ່າແຮງງານລາວ ບໍ່ໄດ້ ມາຕະຖານ ທີ່ເຂົາຕ້ອງການ. ຢູ່ລາວໃນປັດຈຸບັນນີ້ມີນັກສືກສາ ທີ່ຮຽນຈົບ ວິຊາສະເພາະ ດ້ານຄຸ້ມຄອງ ບໍຣິຫານ ທຸຣະກິດ ແລະ ເສຖສາດ ເປັນຈໍານວນຫລາຍ, ແຕ່ຍັງຂາດ ປະສົບປະການ. ຖ້າຫາກວ່າບໍຣິສັດ ທຸຣະກິດ ຕ່າງໆ ຕ້ອງການ ນັກວິຊາການ ທີ່ມີລະດັບສູງ ແດ່ນັ້ນ ແຕ່ລະ ບໍຣິສັດ ກໍຄວນ ມີໂຄງການເພື່ອໃຫ້ໂອກາດ ແກ່ນັກສືກສາ ທີ່ຮຽນຈົບໃໝ່ ໄດ້ເຂົ້າເຮັດວຽກ ເພື່ອເອົາປະສົບປະການ.
ຖ້າບໍ່ດັ່ງນັ້ນ ກໍຈະອ້າງ ແຕ່ວ່າຢູ່ລາວບໍ່ມີຄົນງານ ທີ່ມີສີມືແຮງງານສູງ ແລ້ວກໍ ຈະສືບຕໍ່ຈ້າງຄົນງານ ຕ່າງດ້າວ ຕລອດໄປ. ຖ້າຫາກທາງການລາວ ບໍ່ສາມາດ ແກ້ໄຂ ບັນຫານີ້ໄດ້ຈະເຮັດໃຫ້ ນັກສືກສາລາວ ທີ່ຮຽນຈົບໃໝ່ ໃນແຕ່ລະປີ ປະມານ 10,000 ກ່ວາຄົນບໍ່ມີວຽກເຮັດງານທໍາແລ້ວເຂົາເຈົ້າ ກໍຈະຊອກຫາທາງອອກໄປເຮັດວຽກ ຢູ່ໃນປະເທດ ເພື່ອນບ້ານ ມີຈ້າງແຮງງານລາວ ໃນຣາຄາຖືກແລະ ບໍ່ມີ ອະນາຄົດ.