ໂຄງການ ເຮັດວຽກ ຢູ່ໄທ ໄປເຊົ້າ-ແລງກັບ

ກົມແຮງງານໄທ ມີໂຄງການ ໃຫ້ແຮງງານລາວ ທີ່ອາໃສຢູ່ຕາມຊາຍແດນ ລາວ-ໄທ ສາມາດເຂົ້າໄປເຮັດວຽກ ໃນປະເທດໄທໄດ້ ແບບເຊົ້າໄປ-ແລງກັບ.
ຈໍາປາທອງ ຣາຍງານ
2008-09-30
ອີແມວລ໌
ຄໍາເຫັນ
Share
ພິມ

ເຈົ້າໜ້າທີ່ ກົມແຮງງານ ຂອງໄທ ​​ເປີດເຜີຍ ຢູ່ທີ່ບາງກອກ ປະເທດໄທ ເມື່ອວັນທີ 26 ກັນຍາ 2008 ນີ້ ວ່າ ປັດຈຸບັນ ທາງການໄທໄດ້ປະກາດ​ ຫລຸດຄ່າທໍານຽມ ຂໍວີຊາ ໃຫ້ແກ່ຄົນງານລາວ ຜູ້ທີ່ຕ້ອງການ ໄປເຮັດວຽກ ຢູ່ຝັ່ງໄທ ຢ່າງຖືກຕ້ອງຕາມກົດໝາຍ ຕາມບັນທຶກຄວາມເຂົ້າໃຈ MOU ວ່າດ້ວຍ ການຮ່ວມມື ດ້ານແຮງງານ ທີ່ທັງ 2 ປະເທດ ໄດ້ລົງນາມກັນ.

ຕາມການຕົກລົງ 2 ຝ່າຍ ລາວ-​ໄທ  ທາງການໄທ ຈະລຸດ ຄ່າທໍານຽມ ການຂໍວີຊາ ຂອງຄົນງານລາວ ຊຸດທໍາອິດ ຈໍານວນ 10 ພັນຄົນ ລົງໃຫ້ຍັງເຫລືອ ຄົນລະ 500 ບາດ.  ຫລັງຈາກນັ້ນ ກໍຈະເກັບຄ່າ ທໍານຽມໃນອັດຕຣາ ຄົນລະ 2 ພັນບາດ ເພື່ອເປັນການລຸດຄ່າ​ ​ໃຊ້ຈ່າຍ ໃຫ້ຄົນງານລາວ.

ແລະ ຂະນະນີ້ ທາງການໄທ ກໍກໍາລັງ ພິຈາຣະນາ ຫ​ລຸດຄ່າ ທໍານຽມ ເງິນກອງທຶນ ແຮງງານ ຕ່າງດ້າວ ອີກດ້ວຍ  ຊຶ່ງໃນປັດຈຸບັນນີ້ ມີການເກັບ ຈາກຄົນງານ ສປປລາວ ພຽງຄັ້ງດຽວ ໃນອັດຕຣາ ຄົນລະ 2,170ບາດ  ແລະຈະໄດ້ສົ່ງເງິນຈໍານວນນັ້ນ ໃຫ້ຜູ້ກ່ຽວຄືນ ພາຍຫລັງ ທີ່ໄດ້ເຮັດວຽກຄົບ ກໍານົດ ຕາມການສັນຍາ ກັນໄວ້.

ພ້ອມກັນນັ້ນ ແຫລ່ງຂ່າວລາຍດຽວກັນນີ້ ຍັງບອກໃຫ້ຮູ້ຕື່ມ ອີກວ່າ ນອກຈາກນັ້ນ ກົມແຮງງານ ຂອງໄທ ຍັງມີໂຄງການ ໃຫ້ແຮງງານລາວ ທີ່ອາໃສ ຢູ່ຕາມ ບໍລິເວນ ຊາຍແດນ ລາວ-​​ໄທ ສາມາດ ເຂົ້າໄປເຮັດວຽກ ໃນປະເທດ​​ໄທ ໃນຕອນເຊົ້າ ແລະເດີນທາງກັບສປປລາວ ໃນຕອນບ່າຍ ໂດຍທີ່ຄົນງານລາວ ຈະຕ້ອງໄດ້​​ແຈ້ງໜັງສືຜ່ານແດນ ແລະ ຂໍອະນຸຍາດ ເຮັດວຽກ ຊຶ່ງຂະນະນີ້ ເຈົ້າໜ້າທີ່ທີ່ກ່ຽວຂ້ອງ ກໍາລັງພິຈາລະນາ ລາຍລະອຽດຢູ່ ຄາດວ່າ ຈະປະກາດ​ ​ໃຊ້ເປັນກົດລະບຽບ ໃນມໍ່ໆນີ້.


ເຕັມຫນ້າ