ຄົນງານລາວຖືກ ນາຍຈ້າງໄທ ຖິ້ມໄວ້ຂ້າງຖນົນ

ຄົນງານຍິງລາວ ຖືກນາຍຈ້າງໄທ ປະຖິ້ມໄວ້ ຂ້າງຖນົນ ຢ່າງໄຮ້ ມະນຸສທັມ.
ໂພໄຊສວັດ
2010-05-11
ອີແມວລ໌
ຄໍາເຫັນ
Share
ພິມ

ຄົນງານຍິງລາວ ສອງເອື້ອຍນ້ອງ ຖືກປະຖິ້ມຢູ່ ຂ້າງຖນົນ ເມືອງພັທຍາ ປະເທດໄທ ໃນມື້ວັນຈັນທີ 10 ພຶສພາ 2010 ນີ້. ທັງສອງຄົນເຊື່ອວ່າ ເປັນຄົນງານທີ່ ບໍ່ຖືກຕ້ອງຕາມ ກົດໝາຍ ແລະ ໄດ້ເຮັດວຽກໃຫ້ ນາຍຈ້າງຄົນໄທ ໂດຍບໍ່ມີຄ່າຈ້າງ ກ່ອນທີ່ຈະເອົາ ພວກຂະເຈົ້າໄປ ຖິ້ມໄວ້ ໃນເຂດນາເກືອ. ຕາມລາຍງານຂ່າວ ຂອງ ພັທຍາລາຍວັນ ມື້ວັນທີ 10 ພຶສພາ 2010.

ເຈົ້າໜ້າທີ່ຕຳຣວດ ໄດ້ພົບຜູ້ຍິງລາວ ສອງຄົນຢູ່ຂ້າງ ຖນົນ ສຸກຂຸມວິດ ເມືອງພັທຍາ ຢູ່ໃນສະພາບ ເສົ້າໂສກແລະໄດ້ ຮັບຄວາມລຳບາກ. ເມື່ອພົບພໍ້ ເຈົ້າໜ້າທີ່ຕຳຣວດ ຜູ້ເອື້ອຍ ຊື່ນາງນົກ ອາຍຸ 16 ປີຜູ້ນ້ອງ ນາງຂຽວອາຍຸ 14 ປີ ພາກັນຮ້ອງໃຫ້ ທັງຈົ່ມວ່າຢາກ ກັບບ້ານເກີດເມືອງນອນ ສປປລາວ. ນາງນົກ ເປີດເຜີຍວ່າ ພວກຕົນໄດ້ ຖືກນຳມາຖິ້ມໄວ້ ໃນເຂດນາເກືອ ຫລັງຈາກທີ່ເຮັດ ວຽກເປັນແມ່ບ້ານ ໃຫ້ນາຍຈ້າງຄົນໄທ ໄດ້ລະຍະນຶ່ງ ແຕ່ບໍ່ໄດ້ຮັບ ຄ່າຈ້າງເລີຍ ແລະເມື່ອນາຍຈ້າງ ບໍ່ຕ້ອງການຈຶ່ງ ໄດ້ນຳພວກຕົນ ມາຖິ້ມປະໄວ້ ໃນສະຖານທີ່ ດັ່ງກ່າວ.

ນາງໄດ້ໃຫ້ການ ກັບເຈົ້າໜ້າທີ່ ຕຳຣວດຕື່ມອີກ ວ່າ ພວກຕົນໄດ້ຢູ່ ໃນໄທຢ່າງຜິດ ກົດໝາຍຫລັງຈາກ ທີ່ໄດ້ຂ້າມມາ ຫາວຽກການເຮັດກັບ ໝູ່ເພື່ອນອີກ ປະມານ 60 ຄົນ. ການລັກເຂົ້າມາ ແມ່ນຜ່ານເຄືອຂ່າຍ ການຄ້າມະນຸດ ທີ່ໄດ້ຫາວຽກ ໃຫ້ເປັນແມ່ບ້ານ ຂອງຊາຍໄທ ແຫ່ງນຶ່ງແຕ່ບໍ່ ສາມາດເປີດເຜີຍ ສະຖານທີ່ໄດ້.

ພວກຂະເຈົ້າໄດ້ ເຮັດວຽກໃຫ້ນາຍຈ້າງໄທ ປະມານສອງເດືອນ ໂດຍບໍ່ມີຄ່າຈ້າງ ແລະເມື່ອນາຍຈ້າງ ບໍ່ຕ້ອງການຄົນ ເຮັດວຽກອີກ ຈຶ່ງໄດ້ເອົາມາ ຖິ້ມໄວ້ໃນຕອນ 2 ໂມງເຊົ້າ ວັນຈັນນີ້.

ເຈົ້າໜ້າທີ່ຕຳຣວດ ໄດ້ພາທັງສອງຄົນ ໄປສະຖານີ ຕຳຣວດ ບັງລະມັງ ເພື່ອສືບສວນ ແລະບັນທຶກໃນ ລາຍງານເປັນຄົນ ເຂົ້າເມືອງຜິດກົດໝາຍ ກ່ອນທີ່ຈະສົ່ງກັບ ສປປລາວ.

ເຕັມຫນ້າ