ທາງການເຕືອນ ນໍ້າອາຈລົ້ນຝັ່ງ

ປະຊາຊົນ ໃນແຂວງ ພາກເໜືອ ແລະ ພາກກາງ ຄວນຣະວັງ ເຣື້ອງນໍ້າປ່າ, ນໍ້າຖ້ວມ ກະທັນຫັນ, ຊຶ່ງອາຈ ສົ່ງຜົລ ກະທົບ ຕໍ່ພື້ນທີ່ ກະສິກັມ ແລະ ສັດລ້ຽງໄດ້, ໃນຂະນະທີ່ ເກີດມີ ຝົນຕົກ ຢ່າງຕໍ່ເນື່ອງ. ອີງຕາມ ຄໍາເຕືອນ ຂອງ ເຈົ້າໜ້າທີ່ ກົມ ອຸຕຸນິຍົມ ແລະ ອຸທະກະສາດ.

ສະພາບ ອາກາດ ຂອງ ປະເທດລາວ ໃນຕອນນີ້ ມີຝົນຕົກ ໃນຂອບເຂດ ກວ້າງຂວາງ ແລະ ຕົກ ຢ່າງຕໍ່ເນື່ອງ ເຮັດໃຫ້ ປະຣິມານ ນໍ້າ ໃນແມ່ນໍ້າ ສາຍຕ່າງໆ ເພີ້ມ ສູງຂຶ້ນ, ໂດຍສະເພາະ ຢ່າງຍິ່ງ ແຂວງພາກເໜືອ ແລະ ພາກກາງ. ນໍ້າໃນແມ່ນໍ້າ ອາຈຈະສູງ ແລະ ຍື່ງຂຶ້ນ ຖ້ວມບ້ານເຮືອນ ແລະ ພື້ນທີ່ ກະສິກັມ ຂອງ ປະຊາຊົນ ທີ່ຢູ່ ແຄມແມ່ນໍ້າ. ດັ່ງນັ້ນ ເຈົ້າໜ້າທີ່ ຈຶ່ງໄດ້ ແຈ້ງເຕືອນ ປະຊາຊົນ ໃຫ້ຣະມັດ ຣະວັງ ເຣື້ອງນີ້ ເປັນພິເສດ. ຖ້າຫາກວ່າ ມີຝົນຕົກ ຢ່າງຕໍ່ເນື່ອງ ແລະ ຍາວນານນັ້ນ ໃຫ້ຣະມັດ ຣະວັງ ຣະດັບນໍ້າ ແລະ ໃຫ້ໂຍກຍ້າຍ ຄອບຄົວ, ຮວມເຖິງ ສັດລ້ຽງ ຂຶ້ນໄປໄວ້ ໃນບໍຣິເວນ ທີ່ສູງ ເພື່ອຄວາມ ປອດພັຍ ຂອງຕົວເອງ ແລະ ສັດລ້ຽງ. ເຈົ້າໜ້າທີ່ ທີ່ກ່ຽວຂອງ ກ່າວວ່າ:

”ຕາມ ປົກກະຕິ ຣະດູຝົນ ຢູ່ ປະເທດລາວ ກໍຮອດ ກາງເດືອນ 10 ເນາະ, ດຽວນີ້ ເຣີ້ມ ຈະເຂົ້າ ຢູ່ໃນ ກາງ ຣະດຸຝົນ ແລ້ວ, ເຮັດໃຫ້ ມີຝົນຕົກ ເປັນ ບໍຣິເວນກວ້າງ ຢູ່ຫລາຍ ແຂວງເນາະ, ມີຜົລກະທົບ ຕໍ່ ກະສິກັມ ຕໍ່ສັດລ້ຽງ, ສົມບັດ ຂອງ ພໍ່ແມ່ ປະຊາຊົນ ຕໍ່ສັດລ້ຽງ ອາຈຊິມີ.”

ຈາກການ ພະຍາກອນ ແລະ ການຮວບຮວມ ສະຖິຕິ ຂອງກົມ ອຸຕຸນິຍົມ ພົບວ່າ ຊ່ວງທ້າຍເດືອນ 7 ຫາ ເດືອນ 8, ຈະເປັນຊ່ວງ ທີ່ ປະເທດລາວ ມີຝົນຕົກ ຫລາຍທີ່ສຸດ ແລະ ມີຄວາມສ່ຽງ ທີ່ຈະເກີດ ນໍ້າຖ້ວມ ກະທັນຫັນ ຫລາຍທີ່ສຸດ. ອຸນຫະພູມ ຈະຢູ່ໃນ ຣະຫວ່າງ 22-33 ອົງສາ ແຊ໋ວເຊິສ, ມີຝົນຕົກ, ຟ້າຄະນອງ, ລົມແຮງ ກະຈາຍ ແລະ ອາຈມີ ຝົນຕົກໜັກ ບາງພື້ນທີ່.

ເມື່ອທ້າຍເດືອນ ມິຖຸນາ ຜ່ານມາ ປະເທດລາວ ປະສົບກັບ ພັຍພິບັດ ນໍ້າຖ້ວມ ຄັ້ງຮຸນແຮງ ພາຍຫລັງ ທີ່ພະຍຸ ໄຮ່ມ໋າ ພັດຜ່ານ ຫລາຍແຂວງ ໃນພາກເໜືອ ແລະ ພາກກາງ, ເຮັດໃຫ້ ມີຜູ້ ເສັຍຊີວິດ 10 ກ່ວາຄົນ, ສ້າງຄວາມ ເສັຍຫາຍ ໃຫ້ແກ່ ອາຄານບ້ານເຮືອນ ແລະ ພື້ນທີ່ ການກະເສດ ຢ່າງກວ້າງຂວາງ, ຊຶ່ງສ່ວນນຶ່ງ ມາຈາກ ການແຈ້ງເຕືອນ ບໍ່ທົ່ວເຖິງ ເທົ່າທີ່ຄວນ, ຈຶ່ງເຮັດໃຫ້ ມີ ຊາວບ້ານ ບາງຄົນ ບໍ່ຮູ້, ຈຶ່ງບໍ່ ສາມາດ ຫລົບໜີ ໄດ້ທັນ.