ການສວຍໃຊ້ຊັພສິນ ຂອງຣັດ

ກອງປະຊຸມ ຄນະບໍຣິຫານພັກ ນະຄອນຫລວງ ວຽງຈັນ ຄັ້ງທີ 4 ສມັຍທີ 5 ຜ່ານມານີ້ ໂດຍການ ເປັນປະທານ ຂອງ ທ່ານ ສຸກັນ ມະຫາຣາດ ເລຂາທິການ ສູນກາງພັກ ເຈົ້າຄອງ ກຳແພງ ນະຄອນຫລວງ ວຽງຈັນ ໄດ້ຮັບລາຍງານ ກ່ຽວກັບ ການສວຍໃຊ້ ສໍ້ໂກງ ຊັພສີນ ຂອງຣັຖ ເກີດຂື້ນ ຢ່າງຫລວງຫລາຍ ທ່ານ ສົມວັນດີ ນາຖາວົງ ຮອງ ເຈົ້າຄອງ ກຳແພງ ນະຄອນຫລວງ ວຽງຈັນ ໄດ້ລາຍງານ ກ່ຽວກັບ ປະເດັນ ດັ່ງກ່າວວ່າ ໃນຣະຍະ ທີ່ຜ່ານມາ ເຖິງແມ່ນວ່າ ຄນະພັກ ໄດ້ເອົາໃຈໃສ່ ໃນການປົກປ້ອງ ແລະຕ້ານການ ສໍ້ຣາສ ບັງຫລວງ ຫລາຍປານໃດ ກໍຕາມ ແຕ່ບັນຫາ ດັ່ງກ່າວ ຍັງແຜ່ລາມ ຫລາຍຢູ່.

ຈາກການກວດກາ ພົບວ່າ ພນັກງານ ການເງີນ ຂອງຣັຖ ໄດ້ຍັກຍອກ ເງີນຣັຖເຖິງ 2 ຕື້ ກວ່າກີບ ສວຍໃຊ້ ຍວດຍານ ພາຫະນະ ຂອງຣັຖ ໃຊ້ຕຳແຫນ່ງ ຫນ້າທີ່ ໃນການຮັບ ສີນບົນ ລັກລອບ ປອມແປງ ເອກສານ ໃນໂຄງການ ສໍາປະທານ ຂອງຣັຖບານ ຮວມທັງການ ລັກລອບ ຂຸດຄົ້ນຄຳ ທີ່ ເມືອງສັງທອງ ສ້າງຄວາມ ເສັຽຫາຍ ໃຫ້ແກ່ ຣັຖບານ ເຖີງ 6 ຕື້ ກີບ ນອກນັ້ນຍັງມີ 82 ບໍຣິສັດ ເອກກະຊົນ ບໍ່ເສັຽຄ່າ ອາກອນ ແລະ ພັນທະ ໃຫ້ຣັຖ. ການອອກ ໃບຕາດີນ ຊ້ຳຊ້ອນ ແລະ ບໍ່ຖືກຕ້ອງ ການຫັນປ່ຽນ ທີ່ດີນ ປະຊາຊົນ ມາເປັນ ທີ່ດີນຂອງຣັຖ. ໃນໂຄງການ ຂອງຣັຖບານ ກໍຂາດຄວາມ ເປັນທັມ ເພາະຈ່າຍຄ່າ ຊົດເຊີຍ ໃຫ້ ປະຊາຊົນ ບໍ່ພຽງພໍ. ການນຳຣົຖຍົນ ເຂົ້າປະເທດ ແບບບໍ່ເສັຽພາສີ ຍ້ອນໃຊ້ພັກພວກ ແລະ ເສັ້ນສາຍ.