ເປົ້າໝາຍຂອງອາຊ໊ຽນ ຄືເສຖກິຈເຕີບໃຫຍ່

ກະຊວງການຄ້າ ກັມພູຊາ ຖແລງວ່າ ນາຍົກຣັຖມົນຕຣີ ກັມພູຊາ ທ່ານ ຮຸນເຊນ ຈະເປັນເຈົ້າພາບ ຈັດກອງປະຊຸມ ສຸດຍອດ ຣັຖມົນຕຣີ ເສຖກິດອາຊ໊ຽນ ຄັ້ງທີ 44 ຂື້ນ ໃນວັນທີ 27 ສິງຫາ 2012 ນີ້ ທີ່ແຂວງສຽມຣຽບ ສູນກາງ ວັທນະທັມ ແລະ ຄວາມສີວິໄລ ຂອງຂະແມ ຈົນຮອດວັນທີ 1 ກັນຍາ.

ໃນກອງປະຊຸມ ຈະມີການ ໂອ້ລົມກັນ ໃນຫລາຍບັນຫາ ກ່ຽວກັບ ການຄ້າເສຣີ ແລະ ຄວາມຮ່ວມມື ທາງດ້ານ ເສຖກິດ ຂອງສະມາຊິກ 10 ປະເທດອາຊ໊ຽນ ໂດຍສະເພາະ ເຣື້ອງ ການເຕີບໃຫຍ່ ຂອງເສຖກິດ.

ການໂອ້ລົມຄັ້ງນີ້ ຈະຮວ່ມດ້ວຍ ຈີນ ເກົາຫລີໃຕ້ ຍີ່ປຸ່ນ ອອສເຕຣເລັຽ ນິວຊີແລນ ອິນເດັຍ ສະຫະຣັຖ ອະເມຣິກາ ການາດາ ແລະ ຣັຖເຊັຽ ຄູ່ຮ່ວມ ການຄ້າອາຊ໊ຽນ. ຣັຖມົນຕຣີ ເສຖກິດ ກັມພູຊາ ທ່ານ ຈາມ ປາສິດ ກ່າວຕໍ່ຫນັງສືພີມ ພະນົມເປັນໂປສ ນອກກອງປະຊຸມ ເສຖກິດອາຊ້ຽນ ຄັ້ງທີ 7 ໃນເດືອນມີນາ ຜ່ານມາວ່າ ກັມພູຊາ ໃນນາມ ເປັນເຈົ້າພາບ ຈະຊຸກຍູ້ແຜນການ ຮ່ວມມື ການເຕີບໃຫຍ່ ທາງດ້ານ ເສຖກີດ ໃນຂົງເຂດ ເພື່ອລົບລ້າງ ຄວາມແຕກໂຕນ ຂອງການພັທນາ ຣະຫວ່າງ ປະເທດສະມາຊິກ ໃນການເປັນ ເຈົ້າພາບ ໃນປີນີ້.

ທ່ານວ່າ ສະມາຊິກ ເກົ່າແກ່ ຂອງອາຊ໊ຽນ ເຊັ່ນ ສິງກະໂປ ແລະ ມາເລເຊັຽ ມີການພັທນາ ວ່ອງໄວກວ່າ ຖ້າທຽບໃສ່ ປະເທດສະມາຊິກ ໃຫມ່ເຊັ່ນ ກັມພູຊາ ສປປລາວ ວຽດນາມ ແລະ ພະມ້າ. ດ່ັງນັ້ນ ເພື່ອເຮັດໃຫ້ ອາຊ໊ຽນ ສາມາດເຂົ້າຮ່ວມ ກຸ່ມກັນໄດ້ ຢ່າງມີ ປະສິດທິພາບ ໃນປີ 2015 ກັມພູຊາ ຈະພຍາຍາມ ຊຸກຍຸູ້ໃຫ້ ຄວາມແຕກໂຕນ ນັ້ນຫລຸດນ້ອຍລົງ.