ຄວາມສຳຄັນຂອງ ການປົກປ້ອງ ແມ່ນ້ຳຂອງຮ່ວມກັນ

ການປ່ຽນແປງດິນຟ້າອາກາດ ແລະການສ້າງເຂື່ອນໄຟຟ້າ ໃນແມ່ນ້ຳຂອງ ເປັນໄພຂົ່ມຂູ່ ຢູ່ເຂດແມ່ນ້ຳຂອງຕອນລຸ່ມ ແລະຍັງສ້າງຜົລກະທົບຕໍ່ເສຖກິຈ, ລະບົບນິເວດ, ຄວາມຍືນຍົງ ແລະ ການດຳລົງຊີວິດ ຂອງປະຊາຊົນ ຫຼາຍກວ່າ 60 ລ້ານຄົນ. ຄະນະກັມມາທິການ ແມ່ນ້ຳຂອງສາກົລ ຫຼື MRC ໄດ້ຈັດກອງປະຊຸມສຸດຍອດ ຄັ້ງທີ 4 ຂຶ້ນ ໃນລະຫວ່າງວັນທີ 2-5 ເມສາ 2023 ທີ່ຜ່ານມາ ຢູ່ຫໍປະຊຸມແຫ່ງຊາຕ ນະຄອນຫຼວງວຽງຈັນ ເພື່ອປືກສາຫາລື ບັນຫາການປ່ຽນແປງ ດິນຟ້າອາກາດ ທີ່ນັບມື້ຈະຮຸນແຮງຂຶ້ນ ເຊິ່ງມີຄວາມສ່ຽງ ທີ່ຈະສົ່ງຜົລກະທົບ ຕໍ່ເສຖກິຈ ລະບົບນິເວດ, ຄວາມຍືນຍົງ ຂອງບັນດາປະເທດ ລຸ່ມນ້ຳຂອງ ຄື ກັມພູຊາ, ໄທຍ, ວຽດນາມ ແລະ ລາວ.