ວີດີໂອ

ຄຳຕັດສິນ ຄະດີຟ້ອງຮ້ອງ ການຊື້ໄຟຟ້າ ຈາກເຂື່ອນໄຊຍະບູຣີ

2022-08-17

ໃນທີ່ສຸດ ການລໍຄອຍຜົນຄຳຕັດສິນ ເປັນເວລາກວ່າ 10 ປີ ຂອງຊາວໄທຍອີສານ ລຸ່ມແມ່ນ້ຳຂອງ ທີ່ໄດ້ຮັບຜົນກະທົບ ຈາກເຂື່ອນໄຊຍະບູຣີ ກໍຈົບລົງດ້ວຍຄວາມຜິດຫວັງ, ຫຼັງຈາກທີ່ສານປົກຄອງສູງສຸດ ໄດ້ຕັດສິນ ໃຫ້ຍົກຟ້ອງ ຄະດີດັ່ງກ່າວແລ້ວ ໃນຕອນເຊົ້າຂອງວັນທີ 17 ສິງຫາ ຢູ່ສານປົກຄອງ ທີ່ນະຄອນຫລວງ ບາງກອກ ປະເທດໄທຍ ເນື່ອງຈາກວ່າ 5 ໜ່ວຍງານຂອງຣັຖບານໄທຍ ທີ່ເປັນຜູ້ຖືກເຄືອຍຂ່າຍ ປະຊາຊົນ 8 ແຂວງລຸ່ມແມ່ນ້ຳຂອງ ຟ້ອງຮ້ອງກ່ຽວກັບການຊື້ໄຟຟ້າ ຈາກເຂື່ອນດັ່ງກ່າວນັ້ນ ໄດ້ປະຕິບັດຕາມລະບຽບທຸກຂັ້ນຕອນ. ໄດ້ຈັດທຳຂະບວນການ ປຶກສາຫາລືລ່ວງໜ້າ ຫຼື Procedures for Notification, Prior Consultation and Agreement (PNPCA) ແລ້ວ 3 ຄັ້ງ ແລະບໍ່ມີໜ້າທີ່ໃນການປະເມີນຜົລກະທົບ ຈາກການຊື້-ຂາຍໄຟຟ້າ. ສັນຍາການຊື້-ຂາຍໄຟຟ້າ ຈາກເຂື່ອນໄຊຍະບູຣີ ບໍ່ປາກົດຜົລກະທົບ ຢ່າງຈະແຈ້ງວ່າ ສົ່ງຜົລກະທົບໂດຍຕຣົງ ຕໍ່ສິ່ງແວດລ້ອມ ຈຶ່ງເຫັນວ່າ ຜູ້ຟ້ອງບໍ່ສາມາດຟ້ອງຮ້ອງໄດ້.