ຊາວຈີນໃນສະຫະຣັຖ ປະທ້ວງຢູ່ຕໍ່ໜ້າສະຖານທູດລາວ ທີ່ນະຄອນຫຼວງ ວໍຊິງຕັນ ດີ.ຊີ.

ເມື່ອວັນທີ 2 ສິງຫາ 2023, ຊາວຈີນ ໃນຕ່າງປະເທດ ຮ່ວມກັນປະທ້ວງ ຢູ່ຕໍ່ໜ້າສະຖານທູຕລາວ ໃນນະຄອນຫຼວງວໍ່ຊິງຕັ່ນ ດີຊີ, ສະຫະຣັຖອາເມຣິກາ ເພື່ອຮຽກຮ້ອງໃຫ້ປ່ອຍໂຕທ່ານ ລູ໋ ຊີ່ເຫວີຍ ຜູ້ເປັນທະນາຍຄວາມ ດ້ານສິດທິມະນຸສ ຊາວຈີນ ທີ່ຖືກຈັບໃນປະເທດລາວ ເມື່ອວັນທີ 28 ກໍຣະກະດາ 2023 ທີ່ຜ່ານມາ. ຄະນະຜູ້ປະທ້ວງດັ່ງກ່າວ ສະແດງເຈດຈຳນົງ ຂອງພວກເຂົາ ໃນການຕໍ່ຕ້ານ ຄວາມເປັນໄປໄດ້ ທີ່ຈະມີການສົ່ງໂຕທ່ານ ລູ໋ ກັບໄປຍັງປະເທດຈີນ ດ້ວຍຝີມື ຂອງຣັຖບານລາວ ພາຍໃຕ້ການຕາມລ່າ ແບບຂ້າມປະເທດ ຂອງພັກຄອມມູນິສຈີນ ພ້ອມທັງຮຽກຮ້ອງ ໃຫ້ປ່ອຍໂຕທ່ານ ລູ໋ ແລະ ອະນຸຍາດໃຫ້ທ່ານ ກັບຄືນໄປຫາຄອບຄົວ.