Мисир вәзийитиниң арқа көрүнүши

Мисирда әйни вақитта икки хил намайиш йүз бәрмәктә. Бири мисир президенти доктор муһәммәд мурсини тәхттин чүшүримиз дәйдиғанлар ниң, йәнә бири уни қоллап-қуввәтләйдиғанларниң намайишидур.
Ихтиярий мухбиримиз өмәрҗан
2012-11-29
Share
misir-namayish-mursi-qanuni-305.jpg Он миңлиған намайишчилар мисирниң чоң байрақлирини көтүрүп президент муһәммәд мурсиниң елан қилған қануниға наразилиқ билдүрди. 2012-Йили 27-ноябир.
AFP

Чүнки мисирда йеңи дөләт қануни елан қилинғандин кейин, бу қанун көплигән солчи партийиләргә вә сабиқ рәис мубарәкниң дәвридә һакимийәттә турғанларниң яндашлириға яқмиған. Шу сәвәбтин улар мисирда һөкүмәткә қарши омумйүзлүк намайиш уюштурған. Әмма булар мурсини қоллайдиғанларниң өзлиридин көп икәнликини һесабқа қатмиған. Нәтиҗидә, мурсини қоллап намайиш қилғанларниң сани униңға қарши намайиш қилғанларниң санидин көп болуп кетип, нәтиҗә улар күткәндәк чиқмастин, әксичә, хәлқниң мурси һөкүмитигә болған ишәнчи ашқан.

Лондонда чиқидиған «оттура шәрқ» гезитиниң 2012-йили 26-ноябир санида, язғучи тариқ һәмидниң қәлими билән «мисирдики кризис» дегән темида бир мақалә елан қилинған болуп, униңда мундақ дәп йезилған:
«Мисир әрәб җумһурийитиниң президенти доктор муһәммәд мурсиниң йеңи дөләт қанунини елан қилиши мисирда вәқә туғдуруш үчүн пурсәт күтуп ятқан солчиларни һәрикәткә кәлтүрди. Әмма улар һәммиси ойлап бақмиған бир күч тәрипидин йеңилди вә уларниң қилған намайиши зийиниға болуп чиқти. Бу күч мисир хәлқиниң күчи иди. Чүнки мурсиниң һөкүмитигә қарши чиққучилар асасән солчилар, мубарәк һөкүмитиниң қалдуқлири вә мурсиниң тәһдитигә учриған капиталистлардур. Әмма хәлқ омумән мурси һөкүмитини қоллайду. Доктор мурси наһайити ақиланә сиясәт қолланған болуп, тунҗи қарарида сабиқ рәис мубарәк һөкүмитиниң қалдуқлирини җазалаш вә демократийини капаләтләндүрүшни сөзлигән иди. Бу қарар 25-январ намайишиға қатнашқанларни зиянға учратқанлар үчүн матәм болса, мисирдики хәлқ аммиси үчүн байрам болған иди. Ахирида солчилар, мубарәк яндашлири вә капиталистлар бирлишип мурси һөкүмитигә қарши турған болсиму, улар ғәлибә қилалмиди вә нөвәттики җәңдә йеңилди.»

Мисир түзәлсә әрәб дөләтлири түзилиду

Сәуди әрәбистанида чиқидиған «әл мәдинә» гезитиниң 2012-йили 27-ноябир күнидики санида «мисир түзәлсә әрәб дөләтлири түзилиду» дегән темида бир мақалә елан қилинған болуп, униңда мундақ дәп йезилған:
«Мисир әрәб вә ислам дунясиға биваситә тәсир көрситидиған истратегийилик дөләт. Әрәбләрниң әһвали түзәлсиму мисирдин түзүлиду, бузулсиму мисирдин бузулиду. Әрәб баһарини нәтиҗисиз қалдурмақчи болғанлар буни яхши билгәнликтин, мисирға көпрәк хирис қилмақта. Әмма мисир һөкүмити һәммә ишни һекмәт вә ақиланилик билән елип бармақта. Мисирдики талаш-тартиш ялғуз мисирниңла мушкилиси болуп қалмастин, пүтүн әрәбләрниң мушкилиси болмақта. Чүнки мисирда демократик мусулман дөлити давам қилмақта. Буни бурмилап хәлқни қозғимақчи болғанлар мурсиниң һөкүмитини иран һөкүмитигә охшитип хәлқни униңдин совутушқа урунмақта. Әмма әмәлийәттә бу иккисиниң оттурисида асман-земин пәрқи бар. Ирандикиси дин дөлити, әмма мисирдикиси демократик мусулман дөлити.»

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.