Нобел тинчлиқ мукапати немә үчүн шәрқий түркистанлиқларға берилмәйду?

Японийилик хитай ишлири мутәхәссиси һигаши и таро өзиниң «хитайға қараң» тор бетидә 10-айниң 14-күни «нобел тинчлиқ мукапати немә үчүн шәрқий түркистанлиқларға берилмәйду?» сәрләвһилик мақалисини елан қилған.
Ихтиярий мухбиримиз һаҗи қутлуқ қадири
2012-10-16
Share
rabiye-muxbirlar-nobel-yighinida-2010-305 Рабийә қадир ханим 2010 - йиллиқ нобел тинчлиқ мукапатини тарқитиш мурасимида мухбирларниң соаллириға җаваб бәрмәктә
RFA/Aygul Yusup

Мәзкур мақалидә мундақ дейилгән:
«Мана бүгүн дуня төт көз билән күтүп туруватқан нобел тинчлиқ мукапатиниң саһиби елан қилинди. Бу саһиб дәл явропа бирлики болди. Нобел тинчлиқ мукапати явропа бирликиниң явропада иқтисадий кризисни яратқандин ибарәт улуғ төһписигә берилдиму вә яки бу кризистин қутулушиға ярдәм бериш мәқситидә иқтисадий ианә сүпитидә берилдиму? буниси маңа аян әмәс. Әгәр нобел тинчлиқ мукапатини баһалиғучи нан қепилирини учритип қалған болсам, яқисидин тутуп туруп, иккини силкип нобел тинчлиқ мукапати кимләргә берилиши керәк? буни биләмсән әбләхләр! дәп варқирап уйқусини ечип қояттим. Әпсус буни қилиш маңа несип болмиди. Әгәр шундақ пурсәт яр бәрсә, буни һәргиз қолдин бәрмәймән. Чүнки, мән америкилиқлар ейтқандәк қолида гүл тутуп туруп адәм уралайдиған самурай әвлади.»

У мақалисини давамлаштуруп мундақ баян қилиду:
«Йеқинқи бир нәччә йилдин буян бу мукапат бир қанчилиған нәзирийичи мәддаһларға берилди. японийиниң уруш йиллирида урушқа қатнашқан барлиқ җәңчиләргә хан ордиси тәрипидин совға қилинип берилидиған қол саити болидиған. Бу қол саити урушта мәйдисигә оқ йегәнгиму,арқисиға оқ йегәнгиму берилидиған һәдийә иди. Һазирқи нобел тинчлиқ мукапати дәл шу заманлардики хан ордиси мукапатиға охшап қалдиму қандақ?»

Һигаши и таро мақалини давамлаштуруп, йәнә мундақ баян қилиду:
«Әслидә нобел тинчлиқ мукапати инсанийәткә тинчлиқ елип келишкә тиришиватқан вә инсанийәт тинчлиқиға бузғунчилиқ қиливатқан мустәбит һөкүмранларға от ачқан қәһриман-батурларға берилиши керәк идиғу! әҗәба бу мукапат ойлимиған кишиләргә вә орунсиз орунларға берилмәктә. Әгәр мукапат һеқиқи берилиш тоғра кәлсә, дәл аримиздики рабийә қадирдәк барлиқини хәлқигә, вәтинигә, инсанийәткә ата қилған, 11 пәрзәнтниң анисиға, инсанийәтниң тинчлиқиға бузғунчилиқ қиливатқан хитай коммунистлириға коллектип қаршилиқ билдүрүп, коллектип өлтүрүлгән 5-июл уйғур ирқий қирғинчилиқидики уйғур қәһриманларға берилиши керәк идиғу! 21-әсирдә қайси бир қитә вә қайси бир дөләттә уйғурдәк милләт, мустәбит хитай коммунист һакимийитидәк, иқтисадий вә һәрбий күчи гүлләнгән, күчлүк бир һакимийәткә қарши җәң елан қилип, көкрикини кирип, өзини оққа тутуп намайиш елип баралиди?қайси бир милйонер рабийә қадирдәк байлиқини, әркинликини һөрлүккә тегишип,хитай түрмилиридә яталиди? әмма дуняда һәқиқәт дегән сөз классик китаб, луғәтләрдила йезип қалдурулған, әмәлийләшмигән вә шундақла аллиқачан йәрликигә дәпнә қилинған сөздинла ибарәт икән, дәпму ойлап қалимән. 2009-Йилидики 5-июл уйғур ирқий қирғинчилиқи йүз берип мана һазир үч йил болди. Шу намайишта хитай әскәрлири тәрипидин түркүм-түркүмләп өлтүрүлгән яшларға вә шу намайиш түпәйлидин қолға елинип, хитай түрмисидә иңраватқан уйғур мәһбусларға хәлқара җәмийәт илһам бериш, мәдәт бериш вә өлгәнләрни әсләш, қалғанларни риғбәтләндүрүш йүзисидин болсиму, нобел тинчлиқ мукапати шу бичарә шәрқий түркистанлиқ уйғурларға вә яки уларниң рәһбири рабийә қадирға берилиши керәк иди. Әгәр, биз тарихни варақлайдиған болсақ, инсанийәтниң йеқинқи заман тарихида өз әркинлики үчүн вә бәрбат болған җумһурийитини әслигә кәлтүрүш үчүн шәрқий түркистанлиқ уйғурлардәк қан бәдәл төлигән иккинчи бир милләт йоқтур.»

Һигаши и таро мақалисиниң ахирини мундақ ахирлаштуриду.
«Мән йеқиндила токйо университетида америкилиқ ислам диний мухлиси шәйх йүсүф естесниң һәқиқәткә сәпәр намлиқ лексийисидә шималий явропадики инсанларниң етиқадтин йирақлишип динсизлиқни тәрғиб қиливатқанлиқини аңлидим. Инсан тәңридин йирақлашқанда, һәқиқәттинму йирақлишамду қандақ? нобел тинчлиқ мукапати комитетидики ханимлар, әпәндиләрниң һәқиқәтни тепиши вә униңға йеқинлишиши үчүн көпрәк инҗил оқушиға тоғра келидиғандәк туриду.»

У ахирида мундақ деди:
«Сәвр қилип туруңлар, шәрқий түркистанлиқ уйғурлар! улуғ тәңрим силәргә нобел тинчлиқ мукапатинила әмәс, бәлким тинч шәрқий түркистан җумһурийитиңларни бериши мумкин!!!»

Биз һигаши и тарониң қарашлири үстидә пикир елиш үчүн, кагошима хәлқара университетиниң профессори германийилик болма әпәнди билән сөһбәт елип бардуқ. Профессор болма әпәнди өз қарашлирини баян қилип:
«Һигаши и тарониң дегәнлири тоғра ейтилған қарашлар болуп, йеқинқи йиллардин буян нобел тинчлиқ мукапати һәқиқәтән тоғра кишиләргә берилмәй қалди. Бу қетим мукапатниң явропа бирликигә берилгәнлики хәвирини аңлап, мән толиму һәйран болдум. Һигаши и таро ейтқандәк, бу мукапатниң мәқсити әркинлик, тинчлиқ үчүн күрәш қилғанларни илһамландуруш, һөкүмранларға зәрбә бериштин ибарәттур. Мән шуниңға толуқ ишинимәнки, рабийә қадир вә униң хәлқиниң төлигән бәдәллири ахири мевә бериду. Бу пәқәт вақит мәсилиси.» Деди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.