Qehriman ghojamberdi: 'qazaqistanda xitaygha ishenmeslik, xitaydin agah bolush deydighan ang mewjut'
Muxbirimiz weli
2010.09.14
2010.09.14

http://en.rian.ru Din élindi.
Shangxey radi'o istansisi we shangxey sherq uchur guruhining SMG dep atilidighan tor gézitide bayan qilinishiche, Shangxey hemkarliq teshkilatigha eza döletlerning qoralliq küchliri Birlikte ötküzgen térrorluqqa qarshi herbiy manéwir 13 - séntebir küni qazaqistanda bashlan'ghan.
Bu, shangxey hemkarliq teshkilatning tunji qétim qazaqistan zéminida herbiy manéwir ötküzüshi bolup hésablinidu. Xitay herbiy qisimliriningmu uzun tarixtin buyan tunji qétim qazaqistan zéminigha kirishi bolup hésablinidu.
Xewerde éytilishiche, hazir qazaqistanning matibulaq herbiy manéwir meydanida ötküzülüwatqan "tinchliq burchi 2010 " dep atalghan bu manéwir, "hazir we buningdin kéyinki bir mezgil ichide térrorluq we bölgünchilik yenila mushu rayonning muqimliqigha we dunya tinchliqigha nisbeten asasi xewp. Bu bir mezgil ichide üch xil küchlerge qarshi turush shangxey hemkarliq teshkilatining muhim burchi" dégen chüshenchige asasen uyushturulghan.
Shinxu'a agéntliqining "shinjang xewer tori" da bayan qilishiche, bu manéwirning qomandanliq shtabi hazir qazaqistan, xitay, qirghizistan, rusiye we tajikistandin ibaret besh dölet qisimlirini "üch xil küchler"ge qarshi turidighan 4 xil taktika buyiche meshiq qildurmaqta iken. Neq meydandin tartilghan foto süretlerge "xitay komandirliri hazir qazaqistanning yer - shara'iti bilen tonushuwatidu" dep izahat yézilghan.
Dunya Uyghur qurultiyining mu'awin re'isi, hazir qazaqistanda turuwatqan qehriman ghojamberdi xitay qisimlirining qazaqistan zéminigha kirip manéwir ötküzüshige qet'iy qarshi turidighanliqini bildürdi.
Qehriman ghojamberdining qarishiche, qazaqistanda "xitaygha ishenmeslik, xitaydin agah bolush" deydighan ang mewjut iken. Buningdin burun, xitay qazaqistandin yer ijarige élish telipini otturigha qoyghanda, qazaq ziyaliyliri qarshiliq bildürüp kélishim imzalinishini tosup qalghan idi.
Qehriman ghojamberdi mushu munasiwet bilen weten ichidiki Uyghur qérindashlirigha héytliq salam yollidi we ularni ümid bilen yashashqa chaqirdi.
Yuqiridiki awaz ulinishidin, bu heqtiki melumatimizning tepsilatini anglaysiler.