Süriyidiki qetli'amlar dawam qilmaqta

Esed hakimiyitining ademliri bir kün idlib shehiride qetli'am élip barsa, bir kün hamat shehiride, yene bir kün hems shehiride élip barmaqta.
Ixtiyariy muxbirimiz ömerjan
2012.05.21
Share on WhatsApp
Share on WhatsApp
suriye-yaridar-305.png Süriyediki toqunushta yarilan'ghan bir yash balining ehwali
AFP

Tehlilchilerge köre, esed hakimiyiti namayishning merkezliridin bolghan hems, idlib, hamat sheherliride wehshiy qetli'amlarni élip bérish we muhim shexslerni neq meydanda étip tashlash arqiliq heywe körsitip xelqni qorqutup, namayishtin, hökümetke qarshi chiqishtin waz kechküzüshni xiyal qilidiken.

Emma, esed hakimiyitining bu xiyali emelge éshishi uyaqta tursun, xelqning rohiyiti küchlenmekte iken. Netijide, xelq hökümet eskerliridin qorqush emes, belki ularni ümidsizlendürüsh basquchigha yetken.

Londonda chiqidighan “Ottura sherq” gézitining 2012-yili 21-may künidiki sanida, yazghuchi hemd majid dégen kishining qelimi bilen yézilghan “Esed diktatori we tedrijiy ölüm” dégen témida bir maqale élan qilin'ghan bolup, maqalide mundaq dep yézilghan:
“Beshshar el esed diktatori üchün heqiqiy tehdit birleshken döletler teshkilatining qararliri emes, ereb döletliri ittipaqining qararlirimu emes, gherb döletlirining teshwiqatlirimu emes, hetta rusiye bilen xitayning esedni qollashtin yéniwélishimu emes. Belki heqiqiy tehdit beshshar el esedning rohiyitidiki chüshkünlük we yéngilishtur. Bu chüshkünlük uning sarghiyip qalghan chirayidin, olturushup ketken ikki közidin we wijikliship qalghan wujudidin mana men dep namayan bolup turmaqta. Esed hakimiyitimu xuddi beshshar el esedning özidek bolup qalghan. Bu shuningdin bésharet bériduki, esed hakimiyitining ömri bek az qalghan. Shu sewebtin ularning ghaljirliqi hedep éship ketken bolup, adem öltürüsh ularning kündilik ishigha aylinip qalghan.”

Maqalide yene mundaq dep yézilghan:
“Dunyada héchqandaq bir diktator xelqini qirish bedilige hakimiyitini saqlap qalalmaydu. Haman bir küni uning heqqini töleydu. Süriyide hazir insan qélipidin chiqqan wehshiylik türlirining hemmisi bar. Esed hakimiyiti öz xelqini étip öltürüsh, qest bilen öltürüsh, tutush, qiynash, partlitish, ot qoyush, tirik kömüwétish qatarliqlarning hemmisini qilmaqta. Hetta öktichilerge esirge chüshken bir eskerning yanfonidin chiqqan resimde, süriye eskerlirining namayishchi xelqni baghlap, ongdisigha yatquzup, ularning üstidin qattiq herbiy ayaghliri bilen yüzlirige, qorsaqlirigha dessep ötken körünüshliri tépilghan. Yene birining yanfonidin eskerlerning bir ademni tirik turghuzup üstige tupraq tashlap kömüwetken widi'o körünüshi tépilghan. Démek, esed hakimiyitining ademliri xelqni qiynashtin huzur élip, xushalliqliridin bu wehshiyliklirini yanfonlirigha chüshürüwalghan. Mundaq bir wehshiylik qachan'ghiche dawam qilidu? u qandaqmu dawam qilidu? bu dégenlik xuddi kazafiydek tügishishning béshariti emesmu?”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.