Teywenlikler kimlikini qandaq saqlawatidu?
Muxbirimiz weli
2010.09.24
2010.09.24
Teywenlikler ikkinchi dunya urushigha qatnashqanmu?
"Teywenlikler özi sözlewatqan teywen tarixi" serlewhilik bu maqalida bayan qilinishiche, lin mu'ellim dersxanida, teywen tarixida yéqinqi 400 yil ichide yüz bergen eng wehimilik chong ishlarni bayan qilghanda "teybéy shehiri 9451 - yili 5 - ayning 31 - küni ushtumtut hawa hujumigha uchridi. Birla waqitta teywen uniwérsitétining doxturxanisi bilen teybéy wogzali bombilinip xarabilikke aylandi. Bu, insaniyet tarixidiki chong sheherlerge qilin'ghan hujumlar ichide, eng wehshiy wasite qollinip qilin'ghan hujum bolup hésablinidu. Tarixta, héchqandaq jahan'gir doxturxana dégenni bundaq wehshiy bombilap baqmighan. Bu weqeni hazirqi bir - ikki ewlad teywenlik bilmeydu. Buningdin burun gomindangchilar bu weqeni 'yaponiyige qarshi urush qilghan 8 yil ichide, teywen yaponiyiliklerning hawa hujumigha uchrighanda yüz bergen weqe ', dep chüshendürüp keldi. Bu weqe hazirqi ma yingju hökümiti tüzgen derslik kitablardimu eynen bayan qilinmaydu" dégende, oqughuchilar "mu'ellim, biz teywenlikler ikkinchi dunya urushigha qatnashqanmu?" dep sorighan.Teywenliklerning tinch okyan urushigha qatnashqan tarixini, xitay tarixchiliri "xitaylarning yapon'gha qarshi urushining bir qismi" dewalghan
Lin mu'ellim ulargha: "qatnashqan. Bizdek mushu ewlad teywenliklerning ejdadliri, yapon impériyisi armiyisining terkibidiki teywen qisimlirida xizmet körsetken. Bu tarixni teywen nuqti'ineziri bilen közitip sözlesh kérek. Emma teywenliklerning tinch okyan urushigha qatnashqan tarixini hazir, xitay tarixchiliri burmilap, özgertip 'xitaylarning yapon'gha qarshi urushining bir qismi ' dewaldi" dep chüshendürgen.Teywenlikler xitayche yilname qollanmaydu
Teywendiki li shawféng isimlik bir yazghuchi özining tor bétide, "xitayning teywen'ge tajawuz qilish tarixi" ni bayan qildi. Uningda arxé'ologiyilik ispat körsitip bayan qilinishiche, buningdin 15 ming yil burun, teywen arilining sherq teripidiki öngkürlerde yashighan ademler qaldurghan medeniyet izliri bar. Buningdin 7 ming yil burun, bu araldiki tatliq su aqidighan kubali deryasi wadisida tériqchiliq, sapalchiliq tereqqiy qilghan.Li shawféng ependi teywen tarixigha da'ir bayanlirining héchbir yéride, teywendiki gomindangchi edibler qollinidighan "jen'go dewri", "xen, tang sulaliliri dewri" dégendek yilnamilerni qollanmay, pütünley teywenning özining yilnamisini qollan'ghan. Shundaqla, xitay armiyisi teywen'ge tajawuz qilghanda yürgüzgen qirghinchiliqlarni nahayiti tepsiliy bayan qilip, uni teywenliklerning menggülük es - xatirisige aylandurghan.
Teywendiki bir bay kimlikini özgertish üchün bérilgen 2 milyon 500 ming amérika dollirini almidi
Teywende chiqidighan "erkinlik tor géziti" de bügün yene, teywendiki milyardér baylar kulubining ezasi zéng yali isimlik bir katta bay xanimning yéngi hékayisini élan qilindi. Uningda éytilishiche, béyjingdiki xu'abin xelq'ara meblegh guruhi ötken ayda, zéng yali xanim bilen bir kélishim imzalash üchün teklipname ewetkende, 2 milyon 500 ming amérika dolliriliq neq pul chékini qoshup ewetken. Shundaqla, bu xanimgha yene béyjingda shexsiy ayropilan qollinish we alahide turalghuda turush hoquqi béridighanliqini jakarlighan. Xitay bu bay xanimdin peqet kimlikini özgertip "xitay puqrasi" bolushnila telep qilghan.Xewerde bayan qilinishiche, bu teywenlik mirasxor bay xanim "men kimlikimni hergiz özgertmeymen" dep jakarlap, xitayning teklipnamisini ret qilghan. Bundaq teklipnamini qobul qilmasliqqa zéng yali xanimning dadisimu qoshulghan.
Yuqiridiki awaz ulinishidin, bu heqtiki melumatimizning tepsilatini anglaysiler.