Ürümchide Uyghurlarning tirikchilik qilishi tesleshmekte

Mal bahasi toxtimay örlewatqan bügünki künde ürümchidiki Uyghurlarning kirimi turmush chiqimi we istémal sewiyisini qamdiyalamdu?
Muxbirimiz gülchéhre
2011.11.03
Share on WhatsApp
Share on WhatsApp
qoy-qushxana-qassap.jpg Qushxanigha élip kélin'gen qoylar. 2008-Yili 15iyun.
AFP

Qurban héyt bayrimining yéqinlap kélishige egiship hazir Uyghur élide istémal bazarlirining téximu janlan'ghan peyti shundaqla bu mezgil Uyghurlar ning yémek-ichmek we bashqa turmush chiqimi bir yil ichide adettikidin yuqiri bolidighan pewqul'adde bir peyt hésablinidu.

Ürümchi torida bezi xitay abontlarning ürümchide yashawatqanlarning chiqimi heqqide texmini hésabat xatiriliri élan qilinip, bu bir qisim Uyghur tor betliridimu mulahize qozghimaqta.

Ürümchidiki normal istémal sewiyiside yashawatqanlarning chiqimi mundaq hésablan'ghan:
Ürümchi shehiride yashash üchün ayda kündilik üch waq tamaq, kiragha jem'iy 1100 yüen kétidiken. Öy ijarisi we su, tok pulliri bolup 285 yüen, téléfon, muncha we turmush lazimetliklirige jem'iy 120 yüen serp qilishqa toghra kélidiken. Eger intérnét torini ishletse, tamaka chekse yene qizlarning girim buyumliri üchün az dégende yene 100 yüen artuq chiqim qilishqa toghra kélidiken.

Mushu boyiche hésablighanda ayliq kirimi 1000 yüendin ashmisa ürümchide yashash mumkin emes. Puqralarning ayliq kirimi:

  • 1800 Yüendin 2300 yüen'giche bolsa turmushi yaman emes.
  • 2300 Yüendin 3000 yüen'giche bolsa qiz dosttin birni tépip toy qilalaydu.
  • 3000 Yüendin yuqiri 4000 yüen'giche bolghanlar öy sétiwalalaydu.
  • 4000 Yüendin 4500 yüen'giche bolghanlar öy élip bala baqalaydu.
  • 5000 Yüendin yuqiri bolsa az tola iqtisad qilip aptomobil sétiwélish we sayahetke pul yighishqa bolidu dep körsitilgen.

Ürümchidin ziyaritimizni qobul qilghan bir xitay boytaq yash özining ma'ashining 2500 yüen etrapida ikenlikini hazirqi turmush sewiyisidin özining razi emeslikini bildürdi. Uning chüshendürishichimu hazirqidek yuqiri mal baha sewiyisini qobul qilip, ürümchide normal turmush kechürüsh üchün az dégende besh ming yüen kirim qilish kérek iken.

Uyghur tor betliridiki munazirilerde tordashlarning yuqiriqi hésabatni “Bu peqet ma'ashliq xitay puqralirining ürümchidiki normal turmush chiqimini körsitip béridu”, “Chiqim kirimidin éship ketti,ürümchide yashimaq tes” dégen pikirliri asasliq salmaqni igileydu.

Munazirilerdin qarighanda, ularning bu xil chiqim hésabatigha qoshulalmasliqining sewebi, Uyghurlarning toy-tökün, nezir-chiragh, méhmandarchiliqqa oxshash ijtima'iy munasiwet, örp-adet we köngül échish, ademgerchilik chiqimi we ata-anisidin xewer élishqa da'ir chiqimlirini qoshqanda buningdinmu éship kétidu dep körsitilgen.

Xitay dölet statistika idarisi ürümchi tekshürüsh etritining torda élan qilghan tekshürüsh matériyalidin ashkarilinishiche, aldinqi üch pesilde ürümchide mal bahasi örlep mangghan. Buning ichide yémeklik türidikiler bulturqi oxshash mezgilge qarighanda 12.5% Örligen.

Bolupmu, göshning bahasi pewqul'adde téz we yuqiri örligen bolup bulturqi oxshash mezgildikidin 54.8% Örligen iken. Bulardin bashqa turmushqa éhtiyajliq barliq mallarning hemmiside oxshimighan derijide ösüsh bolghan. Buning ichide istémal buyumliri bahasi 5.1%, Mulazimet türidikilerning bahasi 2.3% Örligen.

Qurban héyt kélishi bilen tebi'iy halda Uyghurlarning chiqimi ashidu, bolupmu téz örligen qoy göshi we yémek-ichmek hem kiyim-kéchek, zibuzinnet buyumlirigha bolghan éhtiyaji bayram türtkiside küchiyidu. Bu jehettiki serpiyat adettikidin köp bolidu, undaqta ürümchidiki Uyghurlar nöwettikidek yuqiri istémal sewiyisini kötürelemdu?

Bir ashpez mal bahasining örlep, ashxana sodisighimu tesir körsitiwatqanliqini bildürdi.

Melum shirketning boghaltiri bolghan bir Uyghur qiz özining bir ayda besh ming yüen kirim qilidighanliqini normal yashawatqanliqini bildürdi.

Bashqa yurttin ürümchige kélip, melum réstoranda kütküchi bolup ishlewatqan bir yash, kirimining azliqi sewebidin kelgüsidin héch ümid körelmeywatqanliqini bildürdi.

Bir zergerchilik dukini échiwatqan yash sodiger bu héytta sodining ilgirikidek yaxshi emesliki, xéridarlirining asasen Uyghur ikenliki, altun bahasining barghanche örlishige egiship xéridar azlawatqanliqini bildürdi.

Bir öy tazilash mulazimet shirkitining diréktori, ürümchide mulazimet obyéktining peqet Uyghurlar ikenlikini, mal bahasining örlishi bilen Uyghurlarning turmush sewiyisining barghanche töwenlewatqanliqini chüshendürdi.

Ürümchide ma'ash we kirimning ösüshi mal bahasining örlesh qedimige yétishelmeywatqan bir peytte, ürümchidiki Uyghurlarning bu jawabliridin birla so'al tughulidu,u bolsimu “Ürümchide Uyghurlar, bunche töwen kirim bilen qandaqmu yashar?”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.