Yaponiyide "yaponiye xitayning aptonomiyisi bolidu" namliq kitab neshr qilindi

Mezkur kitab yaponiye jem'iyitide qattiq ghulghula qozghighan bolup, mezkur kitabning aptori tadanobu bando'u ependi yaponiye qoralliq saqchi qismida wezipe ötigen we uzun muddet tokyo jama'et xewpsizlik nazaritide xitay tili terjimani bolup ishligen. U ilgiri -axir bolup yaponiyide xitay köchmenliri sadir qilghan 1400 déloni bir terep qilishqa qatnashqan.

Kitabning aptori hazirmu chet'elliklerning jinayet sadir qilish ishlirini bir terep qilishqa qatnishiwatqan, ataqliq xitay tili terjimanidur.
Uning esiride yaponiyige köchüp kéliwatqan xitay köchmenliri toghrisidiki ilmiy asasta otturigha qoyulghan mesililer, pakitlar we shundaqla hakimiyet béshidiki hazirqi hökümetning xitaygha tutqan yumshaq qol siyasiti qatarliq mesililer üstide yürgüzülgen mulahiziler bar bolup, bu yapon jem'iyitide belgilik tesir peyda qilghan.

Kitabning aptori yapon hökümiti eger xitaygha yumshaq qol siyaset élip barsa, yaponiyining xitayning aptonomiyisige aylinip qalidighanliqini ilgiri sürse, bezi mutexessisler yaponlarning tarixta héchbir waqit mustemlike bolup baqmighanliqini, buningdin kéyinmu bashqa milletlerning mustemlikisi bolmaydighanliqini ilgiri sürgen. Biz bu kitab heqqide toluq melumat élish üchün yaponiye kagoshima xelq'ara uniwérsitétining xadimi doktor haji qutluq qadiri ependi bilen téléfon söhbiti élip barduq.