Kommunistik partiye bayram qilsa xelq zémin qayturushni telep qildi

Yéqinda shangxeydin yü jongxu'en isimlik bir sheher ahalisi, xitay hökümitidin ata-bowiliridin miras qalghan xususiy mülki ‏-‏-- öy-zéminlirini qayturup bérishni telep qilip yazghan erzini, “Xitaygha nezer” tor gézitining muxbirigha tapshurup bérip, xitay kommunist partiyisi üstidin qilin'ghan bu shikayetni dunyagha anglitishni telep qildi. Bu, hazir xitay hökümiti kommunist partiyining 90 yilliq “Ghelibisi” ni tebriklep bayram qilish üchün jiddiy teyyarliq körüwatqan waqitqa toghra keldi.

“Xitaygha nezer” tor géziti xitay kommunist partiyisi üstidin qilin'ghan bu erzning esli tékistige asasen mundaq dep bayan qilidu: erzdar shangxeyning pudong rayonida tirikchilik qilip kéliwatqan yü famililik aka-ukilardin tirik qalghanlarning biri. Uning shikayet qilishiche, uning ata-bowiliridin ewladmu-ewlad miras bolup qalghan ikki mo yer we uning üstige sélin'ghan bir nechche éghizliq öy mülki ming, ching, min'go dewrlirigiche bolghan 400 yil ichide bulang-talang qilinmay saqlinip qalghan bolup, uni xitay kommunist partiyisi buliwalghan. Yérini “Yer islahati” dégen nam bilen deslepte “Kolléktip mülki” ge aylandurup, keynidin kommunist hökümitining “Dölet mülki” qiliwalghan.

Bu erzdarning sinip terkibi yuqiri bolmighanliqi üchün, uning öyliri “Omum” ning (kommunist partiyining) qiliwétilmey bir mezgil saqlinip qalghan.

Erzdarning ata miras xususiy mülkige warisliq qilish pikri nahayiti qet'iy bolup kelgenliki üchün, xitay hökümiti uninggha herxil töhmetlerni chaplap, axir 90‏-yillarda uni türmige tashlighan. U, jaza mudditini 2003-yili xitayning shinjangdiki bir türmiside tügitip shangxeyge qaytqanda, shangxeydiki öyliri alliqachan chéqip tashlan'ghan, uning qoshnilirimu mehellidin qoghlap chiqirilip, bu zémin'gha xitay hökümiti yuqiri bahaliq tawar öy-binasi séliwalghan, bu binagha hökümet emeldarliri köchüp kirip bolghan. U, shuningdin tartip xususiy mülkini qayturuwélish üchün erz qiliwatidu. Yerlik hökümetler uning erzni anglimaydu, adaletsizlik heqqide gep qilsa, saqchilar uni tutup kétip azablaydu. Béyjinggha erz qilsa, béyjing hökümiti uning erzni shangxeyge chüshürüp béridu. Uning hazir “Kommunist partiye ata miras mülkümni qayturup bersun” dégendin özge sho'ari yoq. U, ata miras mülkini qoghdash üchün hazir ya ölüm ya körüm dep turuwatidu.

Xitay hökümiti kommunist partiyining 90 yilliqini tebriklep bayram qilish üchün hazir, yazghuchilarni “Kommunistik partiye érishtürgen bext” dégen témida maqale yézip mukapatqa érishishke righbetlendürüwatidu. Bezi yallanma edibler hazir yenila kommunistik partiyidin menpe'et tama qilip medhiye yézishqa bashlidi. Emma intérnét tor betliride yene, xitay xelqining uninggha oxshimaydighan awazlirimu chiqiwatidu.

Bügün “Xitaygha nezer” tor gézitining munazire bétide, tor ehli xitay kommunistik partiyisige lenet yaghdurdi. Buningdiki xitaydin yézilghan obzorlarda, bu shangxeylik erzdar inkas qilghan ehwal pütün xitayda saqliniwatqan bir chong mesile, xitay kommunistlar partiyisi bandit, kommunist hökümiti bulangchi hökümet, mustemlike qiliniwatqan bashqa milletlerning bulang-talanggha uchrash ehwali xitay xelqning ehwalidinmu éghir, hazirqi waqitta xitay hökümitige xuddi tilemchi mezlumlardek zarlinishtin héchqandaq netije chiqmaydu, dégen mezmunlar ipadilendi.