Ача-сиңил икки уйғур қизниң сақчиларниң зораванлиқиға көрсәткән қаршилиқи иҗтимаий таратқуларда диққәт қозғимақта

Нәқ мәйдандин сүрәткә елинған һәмдә иҗтимаий таратқулар арқилиқ ашкара болған 67 секунтлуқ бир син көрүнүшидин мәлум болушичә, ача-сиңил икки уйғур қизниң сақчиларниң зорванлиқиға көрсәткән қаршилиқи вәтән ичи вә сиртидики җамаәтчилик арисида күчлүк диққәт қозғимақта.

Син көрүнүшидики тәпсилатлардин қариғанда, шәһәр башқуруш идариси, қанун иҗра қилиш идариси вә аһалиләр комитетидин тәшкилләнгән бирқанчилиған һөкүмәт хадимлири сақчиларниң һимайисидә үрүмчиниң мәлум кочисиға җайлашқан ача-сиңил икки уйғур қизниң дукиниға зорлуқ ишләткән.

Мәзкур дуканниң ача-сиңил икки нәпәр уйғур қиз тәрипидин қанунлуқ рәсмийәтләр бойичә ечилғанлиқи мәлум. Дуканниң сиртиға есилған елан тахтисидин мәлум болушичә, бу дукан уйғур херидарлар үчүн той гирими вә той сүрәтлири бойичә кәспий мулазимити қилидикән.

Һалбуки, хитай сақчиларниң һимайисидә йопурулуп кәлгән базар башқуруш вә қанун иҗра қилиш идарисиниң уйғур хадимлири икки уйғур қизниң қаршилиқиға қаримай дуканниң елан тахтисини зорлуқ күч ишлитип сөкүп кәткән.

Бу хилдики әһваллардин хәвәрдар, әмма нам-шәрипини ашкарилашни халимайдиған бирәйләнниң радиомизға билдүрүшичә, йеқиндин буян базар башқуруш, қанунни иҗра қилиш дегәндәк идариләрниң хадимлири ават уйғур кочилиридики дукан вә түрлүк тиҗарәт орунлириниң елан тахтилирини қомуруп елип кәтмәктикән.

У уйғурлар мәркәзлик олтурақлашқан коча вә районлардики талаш-тартиш һәм җедәл-маҗираларни бир тәрәп қилишқа һөкүмәт тәрәп уйғур сақчилар билән уйғур һөкүмәт хадимлирини алдиға салидиғанлиқини тәкитлиди.

Үрүмчидин йеқинда америкиға келип олтурақлашқан бир уйғур яшму бу әһвалниң растлиқини, өзиниңму мушундақ ишларни өз көзи билән көргәнликини илгири сүрди.

Мәлум болушичә, 2004-йилидин буян шәһәрлик вә һәрқайси районлуқ һөкүмәтләрдә “қанунни иҗра қилиш” намида мәхсус идарә яки ишханилар тәсис қилинған. Улар өзлиригә берилгән чәклимисиз һоқуққа тайинип, базар башқуруш хадимлири билән бирликтә шәхсләрниң дуканлирини тәртипкә салидикән.

Игилишимизчә, даириләрниң үрүмчидики уйғур аһалилири мәркәзлик олтурақлашқан кочилардики дукан вә шәхсий тиҗарәт орунлирини аталмиш “тәртипкә селиши” ниң тиғ учи асасән җәнубтин кәлгән уйғурларни үрүмчидин қоғливетиш икәнлики мәлум.

Тәпсилатини аваз улиништин аңлиғайсиз.