Acha-singil ikki Uyghur qizning saqchilarning zorawanliqigha körsetken qarshiliqi ijtima'iy taratqularda diqqet qozghimaqta

Muxbirimiz qutlan
2015.09.25
Share on WhatsApp
Share on WhatsApp
acha-singil-toy-girim-dokini-zorluq-1.jpg Qanun ijra qilish xadimliri bilen bazar bashqurush xadimliri qoralliq saqchilarning himayiside ürümchidiki ikki Uyghur qiz achqan toy girimi we toy süretliri dukinining élan taxtisini zorluq küch bilen qomurup élip mangmaqta.
Social media

Neq meydandin süretke élin'ghan hemde ijtima'iy taratqular arqiliq ashkara bolghan 67 sékuntluq bir sin körünüshidin melum bolushiche, acha-singil ikki Uyghur qizning saqchilarning zorwanliqigha körsetken qarshiliqi weten ichi we sirtidiki jama'etchilik arisida küchlük diqqet qozghimaqta.

Sin körünüshidiki tepsilatlardin qarighanda, sheher bashqurush idarisi, qanun ijra qilish idarisi we ahaliler komitétidin teshkillen'gen birqanchilighan hökümet xadimliri saqchilarning himayiside ürümchining melum kochisigha jaylashqan acha-singil ikki Uyghur qizning dukinigha zorluq ishletken.

Mezkur dukanning acha-singil ikki neper Uyghur qiz teripidin qanunluq resmiyetler boyiche échilghanliqi melum. Dukanning sirtigha ésilghan élan taxtisidin melum bolushiche, bu dukan Uyghur xéridarlar üchün toy girimi we toy süretliri boyiche kespiy mulazimiti qilidiken.

Halbuki, xitay saqchilarning himayiside yopurulup kelgen bazar bashqurush we qanun ijra qilish idarisining Uyghur xadimliri ikki Uyghur qizning qarshiliqigha qarimay dukanning élan taxtisini zorluq küch ishlitip söküp ketken.

Bu xildiki ehwallardin xewerdar, emma nam-sheripini ashkarilashni xalimaydighan bireylenning radi'omizgha bildürüshiche, yéqindin buyan bazar bashqurush, qanunni ijra qilish dégendek idarilerning xadimliri awat Uyghur kochiliridiki dukan we türlük tijaret orunlirining élan taxtilirini qomurup élip ketmektiken.

U Uyghurlar merkezlik olturaqlashqan kocha we rayonlardiki talash-tartish hem jédel-majiralarni bir terep qilishqa hökümet terep Uyghur saqchilar bilen Uyghur hökümet xadimlirini aldigha salidighanliqini tekitlidi.

Ürümchidin yéqinda amérikigha kélip olturaqlashqan bir Uyghur yashmu bu ehwalning rastliqini, öziningmu mushundaq ishlarni öz közi bilen körgenlikini ilgiri sürdi.

Melum bolushiche, 2004-yilidin buyan sheherlik we herqaysi rayonluq hökümetlerde “Qanunni ijra qilish” namida mexsus idare yaki ishxanilar tesis qilin'ghan. Ular özlirige bérilgen cheklimisiz hoquqqa tayinip, bazar bashqurush xadimliri bilen birlikte shexslerning dukanlirini tertipke salidiken.

Igilishimizche, da'irilerning ürümchidiki Uyghur ahaliliri merkezlik olturaqlashqan kochilardiki dukan we shexsiy tijaret orunlirini atalmish “Tertipke sélishi” ning tigh uchi asasen jenubtin kelgen Uyghurlarni ürümchidin qoghliwétish ikenliki melum.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.