Almatada Uyghur anilirigha béghishlan'ghan ilmiy muhakime yighini bolup ötti

Ixtiyariy muxbirimiz oyghan
2016-10-11
Élxet
Pikir
Share
Print
"Anilarning jem'iyettiki roli we ularning atquruwatqan ishliri" témisida échilghan yumilaq üstel ilmiy muhakime yighinidin körünüsh. 2016-Yili 9-öktebir, almata.
"Anilarning jem'iyettiki roli we ularning atquruwatqan ishliri" témisida échilghan yumilaq üstel ilmiy muhakime yighinidin körünüsh. 2016-Yili 9-öktebir, almata.
RFA/Oyghan

9-Öktebirde almata shehiridiki dostluq öyide "Anilarning jem'iyettiki roli we ularning atquruwatqan ishliri" témisida yumilaq üstel ilmiy muhakime yighini bolup ötti.

Uninggha qazaqistan jem'iyitining her xil saheliride emgek qiliwatqan ishbilermen xanim-qizlar, alimlar, yazghuchilar, ustazlar, yashlar we bashqilar bolup, 100 din oshuq kishi qatnashti. Qazaqistan Uyghurlirining jumhuriyetlik étno-medeniyet merkizining uyushturushi bilen ötken mezkur pa'aliyetke merkezning bashqarma ezasi, edliye xadimi shemshiqemer abdraxmanowa riyasetchilik qildi. "Janan" jem'iyetlik fondining re'isi mizan'gül awamisimowa "Anilarning jem'iyettiki roli we ularning atquruwatqan ishliri", "Nurane anilar" kéngishining re'isi güljahan muratowa bolsa, "Anining jem'iyettiki orni" témilirida bash doklatlar bilen sözge chiqip, anilarning jem'iyettiki roligha yuqiri baha berdi, ularning bügünki turmush-hayattiki, memliket ishliridiki pa'aliyitining muhimliqini tekitlidi.

Jumhuriyetlik Uyghur medeniyet merkizi yénidiki xanim-qizlar kéngishining re'isi senem béshirowaning tekitlishiche, qazaqistan prézidéntining permani bilen 7-öktebir anilar küni bolup belgilinip, musteqilliq yilliri mabeynide Uyghur aniliri özlirining yaxshi ishliri bilen memliketning omumiy tereqqiyatigha munasip hesse qoshup kelgen. U ziyaritimizni qobul qilip, mundaq dédi: "Shuning üchün biz bu qétimqi anilar bayrimini intayin chong kölemde ötküzüwatimiz. Prézidéntimizning 'menggülük el' programmisini anilar bilen birlikte qollap-quwwetlep, musteqilliqimizning téximu güllinishi üchün shu témilarda bayram ötküzüwatimiz."

Mezkur bash qoshushta shundaqla almata shehiridiki 89-rus-Uyghur ottura mektipining mudiri asiyem yüsüpowa we almata sheherlik mu'ellimlerning bilimini mukemmelleshtürüsh institutining proféssori aliyem arziyéwa ma'arip sahesidiki muhim mesililerge, bolupmu anilarning ewlad terbiyileshtiki roligha, milliy mektepler mesililirige hem qizlar terbiyisi heqqide toxtaldi. "Intizar" krizis merkizining mudiri hurqiz iliyéwa we "Uyghur anilar" kéngishining pexriy re'isi tursun'ay téyipowa özlirining ish-tejribisige tayan'ghan halda, Uyghur ayallirining siyasettiki orni, tijarettiki roli heqqide chüshenche bérip, ayallargha, balilargha körsitiliwatqan xeyrxahliq ishlirining muhimliqini, ötken yilliri bu yönilishte qilin'ghan ishlardin toplan'ghan bay tejribidin orunluq paydilinishning zörürlükini körsetti.

Radi'omiz ziyaritini qobul qilghan jumhuriyetlik Uyghur medeniyet merkizining ijra'iye mudiri zuhrullam qurwanbaqiyéf bu yighinning asasiy mezmuni toghrisida mundaq dédi: "Millitimiz xanim-qizlirining jem'iyettiki roli nahayiti üstün. Eslide ularning jem'iyettiki roli burundin körünüp kelgen idi. Bügünki kündimu shu izni yoqatmay, jem'iyettiki öz rolini atqurup kéliwatidu. Xanim-qizlar ishlimeydighan orun yoq. Yighinning asasiy mezmuni xanim-qizlirimizning jem'iyettiki roli toghrisida boldi. Atap éytsaq, milliy mekteplirimizde öz ana tilida oquwatqan balilarning azlap kétip barghanliqini we bashqimu köpligen mesililerni anilar nahayiti échinarliq bilen tilgha aldi."

Z. Qurwanbaqiyéf Uyghur xanim-qizlirining her sahelerdiki utuqlirining dölet teripidin munasip bahalinip kéliwatqanliqini, jumhuriyet boyiche Uyghur jem'iyetlik birleshmiliri ezalirining, ma'arip, salametlikni saqlash oxshash sahelerde xizmet qilghuchilarning asasiy qismini xanim-qizlar igileydighanliqini alahide tekitlidi. Uning éytishiche, mezkur yighin qarar élip, uningda anilar künige béghishlan'ghan pa'aliyetlerni dawamliq ötküzüsh, Uyghurlar hayatigha béghishlan'ghan shundaq pa'aliyetlerge xanim-qizlarni köplep jelp qilish, ularning milliy mektepler sanini köpeytishtiki, memliketning omumiy hayatidiki rolini qollap-quwwetleshke köprek köngül bölüshning muhimliqi éytilghan.

Yumilaq üstelde shundaqla almata wilayiti emgekchiqazaq nahiyilik Uyghur étnomedeniyet merkizi ishikte rayonluq xanim-qizlar kéngishining re'isi nurbüwi nasirowa, jumhuriyetlik Uyghur medeniyet merkizining aqtaw shehiridiki shöbisining re'isi toxtasun eysarof, r. Süléyménof namidiki sherqshunasliq instituti Uyghurshunasliq merkizining ilmiy xadimi zulfiye kerimowa, "Uyghurlarning milliy birleshmisi" jem'iyetlik teshkilatining xadimi na'ilem hemrayéwa, "Uyghur awazi" gézitining bash muherriri érshat esmetof, "Intizar" zhurnilining muherriri abdughopur qutluqof we bashqilar bu heqte öz pikirlirini bildürdi.

Radi'omiz ziyaritini qobul qilghan almata wilayiti panfilof nahiyilik Uyghur medeniyet merkizi xanim-qizlar kéngishining re'isi mahinur ayupowa mezkur anilar bayrimigha yarkent tewesidin 18 anini élip kelgenlikini éytip, mundaq dédi: "Biz jumheriyetlik medeniyet merkizi uyushturghan anilar bayrimini körüsh we buningdin tejribe élish üchün kelduq. Bizning kéngeshning qurulghinigha on nechche yil bolup ketti. Özimizning ish pilani bar. Yilda anilar bayrimi ötküzimiz. Hemme nerse mushu anilarning qolidin chiqidu, hemme nersini anilardin öginish kérek. Yashlar tejribilik xanimlardin ögense deymen. Anilar aman bolsun!"

Shu küni chüshtin kéyin quddus ghojamyarof namidiki jumhuriyetlik dölet Uyghur muzikiliq komédiye tiyatirida anilar bayrimigha béghishlan'ghan chong tentene uyushturuldi. Uningda sözge chiqqan qazaqistan jumhuriyiti parlaménti aliy kéngishining ezasi, jumhuriyetlik Uyghur medeniyet merkizining re'isi shahimerdan nurumof anilarni bu bayram bilen qizghin tebriklep, bir qatar xanim-qizlargha qazaqistan xelqi assambléyisining pexriy yarliqlirini tapshurdi. Tentenide shundaqla yetmishke yéqin ustaz medeniyet merkizining pexriy yarliqliri bilen teqdirlendi. Tentene dawamida almata shehiridiki ana tilida bilim éliwatqan mektepler oqughuchiliri, shundaqla "Bahar" ansambili we bashqimu sen'etkarlar teripidin teyyarlan'ghan konsért oyunliri körsitildi.

Toluq bet