Bu yilliq "Anilar bayrimi" muhajirettiki Uyghurlar üchün qayghuluq bir kün boldi

Muxbirimiz sada
2019-05-13
Élxet
Pikir
Share
Print
30 Yil oqutquchiliq qilghan 68 yashliq amine memet "Yépiq terbiyelesh" merkizige qamalghan. 2017-Yili noyabir, qeshqer.
30 Yil oqutquchiliq qilghan 68 yashliq amine memet "Yépiq terbiyelesh" merkizige qamalghan. 2017-Yili noyabir, qeshqer.
RFA/Arslan

Her yilda bir qétim tebriklinidighan xelq'araliq "Anilar bayrimi" küni pütün dunyadiki japakesh anilarning perzentlirige we a'ilisige singdürgen ejri, jem'iyetke qoshqan bir kishilik töhpisige minnetdarliq bildürülidighan bir bayramdur.

Her yili 12-maygha békitilgen bu künde perzentler öz anilirigha herxil xushpuraq güllerni we sowghatlarni sowgha qilidu, méhriban anisining menggü shu gülge oxshash güzel bolushini ümid qilip tileklerni tilishidu, anilarning uzun ömür körüshi üchün du'alarni qilishidu.

Halbuki, bügünki bu mubarek kün Uyghur diyari we muhajirettiki Uyghurlar üchün qayghuluq bir kün bolmaqta. Xitayning Uyghur diyarida yürgüzüwatqan éghir zulumliri netijiside muhajirettiki Uyghurlarning beziler anilirining awazini anglashtin mehrum bolghan bolsa, yene beziler anisidin menggülükke ayrilip turmaqta. Mushu munasiwet bilen muhajirettiki Uyghurlar herqaysiy axbarat wasitiliri we ijtima'iy taratqularda "Anilar bayrimi" heqqide maqale we yazmilarni élan qilip, xitayning jaza lagérlirida azab chékiwatqan anilirining bayrimini tebriklimekte.

12-May "Zimistan" torida "Anilar bayrimida yoqap ketken Uyghur ana üchün muraji'et" namliq bir maqale élan qilin'ghan. Maqalining aptori ziba murat mezkur maqalide xitayning jaza lagérigha solan'ghan apisi gülshen abbasning ehwalini misalgha élish arqiliq pütün dunyani Uyghur diyarining nöwettiki weziyitige köz yummasliqqa, xitay hökümitining Uyghur perzentlerni anisiz qoyushigha yol qoymasliqqa chaqirghan.

Muhajirettiki Uyghur pa'aliyetchiliridin en'gliyediki Uyghur ziyaliysi eziz eysa elkün ependi twttér bétige chaplighan yazmisida alaqisi pütünley üzülgen anisigha bolghan séghinishini ipadiligen. U munularni yazghan: "Anilar bayrimida men anamning awazini angliyalmaymen, chirayini körelmeymen. Men u toghriliq héchnémini bilmeymen. Bügün anamgha etirgül sowgha qilishqa imkansizmen. Xitayning lagérlirida azab chékiwatqan Uyghur anilarning bayrimigha mubarek bolsun!"

Eziz eysa ependi 13-may radiyomizgha söz qilip, özining anisi bilen alaqisi üzülgendin kéyinki héssiyatini sözlep ötti we anisi barlarning anisining qedrige yétishi lazimliqini tekitlidi.

Wetende xitayning jaza lagérigha solan'ghan, kéyin shu yerde wapat bolghan anisining ehwalidin kéchikip xewer tapqan dunya Uyghur qurultiyining re'isi dolqun eysa ependimu radiyomizgha söz qilip, pütün Uyghur anilarning bayrimini tebriklidi shundaqla muhajirettiki Uyghurlarni öz aniliri üchün küresh qilishqa chaqirdi.

Mushu qatarda yene amérikadiki "Uyghur herikiti" teshkilatining bashliqi roshen abbas xanimmu radiyomiz ziyaritini qobul qildi. U "Uyghur herikiti" teshkilati namidin xitay hökümiti teripidin ayriwétilgen ana-balilar, xitay erlirige mejburiy yatliq qiliniwatqan we zorluqqa uchrawatqan qizlar üchün bir bayanat élan qilghanliqini tilgha aldi.

Toluq bet