Awstraliyediki Uyghurlar jem bolup bu yilliq ruzi héytni tebriklidi

Ixtiyariy muxbirimiz uchqun
2019-06-06
Élxet
Pikir
Share
Print
Uyghur a'iliside héytlishish. 2019-Yili 5-iyun, adélayd, awstraliye.
Uyghur a'iliside héytlishish. 2019-Yili 5-iyun, adélayd, awstraliye.
RFA/Uchqun

Awstraliye hemmimizge melum bolghinidek jenubiy yérim sharda Uyghurlar eng köp olturaqlashqan dölet. Awstraliyediki Uyghurlarning köp qismi séydniy, mélborin, adélayd qatarliq chong sheherlerde topliship yashighandin bashqa az sandiki Uyghurlar yene kanbérra, birisbén, gold kost, pérs qatarliq sheherlerdimu yashimaqta.

Undaqta, awstiraliyediki Uyghurlar bu yilliq roza héytni qandaq ötküzdi? biz bu heqte ehwal igilesh üchün séydniy, mélborin we adélayd sheherliride yashawatqan bir qisim Uyghurlarni ziyaret qilduq. Sidnéydiki awstraliye Uyghur jem'iyitining mu'awin re'isi jür'et ependi ziyaritimizni qobul qilip mundaq dédi: "Biz sidnéydiki Uyghur jama'iti 6-ayning 4-küni türklerning obin meschiti we bunrék meschitide ruzi héyt namizini oquduq. Namazdin chiqip bir yerge yighilip bir-birimizning héytini mubarekleshtuq, undin kéyin üch türkümge bölünüp örp-aditimiz boyiche öz-ara héytlashtuq."

U yene héytlishishning nahayiti köngüllük bolghanliqi heqqidimu toxtilip mundaq dédi: "Biz arimizdin ayrilghanlar we péshqedemlerning öylirige bérip hal-ehwal soriduq, héytning 1-küni ene shundaq ötti. Bügünmu yashlirimiz top-top bolup héytlap kélip bizni nahayiti xushal qildi."

Mélborin shehiride yashawatqan qasimjan ependi ruzi héyt namizida weten üchün du'a qilghanliqi heqqide toxtilip mundaq dédi: "Biz mélborn shehiride 6-ayning 4-küni küni héyt qilduq. Héyt namizini dendénong rayonidiki sultan exmet meschitide oquduq. Namazgha az dégende 70-80 dek Uyghur jama'iti qatnashqan bolup, héyt namizida weten üchün, xelqimizning hörlüki üchün du'alarni qilduq."

U yene namazdin kéyinki héytlishish heqqidimu toxtilip mundaq dédi: "Namazdin kéyin meschit etrapidiki chonglarning öyini héytlap ulardin ehwal soriduq, undin kéyin balilirimizgha örp-adetlirimiz we milliy bayramlirimiz heqqide chüshenche berduq shundaqla ulargha sowghat teyyarliduq."

Jenubiy awstraliye islam jem'iyitining mu'awin re'isi shundaqla awstraliye sherqiy türkistan jem'iyitining re'isi nurmemet türkistani ependim adélayd shehiridiki ruz héyt heqqide melumat bérip mundaq dédi: "Biz awstraliye döletlik imamlar shurasining qarari boyiche 6-ayning 5-charshenbe küni ruzi héyt namizini oquduq. Rozi héyt namizi ebubekir sidiq meschitide 1500 din artuq jama'etning ichide 300 din artuq chong-kichik we er-ayal sherqiy türkistanliq qérindashlar qatnashti. Namazgha özimizdin chiqqan diniy ustazimiz abdusalam qari hajim imametchilik qildi, u namazning xutbiside sherqiy türkistanning nöwettiki weziyitini köpchilikke tunushturdi shundaqla sherqiy türkistan üchün hemmimiz birlikte du'alarni qilduq."

Nurmemet ependim yene héytlishish heqqidimu toxtilip mundaq dédi: "Namazdin kéyin biz jem'iyitimizning yétekchilikide chonglarni, musibet égilirini we tul ayallarni aldi bilen yoqliduq. Bügün péshin namizidin bashlan'ghan bu héytlishishimizni taki xupten namizighiche dawamlashturduq. Biz bu künni bir-birimiz bilen hal mung qilish, köngül sorash, en'eniwi yémek-ichmeklerdin huzurlinish, balilirimizgha qimmetlik örp-aditimiz we diniy yusunlirimizni ögitidighan güzel pa'aliyetlirimiz arqiliq héyt tentenisi bilen ötküzduq."

Awstiraliyege yéngidin kélip olturaqlashqan abdul'éziz ependimu ruzi héyt heqqidiki tesiratlirini biz bilen ortaqliship mundaq dédi: "Men awstiraliyege tunji qétim kelgendimu ruzi héytqa ülgürüp kelgen idim, shu waqittimu nahayiti köngüllük héytlashqan iduq, bu qétimmu xuddi wetendikidek héytlashtuq, buningdin intayin hayajanlandim. Men rozi héyt munasiwiti bilen pütün dunyadiki wetendashlirimgha qizghin salam yollaymen."

Awstiraliyede rozi héyt gerche resmiy dem élish küni bolmisimu, Uyghur jama'iti yenila qizghin héytliship, milliy en'enimizni dawamlashturushta küchining yétishiche tirishmaqta iken.

Toluq bet