Awstiraliyening adélayd shehiride Uyghur jama'itining uchrishishi ötküzülgen

Ixtiyariy muxbirimiz arslan
2019-02-18
Élxet
Pikir
Share
Print
Awstraliye sherqiy türkistan jem'iyitining uyushturushi bilen ötküzülgen adélaydtiki Uyghur jama'itining uchrishish pa'aliyitige alahide teklip qilin'ghan amérika alem qatnishishi idarisining mutexessisi doktor erkin sidiq ependi söz qilmaqta. 2019-Yili 18-féwral, awstraliye.
Awstraliye sherqiy türkistan jem'iyitining uyushturushi bilen ötküzülgen adélaydtiki Uyghur jama'itining uchrishish pa'aliyitige alahide teklip qilin'ghan amérika alem qatnishishi idarisining mutexessisi doktor erkin sidiq ependi söz qilmaqta. 2019-Yili 18-féwral, awstraliye.
RFA/Arslan

18-Féwral küni merkizi awstiraliyening adéleyd shehirige jaylashqan awstiraliye sherqiy türkistan jem'iyitining uyushturushi bilen adélaydtiki Uyghur jama'itining uchrishish pa'aliyiti ötküzülgen.

Amérika alem qatnishishi idarisining mutexessisi doktor erkin sidiq bilen kanadada yashawatqan dunya Uyghur qurultiyi muhajirlar komitétining mudiri memet toxti ependiler bu pa'aliyetke alahide teklip qilin'ghan hemde muhim söz qilghan.

Awstiraliye sherqiy türkistan jem'iyitining re'isi nurmuhemmed türkistani ependi bu heqte ziyaritimizni qobul qilip, bu qétimqi pa'aliyetning ehwalini tonushturdi. Nurmuhemed türkistani bu qétimqi pa'aliyetni uyushturushtiki meqsetning xitayning zulumigha qarshi turush, xelq'ara jama'etning qollishini qolgha keltürüsh hemde öz ara birlik-barawerlik asasida Uyghur jama'iti arisidiki qérindashliq méhri-muhebbetni kücheytishtin ibaret ikenlikini bildürgen.

Yighinda Uyghur alimi erkin sidiq söz qilip, hazirqi qiyin weziyette muhajirettiki Uyghurlarning némilerni qilalaydighanliqi heqqide öz qarashlirini otturigha qoyghan.

Memet toxti ependimu jama'etke Uyghurlarning nöwettiki weziyiti, dunya Uyghur qurultiyi muhajirlar komitétining yéqindin buyan élip barghan pa'aliyetliri heqqide söz qilghan.

Yighinda nöwette muhajirettiki Uyghurlar arisida ötküzülüwatqan "Menmu Uyghur", "Tughqanlirim qeyerde" qatarliq pa'aliyetlerni kücheytishning muhimliqi, awstraliyediki Uyghurlarningmu bu xil pa'aliyetlerge aktip ishtirak qilip, uruq-tughqanlarning resimlirini kötürüp chiqip, xitayning qebih qilmishlirini dunyagha pash qilishi kérekliki otturigha qoyulghan.

Yighinda yene dini alim abdusalam alim insanning zulumgha qarshi turushining zörürlüki, musibetke qandaq berdashliq bérish we sebir qilishning ehmiyiti shundaqla zulumdin qutulushning chiqish yolini tépish toghrisida "Qur'an kerim" din ayetlerni delil körsitip, muhim söz qilghan.

Pa'aliyet jeryanida yene adélayd shehiride awstraliye boyiche yuqiri netijiler bilen oquwatqan 3 neper Uyghur aliy mektep oqughuchisi awstraliye sherqiy türkistan jem'iyiti teripidin mukapatlan'ghan.

Toluq bet