Qirghizistan paytexti bishkek shehiride Uyghur yashliri Uyghur mesilisige a'it muhakime pa'aliyiti ötküzdi

Ixtiyariy muxbirimiz féruze
2018-12-20
Élxet
Pikir
Share
Print
Qirghizistandiki Uyghur yashlirining "Yashliq awazi" guruppisi uyushturghan "Dewr söhbiti" pa'aliyiti milliy marsh bilen bashlandi. 2018-Yili 16-dékabir, qirghizistan.
Qirghizistandiki Uyghur yashlirining "Yashliq awazi" guruppisi uyushturghan "Dewr söhbiti" pa'aliyiti milliy marsh bilen bashlandi. 2018-Yili 16-dékabir, qirghizistan.
RFA/Féruze

Qirghizistandiki Uyghur yashlirining "Yashliq awazi" guruppisi 16-dékabir küni bishkektiki "Park xotél" namliq méhmanxanining yighin zalida "Dewr söhbiti" pa'aliyiti uyushturdi. Pa'aliyetke bishkek shehiri we uning etrapidiki yézilardin kelgen Uyghur yashliridin 150 ke yéqin kishi qatnashti.

Murasim pa'aliyiti 3 qisimdin teshkil qilin'ghan bolup, bular: "Dunya Uyghur qurultiyi herikiti we uning rehberliri", "Qirghizistan yashliri arisida Uyghur tilini tereqqiy qildurush" we "Yashliq awazi-2018" mukapatini teqdim qilish dégenlerdin ibarettur.

Noyabir éyida jenwe we myunxén sheherliride ötküzülgen pa'aliyetlerge qirghizistandin qatnashqan perhat ibrahimof, exmet shamiyéf we nurshat ebeydullayéflar "Dewr söhbiti" pa'aliyitining birinchi qismi, yeni "Dunya Uyghur qurultiyi herikiti we uning rehberliri" da doklat berdi shuningdek Uyghur yashlirini öz millitining mesililirige köngül bölüshke chaqirdi.

Perhat ibrahimof dunya Uyghur qurultiyining asasiy prinsipliri we uning yawropa parlaménti, yawropa komissiyesi, birleshken döletler teshkilati we bashqa xelq'araliq teshkilatlar bilen hemkarlishishi heqqide tepsiliy doklat berdi.

Exmet shamiyéf bolsa 6-noyabir künidiki namayish heqqide toxtilip, öz tesiratlirini bayan qildi. Yene doklat bergüchi nurshat ebeydullayéf dunya Uyghur qurultiyi rehberliri we namayishqa qatnashqan Uyghur alimliri-ziyaliyliri bilen tonushup, ular bilen söhbetleshkende ularning milliy rohining özige küchlük tesir körsetkenlikini éytti shuningdek dunya Uyghur qurultiyi re'isi dolqun eysa ependining qirghizistan Uyghur yashlirigha ewetken muraji'itini yetküzdi.

Radiyomiz ziyaritini qobul qilghan nurshat ebeydullayéf dunya Uyghur qurultiyining pa'aliyetlirige qatnashqandin kéyinki öz héssiyatlirini bayan qildi.

Pa'aliyet dawamida qirghizistanda Uyghur tilini tereqqiy qildurush mesilisi alahide muhakime qilindi. Qatnashquchilar öz pikirlirini bayan qilishti. Bu pikirler ichide Uyghur tilida lughetlerni neshr qilish, téléfon arqiliq til öginish programmilirini tesis qilish, mektep we yeslilerni échish we bashqilar bar.

Radiyomiz ziyaritini qobul qilghan orta asiyada dangliq naxshichi shöhret yaqubof, ana tilni saqlap qélishta edebiyat we naxsha muhim orunni igileydighanliqini tekitlidi.

Bu yighin'gha aktip qatnashqan Uyghur yash qurbanjan özining hés tuyghulirini izhar qilip, dolqun eysa ependining muraji'iti we nurshat ebeydullayéfning doklati, uning milliy rohini téximu kücheytkenlikini bildürdi.

Mezkur murasim rus tilida ötküzülgen bolsimu, emma uning netijisi zor boldi. "Yashliq awazi" ning ezaliri özliridin bashlap yashlarni qanchilik mumkinchilik bolsa shunchilik tiriship Uyghur tilida sözleshke dewet qilishti,

Radi'o ziyaritimizni qobul qilghan yashliq awazi topining ezasi yünüsjan, pa'aliyetning meqsiti we netijiliri toghrisida toxtilip, "Dewr söhbetliri'ni her üch ay ichide bir qétim uyushturushni qarar qilghanliqini éytti.

Murasimning axirida yashliq awazi yilliq mukapati teqdim qilindi.

"Yashliq awazi" 2014-yildin buyan qirghizistanda yétiship chiqqan Uyghur yashlarni qollap, ulargha mukapatlarni tarqitip kelmekte. Ötken yilliri bu murasimlar tentenilik naxsha-ussullar bilen ötküzülgen bolsa, bu yili ular Uyghur diyaridiki éghir weziyet tüpeylidin, oyun-tamashini chetke qoyup, "Dewr söhbiti" sheklide "Yashliq awazi-2018" mukapatini teqdim qilishti. Mezkur mukapatqa üch kishi érishti. Ular؛ "Yultuz" ansambili, yutub intérnét qanilida Uyghur ta'amlirini tonushturghan we sochi shehiride Uyghur ta'amlirini omumlashturushqa hesse qoshqan salawat ebduleziz we dunya köchmen xelqler tenheriket musabiqisige qatnashqan qurbantay bilaldinoftur.

Toluq bet