Mutexessisler: d u q rehberlirining yaponiye ziyariti Uyghur dawasigha yéngiche küch qoshti

Dunya Uyghur qurultiyi re'isi rabiye qadir xanim yétekchilikidiki d u q rehberliri 13-öktebirdin 21-öktebirgiche yaponiyede Uyghur dawasi mesililiri boyiche ziyaret élip bardi.

Yaponiyediki bir qisim mutexessisler rabiye qadir xanim bashchiliqidiki d u q rehberlirining yaponiyede muweppeqiyetlik ziyarette bolghanliqini we shundaqla bu ziyaretni chet'ellerde élip bériliwatqan Uyghur dawasigha yéngiche küch qoshti dep qaraydighanliqini bildürüshti.

Yaponiye kyushu uniwérsitéti filologiye penliri fakultétining pelsepe penliri kespiy tetqiqatchisi muxterjan abduraxman d u q rehberlirining bu qétimqi yaponiye ziyariti, yaponiye siyasitide zor özgirish bolghan nazuk bir waqitta élip bérilghan ehmiyetlik bir ziyaret bolghanliqi heqqide toxtaldi.

U sözide, bu qétimqi ziyaret yaponiye xelqining Uyghur dawasini yene bir qedem ilgiriligen halda tepsiliy chüshinishige türtkilik rol oynidi dep qarashqa bolidighanliqini bildürdi.

Muxterjan abduraxman yaponiyediki Uyghur dawasi yapon milletchiliri we shundaqla diniy uyushmilarning menpe'eti üchün xizmet qilidighan siyasiy heriket bolup qilishtin saqlinishning zörürlüki üstide toxtaldi. U yene, d u q rehberlirining yaponiyediki élip barghan türlük uchrishishliri we söhbetlirining muweppeqiyetlik élip bérilghanliqini, yaponiyediki Uyghur dawasigha yéngidin küch qoshuldi dep qarashqa bolidighanliqini bildürüsh bilen birge, buningdin kéyinki ziyaretlerde d u q rehberliri diqqet qilishqa tégishlik bezi mesililer toghrisida özining teklipi qarashlirini otturigha qoydi.

Yaponiyediki Uyghur ziyaliysi doktor turmuhemmet hashim d u q rehberlirining yaponiye ziyariti heqqide yaponiye metbu'atlirining inkasliri toghrisida qisqiche toxtilip ötti.

Yaponiyediki Uyghur mesililiri musteqil tetqiqatchisi yamada d u q rehbirlirining yaponiye ziyariti yaponiyede élip bériliwatqan Uyghur dawasigha yéngiche yol achti dep qaraydighanliqini bildürüp mundaq dédi: “Bu qétimqi rabiye qadir xanim bashchiliqidiki d u q rehberlirining ziyaritidiki eng chong yéngiliq, ziyaret ömikining meslihetchiliri pütünley yaponiyediki aliy bilim yurtlirida tetqiqat we oqutush bilen shughulliniwatqan Uyghur ziyaliyliri bolup, elwette bular yaponiyede Uyghur dawasini élip bérishta d u q rehberlirige yéqindin yardemde bolalaydu we shundaqla Uyghur dawasini toghra yolgha bashlashqa meslihet béridu, dep qaraymen.”

Yuqiriqi awaz ulinishidin tepsilatini anglang.