Әрдоғанниң уйғурлар мәсилисини алаһидә оттуриға қоюши - җумһур рәис сәвийәсидә елип берилған тунҗи сөһбәт

Ихтиярий мухбиримиз пидаий
2015.08.07
erdoghan-shi-jinping.jpg Түркийә рәис җумһури рәҗәп таййип әрдоған хитай рәиси ши җинпиң билән түркийә-хитай сода ишлири тоғрисида сөһбәттә. 2015-Йили 30-июл, бейҗиң.
XINHUA


Түркийә җумһур рәиси тайип әрдоғанниң хитайда елип барған икки күнлүк зиярити, көзәткүчиләр арисидики иҗабий вә сәлбий бәс - муназирләрни җанландурди. Уйғурлар арисидики сәлбий қарашларда әрдоғанни уйғурларниң мустәқиллиқ дәвасини сатқанлиқ вә террорлуққа бағлаш билән әйибләш бир қәдәр еғир болған болсиму, әмма йәнә бир қисим көзәткүчиләрниң нәзиридә әрдоғанниң бу қетимлиқ зиярити иҗабий нәтиҗиләр биләнму муәййәнләштүрүлүшкә болидиғанлиқи илгири сүрүлмәктә.

Зияритимизни қобул қилған түркийәдики мустәқил көзәткүчи, журналист азадҗан буғра әпәнди әрдоғанниң бу қитимлиқ зияритини уйғурларниң мустәқиллиқ дәвасини тонутушта пәвқуладдә рол ойниғанлиқи вә хитайлар билән икки дөләт мунасивәтлиридә муһим маддиға айлиниватқанлиқтәк тарихий қиммәткә игә илгириләш дәп қарайдиғанлиқини билдүрди.

Униң қаришичә, рәҗәп тайип әрдоғанниң бу қитимлиқ зияритидә уйғурлар мәсилисини алаһидә оттуриға қоюши, җумһур рәис сәвийәсидә елип берилған тунҗи сөһбәт болуп, кәлгүсидә техиму моһим бир мәсилә сүпитидә гәвдилиниши үчүн бесилған мувәппәқийәтлик тунҗи қәдәм дейишкә болидикән.

Униң билдүрүшичә, мәзкур зиярәткә алақидар түрлүк мәтбуатларда йәр алған сәлбий пикирләрниң тиркишишлири шәхсий вә партийиви адавәтлиригә уйғур дәвасини сүйестимал қилишқа урунуватқанлиқиниң ипадисидур.

Азатҗан буғра әпәнди әрдоғанниң террорлуққа мунасивәтлик сөз ипадилири һәққидә тохтилип, уйғур дәвасини террорлуққа бағлиғанлиқидәк көз қарашларниң асассиз икәнликини оттуриға қойди вә шәрқий түркситан ислам партийисигә мунасивәтлик баянлар һәққидә тохталди.

Униң қаришичә, бу қитимлиқ сөһбәт ислам тарихидики һудәйбийә сөһбитигә охшаш, зиянлиқ көрүнгән пайдилиқ сөһбәттур.

Азатҗан буғра әпәнди йәнә бу қитимлиқ әрдоған зияритидә уйғурлар мәсилисиниң алаһидә музакирә қилинишидин, уйғур дәвасиниң хәлқарада тонулушидики ролиға сәл қаримаслиққа ишарә қилди.

У йәнә мушундақ бир пәйттә, уйғурларниң өз давасиға игә чиқиш үчүн техиму сәзгүр болушини вә қайси нуқтиларға диққәт қилиши вә әһмийәт бириши лазимлиқи һәққидә ойлиғанлирини радио аңлиғучилиримиз билән ортақлашти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.