Erdoghanning Uyghurlar mesilisini alahide otturigha qoyushi - jumhur re'is sewiyeside élip bérilghan tunji söhbet

Türkiye jumhur re'isi tayip erdoghanning xitayda élip barghan ikki künlük ziyariti, közetküchiler arisidiki ijabiy we selbiy bes - munazirlerni janlandurdi. Uyghurlar arisidiki selbiy qarashlarda erdoghanni Uyghurlarning musteqilliq dewasini satqanliq we térrorluqqa baghlash bilen eyiblesh bir qeder éghir bolghan bolsimu, emma yene bir qisim közetküchilerning neziride erdoghanning bu qétimliq ziyariti ijabiy netijiler bilenmu mu'eyyenleshtürülüshke bolidighanliqi ilgiri sürülmekte.

Ziyaritimizni qobul qilghan türkiyediki musteqil közetküchi, zhurnalist azadjan bughra ependi erdoghanning bu qitimliq ziyaritini Uyghurlarning musteqilliq dewasini tonutushta pewqul'adde rol oynighanliqi we xitaylar bilen ikki dölet munasiwetliride muhim maddigha ayliniwatqanliqtek tarixiy qimmetke ige ilgirilesh dep qaraydighanliqini bildürdi.

Uning qarishiche, rejep tayip erdoghanning bu qitimliq ziyaritide Uyghurlar mesilisini alahide otturigha qoyushi, jumhur re'is sewiyeside élip bérilghan tunji söhbet bolup, kelgüside téximu mohim bir mesile süpitide gewdilinishi üchün bésilghan muweppeqiyetlik tunji qedem déyishke bolidiken.

Uning bildürüshiche, mezkur ziyaretke alaqidar türlük metbu'atlarda yer alghan selbiy pikirlerning tirkishishliri shexsiy we partiyiwi adawetlirige Uyghur dewasini süy'éstimal qilishqa urunuwatqanliqining ipadisidur.

Azatjan bughra ependi erdoghanning térrorluqqa munasiwetlik söz ipadiliri heqqide toxtilip, Uyghur dewasini térrorluqqa baghlighanliqidek köz qarashlarning asassiz ikenlikini otturigha qoydi we sherqiy türksitan islam partiyisige munasiwetlik bayanlar heqqide toxtaldi.

Uning qarishiche, bu qitimliq söhbet islam tarixidiki hudeybiye söhbitige oxshash, ziyanliq körün'gen paydiliq söhbettur.

Azatjan bughra ependi yene bu qitimliq erdoghan ziyaritide Uyghurlar mesilisining alahide muzakire qilinishidin, Uyghur dewasining xelq'arada tonulushidiki roligha sel qarimasliqqa ishare qildi.

U yene mushundaq bir peytte, Uyghurlarning öz dawasigha ige chiqish üchün téximu sezgür bolushini we qaysi nuqtilargha diqqet qilishi we ehmiyet birishi lazimliqi heqqide oylighanlirini radi'o anglighuchilirimiz bilen ortaqlashti.