Хаинлиқ вә униң инсанийәткә болған зийини

Ихтиярий мухбиримиз өмәрҗан
2013-10-26
Share
Nur-bekri-Urumchi-Basturush-305 Сүрәт, уйғур аптоном райониниң рәиси нур бәкриниң 6 - ийул күни, шинҗаң телевизийиси вә хитай мәркизи хәлқ телевизийисидә сөз қилип, шавгүән вәқәси вә үрүмчи намайиши һәққидә ипадә билдүрүватқан көрүнүш.
http://news.cctv.com

 

Қәдимдин һазирғичә «хаин» сөзи милләткә вә вәтәнгә ашкара һәм йошурун асийлиқ қилип кәлгән кишиләргә қаритилип кәлгән бир аталғу болуп, һазирқи күндә униң даириси кеңийип кәткән.
Заманимизда «хаин» сөзи вәтән вә милләткә асийлиқ қилғучиларни өз ичигә алғанниң сиртида, мунапиқларни, чеқимчиларни, өз миллитиниң зийиниға чапидиған ғалчиларни, сатқунларни вә һәқиқәткә көз юмғучиларниму өз ичигә алиду.
Хаинлар вәтән вә милләтни ғаҗайдиған чашқанлар, милләтниң гөркари, хәлқниң қенини йошуруғучи, өз қериндашлириниң бешини бесимдарларға сунғучи әбләхләрдур. Уйғур миллитидики хаинлар тәбиқиси зор көпчилик язғучилар вә шаирларни, қара қорсақ, җан бақар моллиларни, һоқуқ билән мәнсәп үчүн һәр нәрсисидин кечидиған ачкөз әмәлдарларни, мәнсәп тәмәсидә өз миллитини сетишни кәсип қиливалған ғалчиларни вә ишчи, хизмәтчи, деһқанлар қатлимидики бир қисимларниму өз ичигә алиду.
Хаинлиқ - теги пәсликтур
20 - Әсирниң мәшһур ислам мутәпәккури әлламә муһәммәд ғәззали хаинлиқ вә униң рәзиллики һәққидә мундақ дәп язған:«хаинлиқ бир хил рәзил қилмиш. Уни мәнивийити булғанған, роһи кор, нәпсанийәтчилик идийиси күчлүк, интайин пәс адәмләр садир қилиду. Ислам нәзиридә хаинлиқниң гунаһи мунапиқлиқ вә капирлиқниң гунаһидин еғир икәнликидә шәк йоқ. Қуран кәримидә:«хиянәткә адәтләнгән, гунаһқа чөмгән кишини алла һәқиқәтән дост тутмайду» дәп кәлгән. Бир һәдистә: «алла бирәр бәндисини һалак қилмақчи болса, униңдин һаяни суғуруп алиду, униңдин һая суғуруп елинғандин кейин, у һәр кимниң нәпритигә вә ғәзипигә лайиқ бири болуп қалиду, униңдин кейин, униңдин аманәт йоқилиду, униңдин аманәт йоқалғандин кейин, у һәмишә хиянәт қилидиған хаинға айлинип қалиду, у хаинға айланғандин кейин, униңдин рәһим _ шәпқәт йоқилиду, униңдин рәһим _ шәпқәт йоқалғандин кейин, у киши ләнәткәрдигә айлиниду, у ләнәткәрди болғандин кейин, иман униңдин чиқип кетиду» дәп кәлгән. Хаинлар мәйли өзиниң қовм - қериндашлири, мәйли өзлири ишлигән хоҗайинлири тәрипидин һәргизму яхшилиққа еришәлмәйду. Чүнки хаин - миллитидин танған тузкор болғанлиқтин, уни башқилар әмәс, өзиниң қовм - қериндашлириму сөймәйду. Униңдин нәпрәтлиниду. Мундақ хаинларни ишләткән хоҗайинлириму уларға ишәнч қилмайду, сөймәйду, вапа қилмайду, ахири уларни уҗуқтуруп түгитиду. Чүнки өзиниң қовм - қериндашлиридин танған, уларниң зийини үчүн ишлигән хаинларни ишләткән хоҗайинларму уларниң вапасизлиқини, тузкорлуқини, вақти кәлсә хоҗайинлириниму сетип қойидиғанлиқини яхши билиду - дә, уларға вақтинчә инамларни қилип туруп хизмәтлиригә селип болупла улардин қутулушниң койиға кириду. Дуняда хаиндәк пәскәш, зиянкар, номуссиз вә әхмәқ мәхлуқ болмиса керәк. Чүнки у миллитиниңла әмәс, алди билән өзиниң гөрини колайду әмәсму?!»
Уйғурлардин чиққан хаинларниң зийиниму аз болмиған
Мәрипәт тор бекитидә елан қилинған мақалиләрниң биридә, уйғур зиялийлиридин бириниң мундақ дәп язғанлиқи қәйт қилинған: «мунапиқлиқ әнә шундақ теги пәслик вә учиға чиққан рәзилликтур. Уйғур миллитидин чиққан, теги пәс, рәзил хаинларниң хәлқимизгә салған зиянлири аз болмиған. Мәсилән: миладийә 8 - әсирдә уйғур дөлитиниң йимирилип ташлинишиға уйғур дөлитиниң сарийидики бир қисим хаин, мунапиқларниң пүтүн мәхпийәтликләрни қарши тәрәпкә йәткүзүп қоюш арқилиқ өз дөлитигә хиянәт қилғанлиқи сәвәб болған. Шундақла сәидийә ханлиқиниң йимирилип қалмақларниң қолиға өтүп кетишидиму, мәнсәп тәмәсидә дүшмәнгә сетилип кәткән апақ хоҗа башчилиқидики мунапиқларниң хаинлиқи асаслиқ рол ойниған. Һазирму бу хилдики мунапиқларниң хәлқимизгә болған зиянкәшлики давам қилмақта.
Һазирму бесимдарларниң азрақ инамиға алдинип өз хәлқини уларға тутуп беридиған, қорсиқи йоғинап қалған аялларни пиланлиқ туғутниң ғалчилириға чеқип қойидиған, бирәр адәмниң балиларни аллаһни вә рәсулуллаһни тонутқанлиқини билип қалса сақчиларни башлап келидиған, хәлқим, миллитим дегәнләрниң каллисини залимларға совғат қилидиған һайван миҗәз хаинлар, сатқунлар вә мунапиқлар аз әмәс.»
Чеқимчилиқ вә униң хәтәрлири
Чеқимчилиқ __ биравни зиянға учритиш үчүн униң һәққидә башқилардин аңлиған бир - икки еғиз гәпни, ялған сөзләр билән көптүрүп қарши тәрәпкә аңлитиш ялғанчилиқи болуп, хаинлиқниң бир түридур. Бу адәттики гәп тошуштин пәрқлиқ җинайәттур. Чүнки гәп тошуш мәқсәтсизму әмәлгә ашиду. Әмма чеқимчилиқ рәзил мәқсәтләр арқисида елип берилиду. Бундақ чеқимчилиқ шу инсанниң нийити бузуқ, роһи кесәл, бипәрва адәм икәнликини билдүриду.
Бир қетимлиқ чеқимчилиқниң сәвәби билән достлар вә аилиләр оттурисида өчмәнлик пәйда болуп, бәхтниң асаси болған хатирҗәмлик, инақлиқ бузулиду. Иҗтимаий һаятта чеқимчилиққа қарши турушниң үнүмлүк чариси __ чеқимчиниң сөзигә қулақ салмаслиқ, яки ишәнмәсликтур. Чеқимчиниң яман ақивити тоғрулуқ пәйғәмбәр әләйһиссалам: «кимки бир кишиниң башқилар аңлап қелишини яқтурмайдиған сөзини аңлитип қойидикән, қиямәт күни униң икки қулиқиға қоғушун қоюлиду»(1) дәп көрсәткән.
Мәсчитләргә киргән ишчи - хизмәтчиләрни чеқип қоюш, еғир аяқ икәнлики билинип қалған аялларни дәрһал мәлум қилиш, қошнисиниң өйигә кирип чиққанларни тизимлаш, яратқучисини тонуш йолида мәхпий һалда диний билим оқуғанларни сақчиларға мәлум қилип тутуп бериш қатарлиқ хаинлиқ түрлирини садир қилидиғанлар хоҗайинлири тәрипидин берилидиған азғинә вақитлиқ инамларға сетилип, өз миллитини қурутуш йолиға киргән мәлунлардур. Мундақ мәлунлар һазирқи уйғур җәмийитиниң юқири - төвән һәммә қатламлирида толуп ташмақта. Мундақларда азрақ болсиму иман вә виҗдан йоқмиду? уларни өзиниң қовм - қериндашлирини сетиштин тосидиған кичиккинә болсиму адимийлик ғуруриму қалмиғанмиду? улар өзлириниң ечинишлиқ ақивитини һес қилмамдиғанду?!

 

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.