Уйғур районида мәсчитләрдә һейт намизидин аввал байрақ чиқирилидиғанлиқи мәлум

Мухбиримиз шөһрәт һошур
2017.08.31
Yangxang-meschit-roza-heyt-namaz-bayraq-1.jpg Роза һейт намизидин илгири яңхаң мәсчити алдида чиқирилған қизил байрақ. 2017-Йили 26-июн, үрүмчи.
Social Media

Хитай даирилири өткән роза һейтта үрүмчи хантәңри мәсчитидә һейт намизидин аввал байрақ чиқириш мурасими өткүзгән иди.

Бу һәптә иҗтимаий таратқуларда тарқалған бир уқтурушта үрүмчидики бир туңган мәсчитидә бу қурбан һейттиму мәсчиттә байрақ чиқирилидиғанлиқи уқтурулған, мухбиримизниң бүгүн бу һәқтә хотәнгә қарита елип барған телефон зиярити давамида, хотәндики бир қисим кәнт мәсчитлиридә қурбан һейт намизидин аввал байрақ чиқиришқа һазирлиниватқанлиқи ашкариланди. Дуня уйғур қурултийи диний ишлар комитети бүгүн бу һәқтә позитсийә билдүрүп хитайниң мәзкур қилмишини районниң сиясий вә иҗтимаий вәзийитигә нисбәтән илгириләп қутратқулуқ қилиш дәп әйиблиди.

Биз қурбан һейтта һейт намизидин аввал байрақ чиқириш мурасими өткүзүлидиғанлиқи һәққидики мәзкур уқтурушниң тарқилиш даирисини ениқлаш үчүн хотәндики бир қисим йеза вә кәнтләргә телефон қилдуқ.

Йезилиқ сақчихана хадимлири вә кәнт секретарлири өзлириниң қурбан һейтлиқ бихәтәрлик тәдбирлири һәққидә мәлумат бәрди. Хотәнниң шәһәр ичкидики илчи йезиси вә лоп наһийәсиниң чарбағ йезисидики бәзи кәнтләр, қурбан һейтта һейт намизидин аввал байрақ чиқиришниң тәйярлиқини қилмақта.

Мәлум болушичә хотәндә даириләр қурбан һейтта кишиләрниң көп санда топлишишниң алдини елиш үчүн, аһалиләрни мәркизи мәсчитләргә топлинивалмаслиққа, һейт намизини йеза яки шәһәр мәсчитидә әмәс, бәлки кәнт мәсчитлиридә оқушқа чақириқ қилған.

Хотән шәһәрлик партком бинасиниң аманлиқ әтрити, бу йиллиқ қурбан һейтта хитай миллитидин болған кадирларни қоғдашни муһим вәзипиләрдин бири қилғанлиқини ашкарилиди.

Дуня уйғур қурултийи диний ишлар комитети мудири турғунҗан алавудун әпәнди, бүгүн бу һәқтә пикир баян қилди.

Униң баян қилишичә, хитайниң бәш юлтуз қизил байриқи һәм мустәмликичи һәм коммунист бир һакимийәтниң байриқи, бундақ бир байрақниң уйғур районида мәвҗут болушиниң өзини уйғурлар әвладмуәвлад қобул қилмайватқан бир вәзийәттә, униң мәсчитләргә қәдәр көтүрүлүп кириши, бир қутратқулуқ.

Хитайниң мәсчиттә байрақ чиқириш мурасими өткүзүшни бир хил сиясий әсәбийлик, дәп әйиблигән турғунҗан әпәнди, қутратқулуқниң һечқандақ бир гуруһқа пайда елип келәлмәйдиғанлиқини әскәртти.

Турғунҗан алавудун әпәнди қутратқулуқниң йиллардин бери муқимлиқ шоарини тохтимай товлатқан хитай даирилири үчүнму ахирқи һесабта еғир зиянлиқ ақивәтләрни туғдуридиғанлиқини тәкитлиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.