Uyghur rayonida meschitlerde héyt namizidin awwal bayraq chiqirilidighanliqi melum

Muxbirimiz shöhret hoshur
2017.08.31
Yangxang-meschit-roza-heyt-namaz-bayraq-1.jpg Roza héyt namizidin ilgiri yangxang meschiti aldida chiqirilghan qizil bayraq. 2017-Yili 26-iyun, ürümchi.
Social Media

Xitay da'iriliri ötken roza héytta ürümchi xantengri meschitide héyt namizidin awwal bayraq chiqirish murasimi ötküzgen idi.

Bu hepte ijtima'iy taratqularda tarqalghan bir uqturushta ürümchidiki bir tunggan meschitide bu qurban héyttimu meschitte bayraq chiqirilidighanliqi uqturulghan, muxbirimizning bügün bu heqte xoten'ge qarita élip barghan téléfon ziyariti dawamida, xotendiki bir qisim kent meschitliride qurban héyt namizidin awwal bayraq chiqirishqa hazirliniwatqanliqi ashkarilandi. Dunya Uyghur qurultiyi diniy ishlar komitéti bügün bu heqte pozitsiye bildürüp xitayning mezkur qilmishini rayonning siyasiy we ijtima'iy weziyitige nisbeten ilgirilep qutratquluq qilish dep eyiblidi.

Biz qurban héytta héyt namizidin awwal bayraq chiqirish murasimi ötküzülidighanliqi heqqidiki mezkur uqturushning tarqilish da'irisini éniqlash üchün xotendiki bir qisim yéza we kentlerge téléfon qilduq.

Yéziliq saqchixana xadimliri we kent sékrétarliri özlirining qurban héytliq bixeterlik tedbirliri heqqide melumat berdi. Xotenning sheher ichkidiki ilchi yézisi we lop nahiyesining charbagh yézisidiki bezi kentler, qurban héytta héyt namizidin awwal bayraq chiqirishning teyyarliqini qilmaqta.

Melum bolushiche xotende da'iriler qurban héytta kishilerning köp sanda toplishishning aldini élish üchün, ahalilerni merkizi meschitlerge topliniwalmasliqqa, héyt namizini yéza yaki sheher meschitide emes, belki kent meschitliride oqushqa chaqiriq qilghan.

Xoten sheherlik partkom binasining amanliq etriti, bu yilliq qurban héytta xitay millitidin bolghan kadirlarni qoghdashni muhim wezipilerdin biri qilghanliqini ashkarilidi.

Dunya Uyghur qurultiyi diniy ishlar komitéti mudiri turghunjan alawudun ependi, bügün bu heqte pikir bayan qildi.

Uning bayan qilishiche, xitayning besh yultuz qizil bayriqi hem mustemlikichi hem kommunist bir hakimiyetning bayriqi, bundaq bir bayraqning Uyghur rayonida mewjut bolushining özini Uyghurlar ewladmu'ewlad qobul qilmaywatqan bir weziyette, uning meschitlerge qeder kötürülüp kirishi, bir qutratquluq.

Xitayning meschitte bayraq chiqirish murasimi ötküzüshni bir xil siyasiy esebiylik, dep eyibligen turghunjan ependi, qutratquluqning héchqandaq bir guruhqa payda élip kélelmeydighanliqini eskertti.

Turghunjan alawudun ependi qutratquluqning yillardin béri muqimliq sho'arini toxtimay towlatqan xitay da'iriliri üchünmu axirqi hésabta éghir ziyanliq aqiwetlerni tughduridighanliqini tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.