Yaponiyede ilham toxtigha béghishlan'ghan twitér tori namayishi dawam qilmaqta

Ixtiyariy muxbirimiz haji qutluq qadiri
2014.01.20
turmemet-ilham-toxti-twitter.jpg Yaponiyediki Uyghur ziyaliysi doktor turmuhemmet hashim özining 15 mingdin oshuq ezasi bolghan twitér tor bétide ilham toxtining baldurraq qoyup bérilishini telep qilip, twitér tor békitide qilghan namayishi.
Twitter

15-Yanwar xitay da'iriliri béyjingdiki öktichi Uyghur ziyaliysi ilham toxtini tutup ketkenliki ashkarilan'ghandin kéyin, yaponiyediki Uyghur ziyaliysi doktor turmuhemmet hashim özining 15 mingdin oshuq ezasi bolghan twitér tor bétide 17-yanwardin bashlap ilham toxtining baldurraq qoyup bérilishini telep qilip, twitér tori namayishini bashlighan.

Ziyaritimizni qobul qilghan, mezkur namayishqa aktip awaz qoshuwatqan qanunshunas yamagajo twitér toridiki namayish arqiliq ilham toxtining xitay da'iriliri teripidin tutup kétilgenlikini we uning ilgirimu amérikigha méngish sepiride béyjing ayrodromida tosqunluqqa uchrighanliqidin xewerdar bolghanliqini bildürdi.

Bu qétimqi twitér tori namayishi “Dotsént ilham toxtining tizdin qoyup bérilishini telep qilish uyushmisi” dégen sözni achquchluq sözler qilip, twitér we féysbuk arqiliq yaponiye we dunyaning her qaysi jayliridiki insanperwer kishilerdin ilham toxtining mesilisige yéqindin köngül bolushini telep qilghan.

Bir qanche kündin buyan dawamlishiwatqan bu twitér tori namayishigha nurghunlighan kishiler yéqindin awaz qoshup özlirining ilham toxtigha bolghan hésdashliqini bildürgen.

Twitér tori namayishigha ishtirak qiliwatqan tordashlardin raku'an okomésky isimlik tordash ilham toxtining zorluq bilen tutup kétilgenlikige naraziliq bildürüp mundaq inkas qaldurghan: “Xitay hökümitining Uyghurlargha bolghan pozitsiyisi gheyriy boluwatidu. San-sanaqsiz basturushlar, köp qétimliq atom bombisi sinaqliri, Uyghurlarning tupraqlirini bulash, herxil bahane-sewebler bilen adem öltürüsh, bu naheqchilikke qarshi chiqqan insan heqliri pa'aliyetchilirini tutup qamap qoyush qatarliqlarning hemmisi hazirqi zamanda qobul qilghili bolmaydighan intayin gheyriy ishlar. Men ilham toxtining derhal qoyup bérilishini telep qilimen.”

Undin bashqa yene, kinoko isimlik tordash öz héssiyatini bayan qilip mundaq inkas qaldurghan: “Xitay kompartiyisidiki kishilerge démekchimenki, hazir 21-esir, jungxu'a xelq jumhuriyiti dunyadiki ikkinchi chong iqtisadi zorayghan memliket. Medeniyet zor inqilabi alliqachan axirlashti. Insanlarning söz qilishini cheklesh nomus.

Köpligen tordashlar؛ “Uyghurlarning musteqil bolushini qollaymen. Xelqlerni xalighanche basturup, zehiri dunyagha chéchiliwatqan xitay kompartiyisi ilham toxtini derhal qoyup bérishi kérek” dégendek inkaslarni qaldurghan.

Mezkur twitér tori namayishigha ishtirak qiliwatqan yokoyama xanim téléfon ziyaritimizni qobul qilip mundaq dédi:

-Men ilham toxtining tutup kétilgenlikige tolimu epsuslandim. Ilham toxti bir tetqiqatchi, uning maqaliliri peqetla Uyghurlar toghrisidiki tetqiqat maqaliliri bolup, uning maqaliliride xitay hökümitige qarshi héchqandaq mezmun yoq. Xitay hökümiti buni chongqur oylinip körse bolidu.

Twitér tori namayishi 17-yanwar bashlan'ghan bolup, igilishimizche bu namayish ilham toxti qoyup bérilgüche dawamlishidiken.

Axirida biz, mezkur namayish heqqide bezi uchurlargha ige bolush üchün, namayishni uyushturghuchi doktor turmuhemmet hashim bilen téléfon söhbiti élip barduq.

Awaz ulinishidin tepsilatini anglang.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.