Уйғур паалийәтчиләр: “техиму көп ғәрп демократик дөләтлири уйғурларниң ирқий қирғинчилиққа учраватқанлиқини етирап қилиши керәк”

Германийә федерал парламент әзаси маргирита бавзи ханим 22-април күни баянат елан қилип, 17-май күни германийә парламенти кишилик һоқуқ кометитида “уйғурларниң ирқий қирғинчилиққа учраватқанлиқи” мәсилиси муһакимә қилинидиғанлиқини билдүргән.

Германийәдики “илһам тохти иниститути” ниң башлиқи әнвәрҗан әпәнди зияритимизни қобул қилип, маргарита бавзи ханимниң баянати вә германийә парламенти кишилик һоқуқ кометитида өткүзүлидиған “уйғурларниң ирқий қирғинчилиққа учраватқанлиқи тоғрисидики муһакимә йиғини” ниң орунлаштурулуши һәққидә мәлумат бәрди.

Әнвәрҗан әпәндиниң билдүрүшичә, германйә йешиллар партийәсидин болған парламент әзалиридин маргирита бавзи ханим вә һакимийәт бешидики бирләшмә һөкүмитиниң вәкили болған микайил бранд вә франк шиваби қатарлиқ сиясийонлар уйғурлар мәсилисигә йеқиндин көңүл бөлүп келиватқан кишиләр икән.

Әнвәрҗан әпәнди баянида бу сиясийонларниң германийәдә паалийәт елип бериватқан уйғур тәшкилатлирини йеқиндин қоллап келиватқанлиқини тәкитлиди. Уларниң бундин илгириму германийә һөкүмитидин “уйғурлар учраватқан зулумға җиддий диққәт беришни вә бу мәсилидә хитай һөкүмитигә қарита тәдбир қоллинишни үзлүксиз тәләп қилип кәлгәнликини билдүрди.

Мәлум болушичә, дуня уйғур қурултийи, илһам тохти иниститоти, германийә шәрқий түркистан бирлики қатарлиқ уйғур тәшкилатлири узундин буян германийә һөкүмитидин хитайниң уйғурларға йүргүзүватқан вәһшиянә бастурушини “ирқий қирғинчилиқ” дәп етирап қилиш вә хитай һөкүмитигә қарита җаза тәдбири қоллинишни үзлүксиз тәләп қилип кәлгән.

Дуня уйғур қурултийиниң баянатчиси дилшат ришит әпәндиму зияритимизни қобул қилип, бу йилниң бешидин башлап америка, канада, голландийә, әнгилийә қатарлиқ дөләтләрдә уйғурларниң ирқий қирғинчилиққа учраватқанлиқи етирап қилинғандин кейин, нөвәттә франсийә, белгийә вә германийәгә охшаш техиму көп ғәрп демократик дөләтлиридә уйғурларниң ирқий қирғинчилиққа учраватқанлиқи етирап қилинидиған вәзийәт һазирланғанлиқини билдүрди.

Дилшат ришит әпәнди йәнә хитайниң америка қатарлиқ ғәрп демократик дөләтлириниң “уйғурлар ирқий қирғинчилиққа учраватиду” дегән қарариға болған қайтурма һуҗуминиң пүтүнләй асассиз икәнликини билдүрди.

Дилшат ришит әпәнди сөзидә йеқинқи 3 йилдин буян ғәрп дөләтләтлиридә уйғурларниң ерқий қирғинчилиққа учраватқанлиқи һәққидики нурғунлиған пакитлиқ испатларниң ашкарилиниши, ғәрп демократик дөләтлиридә бундақ бир қарарниң елинишиға қануний ассас болғанлиқини билдүрди.

Дилшат ришит әпәндиниң тәкитлишичә, “уйғурларниң ирқий қирғинчилиққа учраватқанлиқи” дәк бу җиддий мәсилисидә ғәрп демократик дөләтлири өз-ара һәмкарлишип, хитайға қарита ортақ бир җаза тәдбири қоллиниши керәк икән.