Uyghur pa'aliyetchiler: “Téximu köp gherp démokratik döletliri Uyghurlarning irqiy qirghinchiliqqa uchrawatqanliqini étirap qilishi kérek”

Gérmaniye fédéral parlamént ezasi margirita bawzi xanim 22-april küni bayanat élan qilip, 17-may küni gérmaniye parlaménti kishilik hoquq kométitida “Uyghurlarning irqiy qirghinchiliqqa uchrawatqanliqi” mesilisi muhakime qilinidighanliqini bildürgen.

Gérmaniyediki “Ilham toxti inistituti” ning bashliqi enwerjan ependi ziyaritimizni qobul qilip, margarita bawzi xanimning bayanati we gérmaniye parlaménti kishilik hoquq kométitida ötküzülidighan “Uyghurlarning irqiy qirghinchiliqqa uchrawatqanliqi toghrisidiki muhakime yighini” ning orunlashturulushi heqqide melumat berdi.

Enwerjan ependining bildürüshiche, gérmanye yéshillar partiyesidin bolghan parlamént ezaliridin margirita bawzi xanim we hakimiyet béshidiki birleshme hökümitining wekili bolghan mikayil brand we frank shiwabi qatarliq siyasiyonlar Uyghurlar mesilisige yéqindin köngül bölüp kéliwatqan kishiler iken.

Enwerjan ependi bayanida bu siyasiyonlarning gérmaniyede pa'aliyet élip bériwatqan Uyghur teshkilatlirini yéqindin qollap kéliwatqanliqini tekitlidi. Ularning bundin ilgirimu gérmaniye hökümitidin “Uyghurlar uchrawatqan zulumgha jiddiy diqqet bérishni we bu mesilide xitay hökümitige qarita tedbir qollinishni üzlüksiz telep qilip kelgenlikini bildürdi.

Melum bolushiche, dunya Uyghur qurultiyi, ilham toxti inistitoti, gérmaniye sherqiy türkistan birliki qatarliq Uyghur teshkilatliri uzundin buyan gérmaniye hökümitidin xitayning Uyghurlargha yürgüzüwatqan wehshiyane basturushini “Irqiy qirghinchiliq” dep étirap qilish we xitay hökümitige qarita jaza tedbiri qollinishni üzlüksiz telep qilip kelgen.

Dunya Uyghur qurultiyining bayanatchisi dilshat rishit ependimu ziyaritimizni qobul qilip, bu yilning béshidin bashlap amérika, kanada, gollandiye, en'giliye qatarliq döletlerde Uyghurlarning irqiy qirghinchiliqqa uchrawatqanliqi étirap qilin'ghandin kéyin, nöwette fransiye, bélgiye we gérmaniyege oxshash téximu köp gherp démokratik döletliride Uyghurlarning irqiy qirghinchiliqqa uchrawatqanliqi étirap qilinidighan weziyet hazirlan'ghanliqini bildürdi.

Dilshat rishit ependi yene xitayning amérika qatarliq gherp démokratik döletlirining “Uyghurlar irqiy qirghinchiliqqa uchrawatidu” dégen qararigha bolghan qayturma hujumining pütünley asassiz ikenlikini bildürdi.

Dilshat rishit ependi sözide yéqinqi 3 yildin buyan gherp döletletliride Uyghurlarning érqiy qirghinchiliqqa uchrawatqanliqi heqqidiki nurghunlighan pakitliq ispatlarning ashkarilinishi, gherp démokratik döletliride bundaq bir qararning élinishigha qanuniy assas bolghanliqini bildürdi.

Dilshat rishit ependining tekitlishiche, “Uyghurlarning irqiy qirghinchiliqqa uchrawatqanliqi” dek bu jiddiy mesiliside gherp démokratik döletliri öz-ara hemkarliship, xitaygha qarita ortaq bir jaza tedbiri qollinishi kérek iken.