Бил гертз: “дуня ойғиниши, хитайниң уйғурларға йүргүзүватқан ирқий қирғинчилиқиға бирдәк қарши туруши керәк!”

Вашингтондин мухбиримиз шадийә тәйярлиди
2023.10.18
Bill-Gertz.jpg “йеңи ера қурулуши” намлиқ аммиви тәшкилатиниң орунлаштуруши билән өткүзүлгән йиғинда “хитай тәһдити” вә “қипқизил ялғанчилиқ” намлиқ китабларниң аптори бил гертз (Bill Gertz) әпәнди сөзлимәктә. 2023-Йили 7-өктәбир.
Erkin Sidiq

Йеқинда калифорнийә шитатиниң лос-анжелис шәһиридә “йеңи ера қурулуши” намлиқ аммиви тәшкилатиниң орунлаштуруши билән “әнәнә вә аилә: сағлам, муқим вә күчлүк америка бәрпа қилиш үчүн зөрүр болған қиммәт қарашлар” дегән темида муһакимә йиғини өткүзүлгән.

Игилинишичә, 7-өктәбир күни өткүзүлгән бу паалийәткә америка аләм қатниши идариси (NASA) ниң инженери доктор әркин сидиқ әпәнди алаһидә тәклип билән қатнашқан. Бу паалийәткә йәнә “аләмни алдаш: коммунист хитайниң йәр шаридики дәриҗидин ташқири күчкә айлиниш үчүн елип бериватқан ичкий урунушлири” намлиқ китабниң аптори бил гертз (Bill Gertz) әпәндиму алаһидә тәклип билән қатнашқан. Бу қетимлиқ муһакимә йиғинида “сағлам, муқим вә күчлүк америка бәрпа қилиш” һәққидики темилар музакирә қилинғандин сирт йәнә хитай вәзийитини йеқиндин көзитип келиватқан бир қисим мутәхәссисләр, хитай һакимийитиниң уйғур елидә йүргүзүватқан зораванлиқ сиясити вә җинайи қилмишлири тоғрисидиму муһакимә елип барған.

“йеңи ера қурулуши” намлиқ аммиви тәшкилатиниң орунлаштуруши билән өткүзүлгән йиғинда америка аләм қатниши идариси (NASA) ниң инженери доктор әркин сидиқ әпәнди сөзлимәктә. 2023-Йили 7-өктәбир.
“йеңи ера қурулуши” намлиқ аммиви тәшкилатиниң орунлаштуруши билән өткүзүлгән йиғинда америка аләм қатниши идариси (NASA) ниң инженери доктор әркин сидиқ әпәнди сөзлимәктә. 2023-Йили 7-өктәбир.
Erkin Sidiq

Доктор әркин сидиқ әпәнди радийомизниң зияритини қобул қилип, алди билән бу қетимлиқ муһакимә йиғинида оттуриға қоюлған асаслиқ темилар һәққидә аңлармәнләргә учур бәрди. Униң билдүрүшичә, бу қетимлиқ муһакимә йиғинида йеқинқи 10 йил мабәйнидә американиң қиммәт қариши вә әхлақий өлчәмлиридә йүз бериватқан өзгиришләр оттуриға қоюлған. Шундақла қандақ қилғанда америка қиммәт қарашлиридики пассип йүзлинишләрни тосуш вә униң алдини елиш; американиң иккинчи дуня урушидин кейинки демократик дуняға нәмунә болған әнәниви қиммәт қарашлириға қайтиш; американи йеңибаштин дунядики әң улуғ, қудрәтлик вә йетәкчи дөләт қилип қуруп чиқиш тоғрилиқ муһакимә елип берилған. Мәзкур йиғинда йәнә хитай компартийәсиниң қандақ қилип америкада өз тәшвиқати вә коммунизм мәпкурисини тарқитиватқанлиқи, американиң қиммәт қаришини өзгәртип уни начар тәрәпкә йөнләндүрүватқанлиқи паш қилинған.

“йеңи ера қурулуши” намлиқ аммиви тәшкилатиниң орунлаштуруши билән өткүзүлгән йиғинға қатнашқучилар хатирә сүрәттә. 2023-Йили 7-өктәбир.
“йеңи ера қурулуши” намлиқ аммиви тәшкилатиниң орунлаштуруши билән өткүзүлгән йиғинға қатнашқучилар хатирә сүрәттә. 2023-Йили 7-өктәбир.

Бу қетимлиқ муһакимә йиғиниға “йеңи ера қурулуши” тәшкилатиниң рәһбәрлири, лос-анжелистики һәрқайси оттура мәктәп вә кәспий орунлардин болуп, нурғун киши қатнашқан. Мәлум болушичә, “йеңи ера қурулуши” тәшкилатиниң әзалири американиң әнәниви қиммәт қаришини яқлайдиған һәмдә уларни қоғдап, американи бурунқи қияпитигә қайтуруп келишини арзу қилидиған кишиләрдин тәшкил тапқан икән. “вашингтон вақит гезити” ниң дөләт хәвпсизлики бойичә алаһидә мухбири бил гиртис (Bill Gertz), бу йиғинда хитайниң америка вә дунядики башқа әлләргә елип келиватқан тәһдитлири үстидә сөз қилған. Йиғин ахирлашқандин кейин, бил гиртис әпәнди радийомизниң мәхсус зияритини қобул қилип өзиниң қарашлирини аңлармәнләр билән ортақлашти. У хитайниң нөвәттә дуняға елип келиватқан тәһдити һәққидә тохтилип мунуларни деди.

“вашингтон вақит гезити” ниң дөләт хәвпсизлики бойичә алаһидә мухбири бил гиртис (Bill Gertz) ниң “аләмни алдаш: коммунист хитайниң йәр шаридики дәриҗидин ташқири күчкә айлиниш үчүн елип бериватқан ички урунушлири” намлиқ китабиниң муқависи.
“вашингтон вақит гезити” ниң дөләт хәвпсизлики бойичә алаһидә мухбири бил гиртис (Bill Gertz) ниң “аләмни алдаш: коммунист хитайниң йәр шаридики дәриҗидин ташқири күчкә айлиниш үчүн елип бериватқан ички урунушлири” намлиқ китабиниң муқависи.
Erkin Sidiq

“һазир хитайниң америкаға шәкилләндүрүватқан әң чоң тәһдити, учур яки идеологийә җәһәттики тәһдиттур. Хитай нөвәттә американи аҗизлаштуруш вә ахирида американиң орнини елиш үчүн, кәң көләмлик хата учур йейиш һәрикити елип бармақта. Хитай американи идеологийә җәһәттин дуня капитализмниң рәһбири дәп қарайду. Шуңа хитай һакимийити, болупму хитай коммунистик партийәси нөвәттә өзиниң коммунист идеологийәси арқилиқ дуняни йетәкләш мәқситигә йетиш урунушини ашкарилимақта. Хитайниң америка вә демократик дуняға шәкилләндүрүватқан йәнә бир тәһдити, униң интайин тез сүрәттә кеңийиватқан ядро қораллири тәһдитидур. Хитайниң нөвәттә җиддий рәвиштә кеңийиватқан ядро қораллири күчигә хитай коммунистик партийәсиниң сиясий қара нийити йошурунған. Чүнки хитай өзиниң ядро қораллири күчини американи қисташ вә мәҗбурлаш үчүн ишлитиду. Мәсилән, әгәр тәйвәндә тоқунуш йүз бәрсә, хитай коммунистик партийәси американиң арилишишиниң алдини елиш вә уни тосуш үчүн, өзиниң ядро күчи билән америкаға тәһдит селиши мумкин.”

Америка аләм қатниши идариси (NASA) ниң инженери доктор әркин сидиқ әпәнди 78 йешида лагерда һаятидин айрилған оттура мәктәп оқутқучиси әхмәт аман(оңда) вә язғучи аббас монияз билән.
Америка аләм қатниши идариси (NASA) ниң инженери доктор әркин сидиқ әпәнди 78 йешида лагерда һаятидин айрилған оттура мәктәп оқутқучиси әхмәт аман(оңда) вә язғучи аббас монияз билән.
Erkin Sidiq

Бил гертз әпәнди йәнә хитай коммунистик партийәсиниң немә үчүн нөвәттә уйғурларни йоқитиш һәрикити елип бериватқанлиқи тоғрисида өз пикирлирини баян қилди. У, пүтүн дуня җамаитини хитайниң нөвәттә уйғурларға йүргүзүватқан ирқий қирғинчилиқиға бирдәк қарши турушқа чақирди:

“хитай компартийәсиниң баш секретари ши җинпиңниң хитайдики аз санлиқ милләтләрни йоқитиш ғәризи бар. Шу сәвәбидин нөвәттә хитай компартийәси уйғурларни йоқитиш үчүн кәң көләмлик һәрикәт қоллиниватиду. Ши җинпиңниң хитайда пәқәтла хитайларни мәркәз қилған миллий дөләт бәрпа қилиш ойи, униңда хитай милләтчилики яки хитай ирқчилиқ қаришиниң мәвҗутлуқини көрситиду. Шуңа у уйғурларға қарши ирқий қирғинчилиқ йүргүзүватиду. Мениңчә, дуня буниңдин ойғиниши керәк, шундақла хитайниң уйғурларға йүргүзүватқан ирқий қирғинчилиқиға қәтий қарши туруши керәк.”

Америка аләм қатниши идариси (NASA) ниң инженери доктор әркин сидиқ әпәнди америкада икки магистирлиқ унвани елип, уйғур райониға қайтқандин кейин лагерда 42 йешида һаятидин айрилған мутәллип нурмәмәт билән.
Америка аләм қатниши идариси (NASA) ниң инженери доктор әркин сидиқ әпәнди америкада икки магистирлиқ унвани елип, уйғур райониға қайтқандин кейин лагерда 42 йешида һаятидин айрилған мутәллип нурмәмәт билән.
Erkin Sidiq

Доктор әркин сидиқ әпәндиниң билдүрүшичә, у бу қетимлиқ йиғинда 2017-йилдин буян уйғурларниң бешиға кәлгән бир қисим паҗиәләрни әмәлий мисаллар билән йиғин әһлигә аңлатқан.

Игилинишичә, бу қетимлиқ йиғинда хитай һакимийитиниң уйғур елидә уйғурларға йүргүзүватқан зораванлиқ сиясити вә җинайи қилмишлири, шундақла уйғурлар дучар болуватқан паҗиәләрни аңлиған кишиләр көзлиригә иссиқ яш алған. Шуниң билән биргә, улар йәнә уйғурларниң нөвәттики еғир вәзийити һәққидә техиму тәпсилий мәлуматларни билишни халайдиғанлиқини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.