Xotendiki melum bankida yüz bergen öchiret majirasi némilerni ashkara qiliwatidu?

Yéqinda xotendiki melum bir soda-sana'et bankisining amanliq xadimi(keynide) xelq bankisidin shexsiy ish béjirish üchün kelgen xitay puqrasini öchiretsiz ish béjirgüzüwatqan körünüsh.

Yéqinda xoten shehiridiki melum bir soda-sana'et bankisida yüz bergen bir majira ijtima'iy taratqular arqiliq awam xelqning diqqitige sunuldi.

Mezkur sin körünüshidin melum bolushiche, bir neper xitay ayal shexsiy ishi bilen xoten shehiridiki melum bir soda-sana'et bankisigha kirgen. Bankining amanliq xadimi mezkur bankida ish béjirish üchün shunche uzun öchirette turuwatqan Uyghur puqralarning qarshiliqigha qarimastin, xitay ayalni öchiretning aldigha ötküzüp qoyghan. Bu xil adaletsiz mu'amilige chidimighan bir Uyghur yigit banka amanliq xadimi bilen zakunlashqan.

Mezkur weqe ündidar arqiliq awamgha ashkara bolghandin kéyin Uyghur éli we muhajirettiki Uyghur jama'iti arisida küchlük inkas qozghidi.

Igilinishiche, “5-Iyul weqesi” din kéyin Uyghur élidiki milletler munasiwitide, bolupmu rayondiki yerlik xelq bolghan Uyghurlar bilen köchmen xitaylar munasiwitide pewqul'adde jiddiychilik körülgen.

Téxi bu yil aprélda aqsuning melum bir saqchixanisida xitay saqchi bashliqining bir neper Uyghur saqchini urup-tillap haqaret qilghanliqi heqqidiki bir sin körünüshi ijtima'iy taratqularda ashkara bolghan idi. Neq meydanda süretke éliwélin'ghan bu sin körünüshi ijtima'iy uchur wasitilirige ashkara bolghandin kéyin Uyghur éli we chet'ellerdiki Uyghur jama'etchiliki arisida küchlük ghulghula peyda bolghan idi.

Biz radiyomizgha kelgen uchurgha asasen aqsu wilayiti tewesidiki 7 saqchixanigha téléfon qilip ehwal sürüshtürgen bolsaqmu, lékin saqchixanilarning hemmisi bu heqte uchur bérishni ret qildi. Aqsu sheherlik qatnash saqchixanisining bir neper xitay saqchisi intayin qopalliq bilen özining so'allirimizgha jawab bérish mejburiyitining yoqluqini tekitlidi.

2014-Yilining axiri künes nahiyesining toqay yézisida xitay shirketlirining yerlik puqralarning térilghu yerlirini mejburiy igilep qurulush qilishigha qarshiliq körsetken Uyghur yash qasimjan awutning délosi radiyomiz arqiliq dunyagha ashkara bolghan idi. Eyni chaghda jarahiti téxiche tamamen saqiyip ketmigen qasimjan radiyomiz ziyaritini qobul qilip, özining nahiyelik siyasiy-qanun komitétining sékrétari shü wéychangning buyruqi bilen qattiq dumbalan'ghanliqini bildürgen idi.

Ötken yili ürümchide yüz bergen saqchilar bilen soda-sana'etni memuriy bashqurush xadimlirining acha-singil bir jüp Uyghur qizning toy resimliri dukinini zorluq bilen péchetlishi heqqidiki sin körünüshimu küchlük inkas peyda qilghan idi.

Neq meydandin süretke élin'ghan hemde ijtima'iy taratqular arqiliq ashkara bolghan 67 sékuntluq bir sin körünüshi acha-singil ikki Uyghur qizning saqchilarning zorawanliqigha körsetken qarshiliqini namayan qilghan idi.

Sin körünüshidiki tepsilatlardin qarighanda, sheher bashqurush idarisi, qanun ijra qilish idarisi we ahaliler komitétidin teshkillen'gen birqanchilighan hökümet xadimliri saqchilarning himayiside ürümchining melum kochisigha jaylashqan acha-singil ikki Uyghur qizning dukinigha zorluq ishletken.

Mezkur weqe heqqidiki uchurlarda dukanning acha-singil ikki Uyghur qiz teripidin qanunluq resmiyetler boyiche échilghanliqi, Uyghur xéridarlar üchün toy-girimi we toy süretliri mulazimiti qilidighanliqi eskertilgen. Halbuki, xitay saqchilarning himayiside yopurulup kelgen bazar bashqurush we qanun ijra qilish idarisining Uyghur xadimliri ikki Uyghur qizning qarshiliqigha qarimay dukanning élan taxtisini zorluq küch ishlitip söküp ketken.

Yuqiriqi ehwallar heqqide öz qarashlirini bayan qilghan, emma nam-sheripini ashkarilashni xalimaydighan bireylenning radiyomizgha bildürüshiche, da'iriler adette Uyghurlar merkezlik olturaqlashqan kocha we rayonlardiki jédel-majiralarni bir terep qilishqa Uyghur saqchilar bilen Uyghur hökümet xadimlirini aldigha chiqiridiken.

Bu xildiki weqeler heqqide toluq melumatqa ige yene bir Uyghur közetküchining bildürüshiche, yerlik Uyghurlar bilen hökümet organliri yaki xitay puqraliri arisidiki jédel-majirani bir terep qilishta xuddi jang chünshyen buningdin ikki yil ilgiri tekitliginidek “Öz göshini öz yéghida qorush” taktikisi qollinilmaqtiken.

Tepsilatini awaz ulinishtin anglighaysiz.