Moskwada échilghan Uyghur tetqiqati ilmiy muhakime yighini axirlashti

Ixtiyariy muxbirimiz erkin tarim
2016-10-26
Élxet
Pikir
Share
Print
Moskwada échilghan Uyghur tetqiqati ilmiy muhakime yighinidin körünüsh. 2016-Yili 23-öktebir, rusiye.
Moskwada échilghan Uyghur tetqiqati ilmiy muhakime yighinidin körünüsh. 2016-Yili 23-öktebir, rusiye.
RFA/Erkin Tarim

Xelq'araliq Uyghur tetqiqati ilmiy muhakime yighini 10-ayning 26-küni rusiye fédératsiyesining paytexti moskwada axirlashti.

23-Chésladin 26-chéslaghiche dawamlashqan yighinda amérika qoshma shtatliri, hindistan, gérmaniye, shiwétsariye, en'gliye, awstraliye, türkiye, teywen, qazaqistan, qirghizistan we rusiye fédératsiyesidin bolup 53 etrapida mutexessis özlirining Uyghurlar toghrisida teyyarlighan ilmiy doklatini oqup ötti. Yighin jeryanida qirghizistanda tonulghan Uyghur ressam sabiqjan kamalowich babajanof ependi bilen qazaqistanliq Uyghur ressam güzel abbas qizi xanim qatarliqlar resim körgezmisi achti. 24-Chésla aqsham qazaqistandin kelgen sen'et ömiki Uyghur naxsha, usulliridin örnek körsetti.

Bu ilmiy muhakime yighinini washin'gton uniwérsitéti rusiye we yawro asiya tetqiqat merkizi bilen rusiye ilimler akadémiyesi sherqshunasliq instituti ortaq uyushturghan bolup, yighin jeryanida bu yighinni uyushturushta zor küch chiqarghan proféssor doktor dimitri wasiyéfke ton kiydürdi we Uyghurlarning turmushi eks ettürülgen resim sogha qilindi.

Biz Uyghur tetqiqati ilmiy muhakime yighini toghrisida téximu tepsiliy melumat igilesh üchün, bu yighinni uyushturghuchi washin'gton uniwérsitéti oqutquchisi doktor sé'an robért ependi, qazaqistan abay uniwérsitéti Uyghur edebiyati oqutquchisi proféssor doktor alimjan hemrayéf ependi we awstraliyedin kelgen Uyghur tetqiqatchi memet'imin ela ependilerge mikrofonimizni uzattuq.

Yighin uyushturghan doktor sé'an robért ependi 3 kün dawamlashqan yighinning nahayiti yaxshi ötkenlikini bayan qildi.

Qazaqistan abay uniwérsitéti Uyghur edebiyati oqutquchisi proféssor doktor alimjan hemrayéf moskwada chaqirilghan Uyghur tetqiqati ilmiy muhakime yighinigha nahayiti yuqiri baha béridighanliqini bayan qildi.

Memet'imin ela ependi yighinning burunqigha qarighanda mezmun jehettin béyighanliqini, Uyghur tetqiqati qoshunining zorayghanliqini bayan qildi.

Memet'imin ela ependi bu yighinda ilmiy doklat bergen mutexessislerni üch guruppigha bölüp chüshendürdi.

Bu yighinni uyushturghan washin'gton uniwérsitéti oqutquchisi sé'an robért ependi 4-nöwetlik xelq'ara Uyghur tetqiqat ilmiy muhakime yighinini Uyghurlar köp olturaqlashqan bir dölette ötküzüshni oylishiwatqanliqini, orni téxi éniq emeslikini tekitlidi.

Qimmetlik radiyo anglighuchilar, xelq'araliq Uyghur tetqiqati ilmiy muhakime yighinining 1-nöwetliki 2014-yili amérikining paytexti washin'gtonda, ikkinchi nöwetliki 2015-yili firansiyening paytexti parizh bilen bélgiyening paytexti béryussélde ötküzülgen idi.

Toluq bet