Yaponiye sukuba radiyosi rabiye qadir xanim heqqide mexsus programma anglitishqa bashlidi

Ixtiyariy muxbirimiz haji qutluq qadiri
2016-05-23
Share
professor-fuji-genki-turmuhemmet-hashim.jpg Merkizi tokyodiki sukuba radiyo istansisining radiyo söhbet programmisida proféssor fuji génki ependi bilen doktor turmuhemmet hashim ependi. 2016-Yili 17-may, tokyo.
RFA/Qutluq

17-Maydin bashlap yaponiye sukuba radiyo istansisi rabiye qadir xanim heqqide heptide ikki qétim mexsus bir sa'etlik programma anglitishqa bashlidi.

Yaponiye Uyghur birliki teshkilatidin igilishimizche, merkizi tokyodiki sukuba radiyo istansisi Uyghurlar heqqide heptide ikki qétim mexsus programma anglitishqa bashlighan bolup, buningda asasliqi dunya Uyghur qurultiyi re'isi rabiye qadir xanimning 24-maydin bashlap tokyo, osaka qatarliq bir qanche sheherlerde nöwettiki Uyghur weziyitidin anglitidighan doklati toghrisida toxtalghan.

Sukuba radiyo istansisining bu qétimqi rabiye qadir xanim toghrisida teyyarlighan mexsus söhbet programmisigha yaponiye Uyghur birliki teshkilatining re'isi doktor turmuhemmet hashim teklip bilen qatnashqan bolup, programmigha yaponiye takushuko uniwérsitétining proféssori xelq'ara siyasiy mesililer mutexessisi fuji génki riyasetchilik qilghan.

Mezkur radiyo istansisi uzundin buyan proféssor fuji génkining riyasetchilikide heptide ikki qétim " Kéyji programmisi" namida anglitish bérip kéliwatqan bolup, bu qétim rabiye qadir xanim bashchiliqidiki dunya Uyghur qurultiyi wekillirining yaponiye ziyariti toghrisida alahide söhbet programmisi ishligen.

Ziyaritimizni qobul qilghan yaponiye Uyghur birliki teshkilatining re'isi doktor turmuhemmet hashim mezkur programma toghrisida melumat berdi.

Turmuhemmet hashimning éytishiche, mezkur radiyo programma riyasetchisi proféssor fuji génki anglitish jeryanida rabiye qadir xanimning Uyghur mesilisini yaponiye hökümiti we xelqige anglitishta hazirgha qeder yaponiyede élip barghan pa'aliyetlirini tonushturush bilen birge, bu qétimqi yaponiye ziyaritining ehmiyiti heqqide toxtalghan.

Bu heqte ziyaritimizni qobul qilghan proféssor fuji génki:" 17-May seyshenbe küni kech sa'et 10 din bashlap heptide ikki qétim rabiye qadir xanimning bu qétimqi yaponiye ziyariti toghrisida mexsus söhbet programmisi anglitishni bashliduq. Méningche, yaponiyede tereqqiy tapqan yette dölet yighini échilish alida turghan, xelqimiz xelq'ara mesililerge köngül boluwatqan mushundaq bir peytte, rabiye qadir xanimning metbu'atlarda téxi déyilmigen sherqiy jenubi asiya elliridiki Uyghur musapirlar mesilisi heqqide üch chong sheherde doklat bérishining ehmiyiti tolimu zor bolidu dep qaraymen" dédi.

Radiyo programma mes'uli süzüki bu qétimqi Uyghur musapirlar mesilisi toghrisida élip bérilidighan rabiye qadir xanimning doklati toghrisida ishlen'gen programma heqqide toxtilip:" Sherqiy jenubi asiya elliride tutqun qilinip türmilerge tashlan'ghan Uyghur musapirlarning zindan hayati we xitaygha mejburiy qayturulghan Uyghurlarning teqdiri radiyo anglighuchilirimizni hemmidin bekrek tesirlendürüshi mumkin dep oylaymen" dédi.

Doktor turmuhemmet hashimning qarishiche, yaponiyede bu xil radiyo programmiliri arqiliq Uyghur mesilisini tonushturush ‏- yaponlarning Uyghur mesilisige bolghan qiziqishini qozghash we shundaqla bu qétim üch chong sheherde élip bérilidighan rabiye qadir xanimning doklat bérish pa'aliyitige köpligen kishilerning qatnishishini qolgha keltürüshni meqset qilghan iken.

Yuqiriqi awaz ulinishidin tepsilatini anglang.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet