Saybagh weqesi heqqidiki yéziliq partkom yighinida kent we mehelle kadirliri hökümetke maslashmasliq bilen soraqqa tartildi

Muxbirimiz shöhret hoshur
2013-12-19
Élxet
Pikir
Share
Print
Saybagh weqesi heqqidiki yéziliq partkom yighinida kent we mehelle kadirliri hökümetke maslashmasliq bilen soraqqa tartildi
Saybagh weqesi heqqidiki yéziliq partkom yighinida kent we mehelle kadirliri hökümetke maslashmasliq bilen soraqqa tartildi
Photo: RFA


Muxbirimiz teripidin téléfon arqiliq élin'ghan yighin xatirisidin melum bolushiche, qeshqer konisheher nahiyisining saybagh yézisida yür bergen qanliq toqunushtin kéyin, yéziliq partkom sékritari weqe heqqide yighin échip, yézidiki kent we mehelle kadirlirini soraqqa tartqan.

Yighinda mehelle kadirlirini hökümetke maslashmasliq bilen eyibligen xitay sékritar, weqening kélip chiqishigha asasiy qatlamdiki kadirlarning saqalliq er we perenjilik ayallarni estayil tekshürmesliki we hökümetke waqtida melum qilmasliqi asasliq bir seweb dep körsetken. Yighindin melum bolushiche weqede ölgen jemet ezalirining köpinchisi weqe yüz bergen mehellining sirtidin kelgenler, shundaq turuqluq weqe yüz bergen mehellidiki ahaliler omumyüzlük soraq we tutqun qilin'ghan.

Töwende muxbirimiz shöhret hoshurning bu heqte teyyarlighan programmisini anglaysiler:

Hörmetlik radi'o anglighuchilar, töwende qeshqer konisheher nahiyisining saybagh yézisida yüz bergen qanliq weqe heqqide yéziliq partkomda échilghan yighin xatirisining bügünki timimizgha munasiwetlik qismini diqqitinglargha sunimiz:

- ... Umumyüzlük éytqanda nahayiti yaman boldi, aqiwiti yaxshi bolmidi..... Men 4 - ayning 23 - küni maralbéshi sériqbuyida weqe yüz bergende herqaysinglargha dégen "Shu weqe haman bir kün bizdimu yüz bérishi mumkin, u chaghda ölidighanlar mushu yerde olturghanlar bolushimiz mumkin" dep؛ del déginimdek boldi.... Kent kadirliri, mehelle kadiriliri hazirghiche birersinglar mushundaq weqeler heqqide axbarat uchur yetküzüp baqtinglarmu?!!..... Shu zorawanlar 8 - ayda bomba yasaptu, sinaq qiptu, shu chaghda siz nede qaldingiz?! gep qilsaq "Tillamduq, basturamduq" diyishisen, mana qoghdiyalmiduqqu özimizni, ige chiqalmiduqqu? mey sojang bilen mey wéyüenni qurban berduqqu? héchqaysingning undaq heqqi yoq! xizmette mes'uliyetsizlik qilidighan!!!....... Ikkinchi deydighan gépim, yoldashlar qarighu - gas boluwalmayli, körüp turup körmeske séliwalmayli. Kim bérip kishilerning chongqur idiyisidiki ziyanliq pikirlerni, uchurlarni igilep tépip chiqip bizge melum qildi?! dawamliq "Normal - normal" deysiler! mana normalmiken? yene körmeske séliwersenglar, buningdin kéyin buningdinmu chong ish chiqidu. Biz diduq "Ropashlarni bashqurunglar, saqalliqlarni bashqurunglar" dep ؛ bashquruptuqma? bashqurmisaq mana mushundaq ish chiqidu, mana mushundaq ish chiqidu, shunga sékritarlar kallanglini silkiwétinglar, meyli bu jinayet gumandarliri heqanche héliger bop ketsimu, adettiki ehwallirini, nede néme ish qip yürgenlirini bilermiz yoldashlar?.... Baya shyangjangning öyidin kéliwétip chazidin)tekshürüsh tosiqidin( öttuq, qarisaq 4 - 5 i ot qalap issiniship, gep sétiship olturuptu. Bu chazidikilerning wezipisi saqal qoyghanlar barmu? ropashliqlar barmu tekshürüsh؛ sirttin kelgenlerni "Nedin kelle, nege mangla" dep sorap gumanliqlirini bizge yollash! tünügün ölgenlerning salahiyitini derhal éniqlighili bolmidi, biz kent sékritarlirini, 4 pishqedemlerni élip barduq, kopinchisini tonumidi, köpinchisi sirttin kelgenler iken. Biz burun déduq "Sirttin kelgenlerni bir sa'etning ichide bizge melum qilinglar" dep؛ ular bir sa'et emes, birqanche kün boptu toplan'ghili! eger shu bir sa'etning ichide sirttin kelgenler melum qilin'ghan bolsa, ular undaq ish tériyalmaytti, weqening aldi élinatti. Shu mehellide kona öydin 13i bar, yéngi öydin 20 si bar, oylap béqinglar, shu bir mehellide adem yoq hazir, 21 bala yétim qaldi ) bu yerde sékritar shu mehellide wezipe ötewatqan adem yoq démekchimu yaki weqedin kéyin mehellide ahaliler yoq démekchimu bu nuqta éniq emes, omumi weziyettin qarighanda shu bir mehelle kishilirining soraq üchün tutup turuluwatqan bolushi éhtimalgha yéqin körülmekte - muxbirdin(. Weqege chétishliq kentlerdin 4 - kent, 8 - kent, 12 - kent, bagh meydanning sékritarliri qattiq tekshürünglar, gumandalar heqqide axbarat uchur yetküzünglar. Weqe yüz bergen kündiki kochilardiki qan izliridin qarighanda qéchip ketken gumandarlamu bar, hushyar we aktip bolush bilen teng özünglarnimu qoghdanglar.....

Hörmetlik radi'o anglighuchilar, yuqiriqi melumatlardin qarighanda, xtay hökümiti bixeterlik tedbirliri süpitide gerche doqmush - doqmushqa tosaqlarni qurush, minglarche qa'ide - tüzümlerni chiqirish arqiliq yerlik ahalilerni xitay dölet menpe'eti üchün xizmet qildurmaqchi bolghan yeni Uyghurlarni öz yéghida özini qorimaqchi bolghan bolsimu, bu jehette chong netijige érishelmigenliki ashkarilanmaqta. Xitayning sékritarining kayishliri we chalwaqashliridin melumki, yézilardiki kishiler jümlidin köpligen asasiy qatlam kadiliri öz - ara we jama'et bilen bolghan munasiwetlerde milliy, insani we musulmanche yol tutqan yeni milliy, diniy we siyasiy mesililerde xitayning dépigha aldirap we kolléktip usul oynap ketmigen.

Toluq bet