“Türk fédératsiyoni” yighinida “Jaza lagérliri” mesilisi muhakime qilindi

D u q rehberliri teklip bilen qatnashqan we Uyghurlar weziyitini tonushturghan “Türk fédératsiyoni” ning yighinidin körünüsh. 019-Yili 23-féwral, gérmaniye.

D u q rehberliri teklip bilen qatnashqan we Uyghurlar weziyitini tonushturghan “Türk fédératsiyoni” ning yighinidin körünüsh. 019-Yili 23-féwral, gérmaniye.

D u q rehberliri yawropadiki türk teshkilatlirining birleshmisi hésablinidighan “Türk fédératsiyoni” dep atalghan türk teshkilatining yighinigha teklip bilen qatniship, “Jaza lagérliri” mesilisi we Uyghurlarning nöwettiki weziyiti toghrisida melumatlar berdi.

23-Féwral d u q teripidin teshkillen'gen 6 kishilik bir guruppa wekil “Türk fédératsiyoni” teshkilatining teklipi bilen gérmaniyening karlsruhe shehirige bérip, “Jaza lagérliri” mesilisi we Uyghurlarning nöwettiki weziyiti toghrisida melumatlar bergen.

Bu yighin'gha qatnashqan d u q tetqiqat komitéti mudiri enwer exmet ependining bildürüshiche, yighin'gha 15 türk teshkilatidin 800 etrapida kishi qatnashqan.

Yighinda “Türk fédératsiyoni” rehberliri we herqaysi türk teshkilatlirining mes'ulliri söz élip, xitayning Uyghur diyarida tesis qilghan jaza lagérlirini qattiq eyibligen.

D u q diniy ishlar komitéti mudiri, “Sherqiy türkistan ölimalar birliki” ning mu'awin re'isi turghunjan alawudin ependi sehnige teklip qilin'ghanda, u sözini aldi bilen türk xelqining Uyghurlargha bolghan yardem we hésdashliqlirigha rehmetlirini bildürüsh bilen bashlighan. U bu qétimqi yighin munasiwiti bilen ziyaritimizni qobul qilghanda, Uyghur wekillirining “Türk fédératsiyoni” we bashqa türk teshkilatlirining qizghin kütüwélishigha, ularning bundin kéyin d u q gha zor yardemlerde bolush wedilirige érishkenlikini tilgha aldi.

Bu qétimqi yighin'gha d u q qurultay fondining mes'uli abdujélil emet ependimu qatnashqan bolup, u yighinda söz alghan türk rehberlirining nutuqlirining nahayiti tesirlik bolghanliqini, yighin ehlining Uyghurlarni qollash we yardemde bolush isteklirining nahayiti küchlük ikenlikini hés qilghanliqini tekitlidi.

Enwer exmet ependining eskertishiche, bu qétimqi yighinda türk teshkilatliri bundin kéyin d u q bilen zich hemkarliship, xitayning “Jaza lagérliri” ni taqitish üchün pütün dunya miqyasida ortaq heriket qozghash toghrisida pikir birliki shekillendürgen.

Aldinqi künliri d u q rehberliri teklipke bina'en gérmaniyening köln, frankfurt, bérlin, myunxén qatarliq sheherliridiki türk teshkilatlirining bash shitablirini ziyaret qilip jaza lagérlirigha qarshi ortaq heriket qilish toghrisida öz'ara söhbetlerde bolghan hemde “Sherqiy türkistan hemkarliq munbiri” qurup chiqish toghrisida pikir birliki hasil qilghan. Qurultay rehberlirining bildürüshiche, bu munberge dunyaning herqaysi jayliridiki türk we bashqa islam teshkilatliri hemde xelq'aradiki hersahe kishilik hoquq teshkilatliri eza bolup kirip, xitayning Uyghur diyarida yürgüzüwatqan “Jaza lagérliri” ni taqitish yolida ortaq küresh dolquni qozghaydiken.

Uyghur wekillirining bildürüshiche, türk teshkilat rehberlirining bu qétimqi yighinda qilghan sözliri nahayiti hayajanliq bolup, ular nutuqlirida xitayning Uyghurlar üstidin élip bériwatqan derijidin tashqiri zulumlirigha sewri-taqetlirining qalmighanliqini, özlirining türk milletchiliri bolush süpiti bilen, bu zulumgha qarshi tedbir qollinishqa mejbur boluwatqanliqini ipade qilishqan.