Abdusalam teklimakani hindonéziyede 20 meydan doklat bérip, Uyghurlar weziyitini tonushturghan

Ixtiyariy muxbirimiz erkin tarim
2019-03-07
Élxet
Pikir
Share
Print
Doktor abdusalam teklimakani hindonéziye gherbiy yawa ölkisining paytexti bandung shehirining mu'awin sheher bashliqi edwin sanjaya ependige "Sherqiy türkistanning hazirqi weziyiti" namliq doklatini sunmaqta. 2019-Yili 19-féwral.
Doktor abdusalam teklimakani hindonéziye gherbiy yawa ölkisining paytexti bandung shehirining mu'awin sheher bashliqi edwin sanjaya ependige "Sherqiy türkistanning hazirqi weziyiti" namliq doklatini sunmaqta. 2019-Yili 19-féwral.
RFA/Erkin Tarim

Türkiyediki "Yéngi nesil herikiti" ning re'isi doktor abdusalam teklimakani yéqinda hindonéziyede élip barghan 2 heptilik ziyaritini muweppeqiyetlik axirlashturghan.

Hindonéziyediki yashlar teshkilatlirining alahide teklipige bina'en doktor abdusalam teklimakani 2-ayning 18-künidin 3-ayning 3-künigiche hindonéziyede ikki heptilik ziyarette bolghan bolup, bu jeryanda 3 ölkide jem'iy 20 qétim doklat bergen. Bulardin sirt u yene hindonéziyediki bir qisim ammiwi teshkilatlarning mes'ulliri, bolupmu yashlar teshkilatlirining mes'ulliri we bezi sheher bashliqliri bilen körüshüp, Uyghurlarning hazirqi éghir weziyitini anglatqan.

Doktor abdusalam teklimakani hindonéziyediki tunji pa'aliyitini 19-féwral küni gherbiy yawa ölkisining paytexti bandung shehiride mu'awin sheher bashliqi edwin sanjaya ependige "Sherqiy türkistanning hazirqi weziyiti" namliq doklatini sunush bilen bashlighan. U shu küni chüshtin kéyin hindonéziye musulman ziyaliylar uyushmisining gherbiy yawa shehiridiki shöbisidimu doklat bergen.

"Yéngi nesil herikiti" ning re'isi doktor abdusalam teklimakani ependi ziyaritimizni qobul qilip, hindonéziye xelqige Uyghurlarning hazirqi éghir weziyitini tonushturush üchün bu ziyaretni élip barghanliqini bayan qildi.

20-Féwral küni doktor abdusalam yene hindonéziyening bandush shehiridiki "Agung trans studiyo meschiti" de "Sherqiy türkistanning ötmüshi we bügünki weziyiti" témisida doklat bergen.

21-Féwral küni u hindonéziyening bandush shehiridiki el-hidaye meschitide yene bir meydan doklat bergen. Undin bashqa u 22-féwral, 23-féwral we 24-féwral künliri hindonéziyening yogyakarta shehiridiki el-fadilah meschiti qatarliq 10 yéqin meschitlerde ayrim-ayrim halda "Sherqiy türkistanning ötmüshi we bügüni" dégen témida doklatlar bergen. Kéyin u yene hindonéziyening riya'u rayonidiki alimlar uyushmisining bashliqi doktor mustafa ömer bilen uchriship, Uyghur diyarining hazirqi éghir weziyiti toghrisida melumat bergen.

Doktor abdusalam 27-féwral küni hindonéziyening pékanbaru shehiride doklat bergendin kéyin, 28-féwral bangkingnang shehiride, 29-féwral küni perenap shehiride, 3-mart küni bolsa hindonéziyening ren'gat shehiride Uyghurlar toghriliq doklat bergen.

Hindonéziye sherqiy-jenubiy asiyadiki tesiri zor musulman döletlirining biri hésablinidu. Undaqta, hindonéziye xelqi Uyghurlarning hazirqi éghir weziyitini bilemdu? doktor abdusalamning köp qétimliq doklatliri jeryanida anglighuchilar eng köp qaysi so'allarni soridi? bu heqte doktor abdusalam teklimakani tepsiliy toxtaldi.

Yéqindin buyan dunya Uyghur qurultiyi bolsun yaki sherqiy türkistan teshkilatlar munbiri bolsun, ular malaysiya we hindonéziye qatarliq sherqiy-jenubiy asiyadiki musulman döletlirige alahide ehmiyet bermekte. Buning sewebi néme?

Sherqiy türkistan ma'arip we hemkarliq teshkilatining re'isi hidayetullah oghuzxan bu heqte ziyaritimizni qobul qilip, xitay bilen musulman döletliri otturisida nahayiti yéqin siyasiy we iqtisadiy munasiwetler mewjut bolghachqa, musulman döletlirining Uyghurlar mesiliside süküt qilishqa mejbur boluwatqanliqini, shunga Uyghur teshkilatlirining musulman döletlerge Uyghur mesilisini anglitishining nahayiti texirsizlikini bayan qildi.

"Yéngi nesil herikiti" 2018-yili 3-ayda istanbulda qurulup, türkiyede tizimlitilghan bir qanunluq teshkilat bolup, bu teshkilatning meqsiti Uyghur yashlirini teshkillep, musulman döletliri we rayonlirida Uyghurlar mesilisini anglitish iken.

Toluq bet