“дуня бүлтәни гезити” уйғур мәсилисини музакирә қилди

Ихтиярий мухбиримиз әркин тарим
2015-05-25
Share
dunya-bulteni-geziti-uyghur-mesilisi.jpg Оңдин солға: истанбул университети тарих оқутқучиси др. Али әхмәтбәйоғлу, һамут гөктүрк, әнқәрә хаҗәттәпә университети тарих оқутқучиси дотсент доктор әркин әкрәм әпәндиләр, йиғинға риясәтчилик қилған айнур әрдоған ханим. 2015-Йили 23-май, түркийә.
RFA/Erkin Tarim

Түркийәдики әң чоң, 3 тилда чиқириливатқан тор гезитлиридин бири болған “дуня бүлтәни гезити” узун йиллардин бери өткүзүп келиватқан юмилақ үстәл йиғининиң бу һәптиликидә уйғур мәсилиси әтраплиқ һалда оттуриға қоюлди.

Гезитниң баш тәһрири акиф әмрә әпәнди уюштурған, айнур әрдоған ханим риясәтчилик қилған йиғин “дуня бүлтәни гезити”ниң истанбул бешикташ райони балмуҗу мәһәллисидики мәркәз ишханисида 23-май күни чүштин кейин өткүзүлди. юмилақ үстәл йиғинида әнқәрә хаҗәттәпә университети тарих кафедраси оқутқучиси, түркийә истратегийилик чүшәнчә институти мутәхәссиси дотсент доктор әркин әкрәм әпәнди, истанбул университети тарих факултети оқутқучиси доктор али әхмәтбәйоғлу вә уйғур хәвәр вә тәтқиқат мәркизи мәсули шәрқий түркистан вәхпиниң сабиқ баш катипи һамут гөктүрк әпәндиләр шәрқий түркистан мәсилисини һәр җәһәттин әтраплиқ һалда тәһлил қилип оттуриға қойди.

Дотсент доктор әркин әкрәм әпәнди шәрқий түркистанниң истратегийилик әһмийити вә бүгүн дучар болуватқан мәсилиләр, хитайниң уйғурларға елип бериватқан бесим сиясити қатарлиқ мәсилиләр тоғрисида әтраплиқ мәлумат бәргәндин сирт, уйғур мәсилисини һәл қилиш йоллири тоғрисидики тәклиплириниму оттуриға қойди. У, сөзидә чоң дөләтләрниң 19-әсирдин тартип шәрқий түркистанға қизиқип келиватқанлиқини, булар елип кәлгән ақивәтләрни тарихтики мисаллар билән оттуриға қоюп өтти.

Истанбул университети тарих факултети оқутқучиси доктор али әхмәтбәйоғлу шәрқий түркистанниң түрк тарихидики орни вә әһмийити тоғрисида мәлумат бәрди. У, сөзидә түркләр үчүн шәрқий түркистанниң пәқәтла бир земин болупла қалмастин түрк миллитиниң күлтүр, мәдәнийәт, өрп вә адәтлириниң мәнбәси икәнликини баян қилип өтти.

“дуня бүлтәни гезити” уйғурлар тоғрисида өткүзгән юмилақ үстәл йиғинида, һамут гөктүрк әпәнди шәрқий түркистан дәвасиниң чәтәлдики вәзийити тоғрисида, болупму түркийәдики шәрқий түркистан аммиви тәшкилатлириниң паалийәтлири вә түрк һөкүмитиниң шәрқий түркистан сиясити тоғрисидики көз қарашлирини оттуриға қоюп өтти.

“дуня бүлтәни гезити”ниң баш тәһрири акиф әмрә әпәндиниң ейтишичә һазирғичә пәләстин, мисир, ирақ, кәшмир, сүрийә вә қарабағ мәсилисигә охшаш дунядики нурғун мәсилиләр тоғрисида юмилақ үстәл йиғини өткүзүлгән болуп, 23-май күнидики йиғинда уйғур мәсилисигә орун берилгән. Икки йерим саәт давамлашқан йиғинда оттуриға қоюлған мәсилиләрниң һәммиси синалғуға елинған болуп, алдимиздики күнләрдә тор бетигә қоюлидикән. Булардин башқа сөзләнгән сөзләрниң һәммиси китаб һалиға елип келинип нәшр қилинидикән.

Биз мәзкур йиғин вә бу йиғинниң әһмийити тоғрисида мәлумат игиләш үчүн уйғур хәвәр вә тәтқиқат мәркизи мәсуллиридин һамут гөктүрк әпәндигә микрофонимизни узаттуқ. У, бу гезитниң һөкүмәтни яқлайдиған муһим гезит икәнликини, бу гезиттә өткүзүлгән бу йиғинниң һөкүмәтниң шәрқий түркистан сияситигә тәсир көрситидиғанлиқини ейтти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт