“Dunya bülteni géziti” Uyghur mesilisini muzakire qildi

Ixtiyariy muxbirimiz erkin tarim
2015.05.25
Share on WhatsApp
Share on WhatsApp
dunya-bulteni-geziti-uyghur-mesilisi.jpg Ongdin solgha: istanbul uniwérsitéti tarix oqutquchisi dr. Ali exmetbeyoghlu, hamut göktürk, enqere xajettepe uniwérsitéti tarix oqutquchisi dotsént doktor erkin ekrem ependiler, yighin'gha riyasetchilik qilghan aynur erdoghan xanim. 2015-Yili 23-may, türkiye.
RFA/Erkin Tarim

Türkiyediki eng chong, 3 tilda chiqiriliwatqan tor gézitliridin biri bolghan “Dunya bülteni géziti” uzun yillardin béri ötküzüp kéliwatqan yumilaq üstel yighinining bu heptilikide Uyghur mesilisi etrapliq halda otturigha qoyuldi.

Gézitning bash tehriri akif emre ependi uyushturghan, aynur erdoghan xanim riyasetchilik qilghan yighin “Dunya bülteni géziti”ning istanbul béshiktash rayoni balmuju mehellisidiki merkez ishxanisida 23-may küni chüshtin kéyin ötküzüldi. Yumilaq üstel yighinida enqere xajettepe uniwérsitéti tarix kafédrasi oqutquchisi, türkiye istratégiyilik chüshenche instituti mutexessisi dotsént doktor erkin ekrem ependi, istanbul uniwérsitéti tarix fakultéti oqutquchisi doktor ali exmetbeyoghlu we Uyghur xewer we tetqiqat merkizi mes'uli sherqiy türkistan wexpining sabiq bash katipi hamut göktürk ependiler sherqiy türkistan mesilisini her jehettin etrapliq halda tehlil qilip otturigha qoydi.

Dotsént doktor erkin ekrem ependi sherqiy türkistanning istratégiyilik ehmiyiti we bügün duchar boluwatqan mesililer, xitayning Uyghurlargha élip bériwatqan bésim siyasiti qatarliq mesililer toghrisida etrapliq melumat bergendin sirt, Uyghur mesilisini hel qilish yolliri toghrisidiki tekliplirinimu otturigha qoydi. U, sözide chong döletlerning 19-esirdin tartip sherqiy türkistan'gha qiziqip kéliwatqanliqini, bular élip kelgen aqiwetlerni tarixtiki misallar bilen otturigha qoyup ötti.

Istanbul uniwérsitéti tarix fakultéti oqutquchisi doktor ali exmetbeyoghlu sherqiy türkistanning türk tarixidiki orni we ehmiyiti toghrisida melumat berdi. U, sözide türkler üchün sherqiy türkistanning peqetla bir zémin bolupla qalmastin türk millitining kültür, medeniyet, örp we adetlirining menbesi ikenlikini bayan qilip ötti.

“Dunya bülteni géziti” Uyghurlar toghrisida ötküzgen yumilaq üstel yighinida, hamut göktürk ependi sherqiy türkistan dewasining chet'eldiki weziyiti toghrisida, bolupmu türkiyediki sherqiy türkistan ammiwi teshkilatlirining pa'aliyetliri we türk hökümitining sherqiy türkistan siyasiti toghrisidiki köz qarashlirini otturigha qoyup ötti.

“Dunya bülteni géziti”ning bash tehriri akif emre ependining éytishiche hazirghiche pelestin, misir, iraq, keshmir, süriye we qarabagh mesilisige oxshash dunyadiki nurghun mesililer toghrisida yumilaq üstel yighini ötküzülgen bolup, 23-may künidiki yighinda Uyghur mesilisige orun bérilgen. Ikki yérim sa'et dawamlashqan yighinda otturigha qoyulghan mesililerning hemmisi sin'alghugha élin'ghan bolup, aldimizdiki künlerde tor bétige qoyulidiken. Bulardin bashqa sözlen'gen sözlerning hemmisi kitab haligha élip kélinip neshr qilinidiken.

Biz mezkur yighin we bu yighinning ehmiyiti toghrisida melumat igilesh üchün Uyghur xewer we tetqiqat merkizi mes'ulliridin hamut göktürk ependige mikrofonimizni uzattuq. U, bu gézitning hökümetni yaqlaydighan muhim gézit ikenlikini, bu gézitte ötküzülgen bu yighinning hökümetning sherqiy türkistan siyasitige tesir körsitidighanliqini éytti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.