Уйғур академийәси австралийә тармиқи уйғур дәвасида қандақ рол ойниялайду?

Ихтиярий мухбиримиз әркин тарим
2019-12-11
Елхәт
Пикир
Share
Принт
Авистралийәниң сидней шәһиридики түрк ислам мәдәнийәт мәркизидә уйғур академийәси австралийә тармиқи рәсмий қурулғандин кейин хатирә сүрәттә. 2019-Йили 8-декабир.
Авистралийәниң сидней шәһиридики түрк ислам мәдәнийәт мәркизидә уйғур академийәси австралийә тармиқи рәсмий қурулғандин кейин хатирә сүрәттә. 2019-Йили 8-декабир.
RFA/Erkin Tarim

8-Декабир күни авистралийәниң сидней шәһиридики түрк ислам мәдәнийәт мәркизидә уйғур академийәси австралийә тармиқи рәсмий қурулған.

Уйғур академийәсиниң мәзкур тармиқида һәйәт әзаси болуп вәзипә алмақчи болған академийә әзалири арисида елип берилған йошурун авазлиқ сайламда, сиднейдики уйғур зиялийси доктор илһамҗан сабит көпчиликниң аваз бериши билән уйғур академийәси австралийә тармиқиниң рәисликигә, шөһрәт йүсүп муавин рәисликкә сайланди. Мәзкур сайламда нәқ мәйданда өзи билән биргә сәлимә кәмал, пәризат ғәйрәт, мәликизат әхмәт, адәм илһам вә диляр барат қатарлиқ 5 кишилик даимий башқуруш һәйити сайлап чиқилди.

Мәркизи түркийә истанбулдики уйғур академийәсиниң австралийә тармиқиниң қурулуши мурасимиға д у қ баш тәптиши абликим идрис әпәнди, уйғур һәрикити тәшкилатиниң рәиси рошән аббас ханим, йеңи зеландийә вә австралийәниң һәр қайси шәһәрлиридин кәлгән уйғур зиялийлиридин болуп көп санда киши иштирак қилған.

Австралийә билән хитайниң мунасивити җиддийлишиватқан мәзгилдә, болупму австралийә хитайни уйғурларниң лагерларға солиниши мәсилисидә тәнқидий позитсийәлирини билдүрүп турғанда мәзкур тармақниң қандақ роли болиду? бундақ бир орган қандақ рол ойниялиши мумкин? мәзкур тармақ қандақ мәқсәт билән қурулди?

Австралийә билән хитай оттурисидики мунасивәтләр һазир қандақ? уйғур дәваси үчүн қандақ бир вәзийәт мәвҗут? бу һәқтә зияритимизни қобул қилған уйғур зиялийси мәмәт тохти әпәнди нөвәттә австралийә-хитай мунасивитиниң тарихта көрүлүп бақмиған төвән сәвийәгә чүшүп қалғанлиқини, австралийәдә уйғур дәвасиниң келәчәкниң парлақ икәнликини, шуңа уйғур академийәсиниңму муһим рол ойнайдиғанлиқини баян қилди.

Ундақта уйғур академийәсиниң австралийә тармиқиниң қурулуш мәқсити немә? 8-декабирда өткүзүлгән ечилиш мурасимиға риясәтчилик қилған д у қ ички ишлар комитети мудири бәхтияр бөрә әпәнди мәзкур тармақниң қурулуш мәқсити тоғрисида мәлумат бәрди.

Ундақта мәркизи истанбулда турушлуқ уйғур академийәсиниң австралийә тармиқиниң қурулушиниң әһмийити немә? австралийә сияситигә тәсир көрситәләрму? австралийәдики уйғур зиялийси нургүл савут ханим бу һәқтики соалимизға җаваб берип, уйғурлар еғир вәзийәттә туруватқан бүгүнки күндә қурулған уйғур академийәси австралийә тармиқиниң уйғур дәваси үчүн ярдәмчи күч икәнликини, дәва тоғрисида илмий доклатларни тәйярлаш, дәва тоғрисида йеңи пикир, йеңи көз қарашларни оттуриға қоюш, австралийәдики уйғур пәрзәнтлириниң ана тили вә миллий кимликини қоғдап қелишта зор рол ойниялайдиғанлиқини илгири сүрди.

Австралийә чәтәлдә уйғурлар әң бурун олтурақлашқан дөләтләрдин бири болуп, дәвада муһим дөләт һесаблинидикән. Биз игилигән мәлуматларға асасланғанда австралийәдә 300 әтрапида уйғур зиялийси бар икән. Мәзкур тармақниң қурулуш мурасимиға қатнашқан д у қ баш тәптиши абликим идрис әпәнди уйғур дәваси хәлқаралашқан бүгүнки күндә йеңи қурулған уйғур академийәсиниң австралийә тармиқиниң уйғур дәвасида муһим рол ойнайдиғанлиқини баян қилди.

Японийәдә медитсина кәспини пүттүргән һазир сиднейда туруватқан илһамҗан сабит әпәнди рәисликкә сайланған. У, телефон зияритимизни қобул қилип, хитай һөкүмити уйғур тили, мәдәнийити вә миллий кимликини йоқ қилишқа урунуватқан бүгүнки күндә австралийәдики зиялийлар оттурисидики иттипақлиқни күчәйтип илим-пәнни дәва үчүн хизмәт қилдуридиғанлиқини тәкитлиди.

Уйғур академийәси 2009-йили 9-айда 9 уйғур зиялийси тәрипидин истанбулда қурулған болуп, мәзкур академийә 2018-йили «уйғур академийәсиниң америка тармиқи вә явропа тармиқини қуруп чиққаниди.

Пикирләр (0)
Share
Толуқ бәт