"Bir awaz, bir qedem" sho'ari peyda qilghan hayajan we inkaslar

Ixtiyariy muxbirimiz ekrem
2018-01-25
Share
qeshqer-kocha-qizil-bayraq.jpg Qizil bayraqlar ésiwétilgen kochida parangliship turghan Uyghur ayallar. 2017-Yili 4-noyabir, qeshqer.
AP Photo/Ng Han Guan

"Bir awaz, bir qedem" sho'ari herqaysi döletlerdiki Uyghur ayallirining ijabiy bahalirigha érishmekte.

Xitayning Uyghur diyarida nöwette yolgha qoyuwatqan qattiq basturush siyasitige inkas qayturush meqsitide muhajirettiki Uyghur ayallirining özlükidin teshkillinishi bilen yéqinda "Bir awaz, bir qedem" herikiti wujudqa chiqti. Bu chaqiriqqa dunyaning herqaysi jayliridiki Uyghur xanim-qizlirining qizghin awaz qoshuwatqanliqi we öz-ara medet-qollashta boluwatqanliqi közge chéliqmaqta.

Melum bolushiche, bir heptidin buyan ijtima'iy taratqularda keng tarqiliwatqan "Bir awaz, bir qedem" herikitini qollash teshebbusigha awaz qoshuwatqan Uyghur ayallirining sani künséri köpiyip barmaqta. Amérika, gérmaniye, kanada we qazaqistandiki bir qisim Uyghur ayalliri bu heqte ziyaritimizni qobul qilghanda, özlirining mezkur heriketni pütün küchi bilen qollaydighanliqini tekitlesh bilen birge, muhajirettiki barliq Uyghur ayallirining ornidin des turup, öz xelqige, wetinige ige chiqishi lazimliqini ipade qilishti.

Amérikidiki Uyghur ziyaliysi roshen abbas xanim bu heqte toxtalghanda, el-wetenning béshigha éghir künler kelgen bundaq bir weziyette muhajirettiki barliq Uyghurlarning öz-ara ixtilaplarni bir chetke qayrip qoyup wetini, milliti üchün emeliy ish qilishi lazimliqini eskertti. U, "Bir awaz, bir qedem" topining pa'aliyitini hemme Uyghurlarning qollishini muraji'et qildi.

Gérmaniyediki Uyghur ziyaliysi peride xanim "Bir awaz, bir qedem" topining meqsitining chet'ellerdiki xitaydin bihude ümidlerde boluwatqan Uyghurlarni "Qabahetlik uyquliridin oyghitish" ikenlikini ilgiri sürdi.

Qazaqistandiki Uyghur ziyaliysi dilnur qasimowa xanim bolsa, Uyghur ayallirining tarixtin buyan dölet we millet menpe'etliri üchün zor hessiler qoshup kelgenlikini, köpligen qehriman Uyghur ayallirining tarixta shanliq izlarni qaldurup ketkenlikini tilgha aldi. U yene nöwettiki milliy heriketlerdimu muhajirettiki Uyghur ayallirining roligha sel qarashqa bolmaydighanliqini tekitlidi.

Kanadada yashawatqan Uyghur ziyaliysi mukerrem qurban xanim sözide, "Bir awaz, bir qedem" herikitining ayallarda ümid we hayajan peyda qilghanliqini, buning balilarni wetenperwerlik idiyesi bilen terbiyeleshte ehmiyiti zorlighini bayan qildi.

Gérmaniyediki Uyghur ziyaliysi aman'gül xanimmu bu heriketke yughuri baha bérip, Uyghur diyaridiki éghir zulumlarni dunya jama'etchilikining diqqitige ulashturushta Uyghur ayallirining awazidin paydilinishning téximu ünümlük bolidighanliqini tilgha aldi.

Igilishimizche, ijtima'iy taratqularda "Bir awaz, bir qedem" topigha qoshulush teshebbusliri herqaysi döletlerdiki ayallar arisida keng qanat yaydurulmaqtiken. Mezkur top ehli 15-mart küni nyu-yorktiki b d t binasi aldida namayish qilishni tunji heriket pilani qilghan bolup, bundin kéyinki pa'aliyetlirini d u q bilen zich hemkarlashqan asasta élip baridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet