Хитай һөкүмити уйғур елидики компартийә әзалирини садақәтсизликтә әйиблиди

Ихтиярий мухбиримиз әкрәм
2015-11-26
Елхәт
Пикир
Share
Принт
Хитай қораллиқ сақчи қисимлириниң үрүмчи шәһиригә киргүзгән броневиклири. 2013-Йили 29-июн.
Хитай қораллиқ сақчи қисимлириниң үрүмчи шәһиригә киргүзгән броневиклири. 2013-Йили 29-июн.
AFP

«Фирансийә авази» ниң 26-ноябирдики «һөкүмәт шинҗаңдики бир қисим партийә әзалириниң террорлуқ һәрикәтлиригә қатнашқанлиқини көрсәтти» намлиқ хәвиридә вә «германийә долқунлири» ниң 25-ноябирдики «партийә әзалири ичидә террорға қатнишишни қоллиғанлар бар» намлиқ хәвәрлиридә, уйғур аптоном районлуқ интизам тәкшүрүш комитетиниң партком секретари шү хәйруңниң «җуңго интизам тәкшүрүш назарәт қилиш» гезитидә елан қилған доклатиниң мәзмунлирини очуқлиди.

Шү хәйруң доклатта очуқ-ашкара һалда уйғур елидики «бир қисим компартийә әзалириниң бөлгүнчиликкә қарши туруштин ибарәт бүйүк мәсилә үстидә тәвринип қалғанлиқи» ни, һәтта бәзилириниң «террорға қатнишишни қоллиғанлиқи» ни тилға алған. Әмма милләт тәркиби яки исми ениқ оттуриға қоюлмиған.

Бирақ, фирансийә ахбарат агентлиқи «доклатта қариға елинған компартийә әзалириниң уйғур болғанлиқи» ниң мисалини бәргән.

«Германийә долқунлири» радиосиниң бу һәқтики хәвиридә, шү хәйруңниң ениқ қилип «шинҗаң хизмитиниң муһим нишани иҗтимаий муқимлиқ вә әбәдий әминлик» дегәнликини, униң йәнә «панисламизм вә пантүркизмлиқ идийиниң тәсиридә, шинҗаң зораван террорлуқ һәрикәтлири җанланған, бөлгүнчиликкә қарши һәрикәт кәскинләшкән, баш ағриқини сақайтмиса болмайдиған дәвргә кирди» дегәнликини мисал қилған, шундақла униң уйғур елидики компартийә әзалирини тилға елип «бәзилири һәтта зораван террорлуқ һәрикәтлиригә қатнишишни қоллиған, бәзилири идийә-етиқадида тәвринип қалған, бәзилири марксизм, ленинизмға әмәс, худаға ишәнгән, йәнә бәзилири партийәгә садиқ болмиған, мулайим болмиған» дегәнликини қәйт қилған.

Хитай компартийисиниң ирадисини билдүридиған бир ахбарат васитисидә елан қилинған бу доклат ғәрб кишилириниңла әмәс, уйғурларниңму диққитини қозғиди.

Германийәдә яшаватқан уйғур зиялийси пәрһат муһәммиди әпәнди хитайниң уйғур кадирларниң садақитигә әзәлдин ишәнмәйдиғанлиқини тәкитлиди. У сөзидә «5-июл вәқәси» мәзгилидики әмәлий әһвалларни мисалға елип өтти. Германийәдики уйғур зиялийси абдувәли турсун әпәндиму бу һәқтә охшимайдиған қарашлирини оттуриға қойди.

«Фирансийә авази» «һөкүмәт шинҗаңдики бир қисим партийә әзалириниң террорлуқ һәрикәтлиригә қатнашқанлиқини көрсәтти» намлиқ хәвиридә, шү хәйруңниң «шинҗаңда бәзи компартийә әзалири террорлуқ һәрикәтлирини қоллиди һәтта униңға қатнашти. Бәзи компартийә әзалириниң бөлгүнчиликкә қарши туруш, милләтләр иттипақлиқи вә дөләтниң бир пүтүнлүки қатарлиқ негизлик мәсилиләрдә сөзи билән һәрикити бирдәк болмиди» дегәнликини әскәрткән.

Хәвәр, фирансийә ахбарат агентлиқиниң «мәзкур доклатта интайин кәм учрайдиған әһвал, йәни хитай компартийә даирилириниң шинҗаң вәзийитиниң қейинлиқини етирап қилғанлиқи, шуниң билән биргә, ши җинпиң һоқуқни қолға алғандин бери шинҗаңда зораванлиқ һәрикәтлириниң күндин‏-күнгә көпәйгәнлики, униңға қандақ тақабил туруш мәсилисидә компартийә ичидә ихтилап туғулғанлиқини көрситиду» дегән үзүндисини нәқил алған.

Фирансийә ахбарат агентлиқи, хитай интизам тәкшүрүш комитетиниң бу доклатиниң уйғур компартийә әзалириға қаритилғанлиқини очуқлап, шү хәйруңниң «бир қисим азсанлиқ милләт кадирлириниң бөлгүнчиликкә қарши туруш мәсилисидә идийиси мүҗмәл» дегәнликини мисалға алған.

Пикирләр (0)
Share
Толуқ бәт